Reportazen Bernarda da Costa
Rotary Youth Leadership Awards Timor-Leste (RYLA-TL) halo abertura ba treinamentu lideransa nian, ba alunus RYLA 2020 durante semana ida.
Iha eventu refere, Xefe Estadu Maiór Jenerál F-FDTL, Maijór Jenerál Lere Anan Timur hateten joven mak futuru ba nasaun no joven tenke hatene mos istoria nasaun nian, wainhira atu sai lideransa iha futuru.
“Ai-rin ha’at iha nasaun Timor -Leste mak Governu, Prezidente,Tribunal no Parlamentu, sira mak sai hanesan ai-rin ha’t ba iha estadu”, dehan Lere Anan Timur iha Maloa bainhira sai hanesan orador ba treinamentu RYLA nian Segunda (5/10).
Nia dehan lideransa ita bele koalia, lider ba kompania ida, ,lider ba ONG, lider ba eskola, lider ba militar, lider ba governu ,lider ba parlamentu. Lider nebe susesu no lider la susesu depende ba asaun ne’ebe mak lider ida halo .
“Koalia konaba lideransa iha mos buat barak no mos oi-oin, kualidade no mos kuantidade .Timor iha lider barak maibe lideransa kualidade dala ruma la hanesan .Uluk ami iha ailaran lideransa oitoan maibe kualidade kompara ho agora”, hatutan Lere Anan Timur.
Nia hateten bainhira sai lider ida, laos hatudu buat nebe mak fasil maibe buka buat nebe mak defisil, hodi solusiona problema ruma, ida ne’e mak hanaran lider ne’ebe mak diak no ider tenke rezolve problema laos kria fali problema.
Iha parte seluk mos Premiadu Nobel da Paz, Dr. Jose Ramos Horta hateten Juventude sira ne’ebe mak partisipa iha programa oioin, sira bele sai ema nebe kualiadade iha future. Tenke rekonese apoiu makaas ba programas oioin nebe joven sira partisipa hanesan meio ambiente ,papel lideransa juventude hametin dame iha futuru.
“Sai lideransa ne’be diak mak tenke estuda ho seriu, labele eskola tiha no remata sosa fali diploma ida ne’e ladiak. Joven sira tenke eskola iha universidade ida nebe mak hetan akreditasaun ona, hodi nune’e wainhira remata bele hetan lalais servisu”, dehan Ramos Horta.
Nia dehan Juventude maka futuru ba nasaun, entaun tenke iha edukasaun ida ne’ebe mak kualidade. Governu tenke hare programa espesial ida ba juventudi liu husi edukasaun no saude.
