Home Memoria Jojo Lases: Joven Lutador iha RENETIL Ba Ukun Rasik An (28 Outubru...

Jojo Lases: Joven Lutador iha RENETIL Ba Ukun Rasik An (28 Outubru 1970 – 28 Maiu 2020)

2880
0
Jojo Lases bainhira kaptura hosi militar Indonesia iha demonstrasaun 19 Novembru 1991

RENETIL lakon tan nia kompaneiru da luta ida mak brani tebes no dedika an ba luta ukun rasik an nian. Egas Jose Dias Quintas Monteiro ho naran kodigu revolusionariu Lases, Moris iha Batara, Laclubar, Manatuto, 28 Outubru 1970. Lases sarani nudar militante RENETIL, iha 1990, iha UNER Kablaki, Surabaya, Indonesia. Lases nia naran koinesidu seluk mak Jojo. 

Jojo Lases ativu partisipa iha luta ba ukun rasik an, hamutuk iha rede klandestina sira, inklui involve besik organizasaun RENETIL. 12 Novembru 1991, bainhira juventude loriku aswain sira halo demonstrasaun iha Dili no hetan tiru iha simeteriu Santa Cruz, estudante no joven Timor-oan sira iha Indonesia mos la hakmatek no sente iha responsabilidade hodi husu justisa ba governo Indonesia.

Jojo Hamutuk ho estudantes iha Jawa no Bali ba halo demostrasaun kondena maka’as hahalok rezime militar indonesia ne’ebe halo agresaun militar no violensia ba juventudes iha 12 de Novembru de 1991. Demostrasaun halo iha 19 Novembru 1991, iha Jakarta, Indonesia iha fatin, Perwakilan PBB, besik Embaixada Japaun no Australia. Jojo tempu ne’eba nudar militante RENETIL reprezenta estudante sira husi Surabaya asina karta petisaun hatama iha perwakilan PBB, Embaixada Japaun no Australia.

Jojo haktuir iha ninia baze de dadus mak tama iha RENETIL katak, hosi aktividade demostrasaun ne’e sira hetan kaer ho polisia Indonesia nian.

“Ami hamutuk 100 ital pesoas maka kaer hatama ba sela POLDA METRO JAYA, Jakarta, Indonesia. Depois interogasaun husi intelejensia militar no polisia, sira seluk husik livre/sai hotu no ami 21 pesoas maka kontinua kastigu,” Jojo hatete iha nia istoria involvementu ba RENETIL bainhira sei moris.

Jojo mos hanoin hetan ema balun mak kastigu hamutuk ho nia inklui João Camara, Virgilio Guterres, Avelino Coelho, Francisco Lopes, João Travolta, Sergio Dias Quitas, Fausto, Agapito, Jose Luis Oliveira, no selu-seluk tan. 

Hafoin kaer tiha Jojo ho nia kolega sira, loron hirak tuir mai kaer saudoso Fernando de Araujo “Lasama” lori mai hamutuk ho Jojo sira iha sela ida iha Jakarta.

La to’o deit halo demonstrasaun iha Jakarta, Jojo mos kontinua ninia atividade politik iha Portugal no rai seluk iha Eropa bainhira konsege haksoit tama tiha embaxada Japaun nian iha Indonesia no husu auxiliu politik.

Durante iha Portugal, Jojo ba ho Dr. Jose Ramos Horta no Jose Luis Guterres, halo testamunha iha Genebra sobre Violasaun diretus humanus iha Timor. Hamutuk ho nia kompaneiru sira seluk, Jojo involve iha demonstrasaun oioin, inklui demostrasaun iha Franca iha Embaixada Indonesia sobre violasaun direitus humanus durante konsulta popular iha 1999. Halo demostrasaun pasifiku iha Portugal ba Embaixada sira iha Lisboa sobre atuasaun violasaun gravidu hodi milisia iha 1999.

Jojo Lases hasai kursu iha Eskola Profesional Amadora, iha Amadora, Portugal. Maromak bolu ona Jojo ba Nia sorin kuana, iha 28 Maiu 2020, ho idade 49. Jojo husik hela Fen Sarita Cristovao, oanCarol J.L.C.D Monteiro, Cristopher J.L.C.D Monteiro, Zafier J.L.C.D Monteiro no Josephine J.L.C.D Monteiro.

LEAVE A REPLY

Please enter your comment!
Please enter your name here