Reportazen David da Costa Gusmao*
Sekretariu Estadu Protesaun Sivil (SEPS) ohin distribui nesesidade bazika ba komunidade afeiadu inundasaun hamutuk uma kain 38 iha centro Canosiana Hera, iha aldeia Ailok Laran, Suku Hera no postu Administrativu Kristu Rei
Diretor Jeral Protesaun Sivil (DJPS), Ismael Da Costa Babo hateten, ohin re-integra fali ona familia hamutuk uma kain 38 ba ida-idak nia hela fatin, sira hetan mos apoiu emerjensia husi SEPS, material sira ne’ebe ohin apoiu, ne’ebe bele tulun sira bainhira fila ba iha ida-idak nia hela fatin.
“Material ne’ebe ohin apoiu mak hahan balun no mos nesesidade dapur nian, para sira fila fali ba sira nia hela fatin hodi bele uza,” dehan Diretor Jeral Protesaun Sivil ba jornalista sira iha centro Canosiana Hera, 22/04.
Nia haktuir ba sira ne’ebe mak uma estragu total lolos ne’e, Amo sira sei akumula hela iha ne’e, no ekipa sei tun halo verifikasaun ba estragus sira ne’e hotu, depois sei apoiu rekuperasaun ba sira iha tempu tuir mai, para sira mos bele fila ba sira nia uma, hodi hari fali sira nia uma ne’ebe estragus total.
Iha fatin hanesan vitima afetadu hosi inundasaun Casilda Guterres hateten sente kontente tanba hetan apoiu nesesidade bazika hanesan mie instant, latarias, mina, fos, manta, biti no mos material dapur nian.
“Hau kontente tebes tanba bele hetan ona apoiu husi governu, maibe hau hakrak husu nafatin ba govrnu bele apoiu nafatin ba ami, tanba dezastre natural ne’ebe akontese estraga hotu ami nia uma no sasan uma laran,”nia haktuir.
*(David da Costa Gusmao nudar estudante UNTL ne’ebe halo estajiu iha Neon Metin)
