Reportazen Marcio Morato Pinto
Dili sai centro hodi buka moris, aprende no halo atividade sira ne’ebe mak ema barak hakarak halo. Dili mos sai fatin ne’ebe ema desidi atu kontinua sira nia kursu ka edukasaun.
Neon Metin hasoru malu ho jovem nain rua mai hosi rai enklave Rejiaun Administrativu Espesial Oekusse-Ambeno (RAEOA), hodi buka abilidade. Mateus no Agida nudar Oe-cusse ana husik hela nia rai enklave hakat mai Dili hodi partisipa formasaun iha Centro Formação Técnica e Comunicação (CEFTEC).
Liu hosi formasaun ne’ebe realiza hosi CEFTEC Agida ho Mateus iha esperansa boot atu hetan rezultadu diak no bele halo buat ruma iha sira nia rai.
Bainhira remata Secundaria, Mateus ho Agida la kontinua sira nia estudu iha nivel universitariu, nune’e sira desidi mai tuir formasaun iha CEFTEC. Liu hosi formasaun iha CEFTEC, sira nain rua iha oportunidade diak hodi aprende ho gratuita no iha tinan oin sira iha esperansa bele kontinua iha universidade.
Hare ba realidade ida ne’e, Mateus ho Agida haktuir katak iha tinan 2019, sira remata Eskola Secundaria maibe iha tinan 2020 la konsege regista iha Universidade tamba nesidades atu sustenta sira nia estudo maka la sufisiente.
“Laos ami la hakarak atu eskola iha Universidade, maibe ekonomia iha familia maka ladun iha. Então agora dadaun ami buka atu aproveita formasaun ne’ebe maka iha, hodi hein karik iha futuru osan iha ami bele ba eskola iha Universidade”, dehan Mateus no Agida iha fatin Formasaun CEFTEC, Palacio do Governo, Terça Feira 29/09.
Ho oportunidade hirak ne’ebe iha Mateus sei hakas-an, aproveita no melhora saida maka nia aprende husi Formador sira maske formasaun ne’e iha tempo badak nia laran.
“Hau mai tuir formasaun iha CEFTEC ho objetivo atu aprende, hodi aumenta hau nia kapasidade. Espera buat ne’ebe hau aprende iha CEFTEC, hau bele aplika fali iha hau nia rai moris fatin, Oe-Cusse. Tamba ne’e hau sente orgulho tebes tuir formasaun ida ne’e, tamba bele sai passo ida mai hau ka dalan diak ida mai hau atu aprende”, hateten Mateus Punef.
Iha fatin hanesan formantes, Agida Maria hateten formasaun ne’ebe CEFTEC iha lori vantajem boot ba nia iha future, atu pratika abilidade ne’ebe nia iha, tamba husi programa no téknika ne’ebe nia hetan durante formasaun, maka bele tulun nia atu hatutan ba ema sira seluk.
“Formasaun ida ne’e fó valor no vantajem boot mai hau, tamba bele aumenta tan hau nia konnesemento ne’ebe antes ne’e seidauk iha. Ho nune’e formasaun sira hanesan ne’e maka bele halo ita hatene no komprende klean liu tan, konaba buat ne’ebe ita seidauk hatene durante ne’e. Ho nune’e materia ne’ebe formador sira hanorin ona, maka hau sei aplika no hanorin tutan ba hau nia kolega sira”, dehan Agida Maria.
Entretanto Mateus ho esperansa boot iha futuro bele atinji ninia mehi, atu loke rental no fahe ninia konnesimentu ba jovem sira ne’ebe maka hakarak atu aprende.
“Bainhira remata formasaun hau bele loke servisu ba hau nia an resik ka bele loke rental, tamba formasaun ne’ebe hau tuir, foti husi Unidade 3, maka Unidade Relasaun Públika no protokolu, Unidade Multimedia no unidade Televisaun. Unidade hirak ne’e iha relasaun ba malu, oinsa hau bele koalia no atende ema ho diak, oinsa hau bele compreende sistema Computador no oinsa hau bele compreende programa Televisaun nian” Mateus sublinha.
Resultado husi formasaun ne’ebe CEFTEC iha, ikus mai transforma no melhora formantes nain rua nia mentalidade sai diak liu tan. Iha futuru formantes nain rua disponivel atu hanorin ka sai matadalan ba joven feto no mane, ne’ebe hakarak aprende buat ne’ebe maka sira simu husi CEFTEC.
*(Marcio Morato Pinto nudar estajiadu iha media RENETIL Neon Metin)
