Reportazen David da Costa Gusmao*
Sekretariu Estadu Protesaun Sivil (SEPS) liu husi Diresaun Prevensaun Konflitus Komunitariu hala’o dialogu ho komunidade afetadu ba dezastre natural iha aldeia Ailok Laran, Suku Hera Postu Administrativu Kristu Rei, hodi rona komunidade sira nia halerik, durante hasoru inundasaun iha semana hira liu ba.
Diretor Jeral Protesaun Sivil (DJPS), Ismael da Costa Babo hateten dialogu ne’e atu rona difikuldade ne’ebe mak komunidade enfrenta hafoin inundasaun ne’ebe akontese iha loron 4 Abril tinan ne’e, no esplika mos ba komunidade sira konaba kondisaun real iha Timor-Leste.
“Ita halo dialogu ida ne’e oinsa atu bele esplika ba komunidades sira konaba kondisaun real ne’ebe maka sira hasoru durante inundasaun ne’e,” dehan Ismael ba jornalista iha seminariu Sagradu Kurasaun de Jesus Hera, 23/04.
Referendismu Padre Nivio Correia hosi seminariu Sagradu Kurasaun de Jesus Hera ne’ebe fasilita fatin ba vitíma dezastre natural sira hateten durante ne’e laiha atendementu ruma husi parte saúde ba komunidades sira, tanba ne’e husu ba governu atu bele rona komunidade sira nia halerik.
“Ami maka ne’e, semana rua ona ami nia kondisaun toba mak hanesan ne’e ona no buat triste ida mai mak iha semana kotuk bainhira ita nia inan feton ida atu partus iha dadersan, antes parte governu nian mai fo abulansia no oferese pesoal saude sira nia nomor mai, maibe husi 2 ou 3 oras hanesan telefone ba ema sira ne’e la atende telefone,” nia relata.
Nia dehan “ita rona malu karik diak, tulun malu, ami kontaktu no ami loke tiha ona posibilidade, ami fo ami nia fuan tomak atu sira iha ne’e no ami husu ba governu atu rona mos atan sira ne’e nia halerik tanba semana tolu ona, sira toba deit iha semente leten”.
Nune’e mos vitima afetadu inundasaun Casilda Guterres hatete, iha inundasaun ne’e mota lori hotu sira nia ona nia kaderneta eskola.
“Hau husu ba governu bele halo netik fali kaderneta ba hau nia oan sira, tanba hau nia oan nain 6 eskola hotu balun SD, SMP no SMA, maibe nia kaderneta mota lori hotu,” dehan nia.
Hatan ba preokupasaun hirak ne’e Diretor jeral Protesaun Sivil ( DJPS) Ismael da Costa Babo hateten sei hato’o preokupasaun hirak ne’e ba parte kompetente hodi foti asaun imediatamemte.
“Hau sente triste oituan bainhira parte asistensia saúde la to’o iha fatin ne’e maibe ida ne’e ami sei hato’o ba Direktor Jeral Saúde nian, hodi foti asaun imediatamente ba asaun asistensia saúde mai iha fatin ne’e,” nia partilha.
*(David da Costa Gusmao nudar estudante UNTL ne’ebe halo estajiu iha Neon Metin)
