Home EduTek Tama Ona Tinan 16 Eskola EBC 3 Siklu no.1 Balibo Sedauk Iha...

Tama Ona Tinan 16 Eskola EBC 3 Siklu no.1 Balibo Sedauk Iha Biblioteka

318
0
estudante no mestre eskola Ensinu Baziku Central 3 Siklu no.1 Balibo. [Foto: Adroaldo | 29.10.2020]

Reportazen Adroaldo ‘Saretukau’

Asesu edukasaun kualidade, sei rezulta lideransa kualidade. Edukasaun nudar baze fundamental ba ema hotu sem diskriminasaun, ho nune’e bele kontribui ba dezenvolvimentu ne’ebe kualidade.

Jornalista Neon Metin halo observasaun direita iha sidade liberdade imprensa Balibo, municipiu Bobonaro hodi hare besik kondisaun eskola Ensinu Baziku Central 3 Siklu no.1 Balibo. Kondisaun eskola refere ne’ebe sei menus fasilidade importante sira hanesan biblioteka. Tama tinan 16 desde eskola harii, sira seidauk iha biblioteka, nein sala ida hodi estudante sira bele tuur hodi estuda, wainhira tempu rekreiu ka hakarak konsulta matéria ruma.

Ho situasaun ida ne’e Neon Metin dadalia ho estudante Maria Febiana Santos dos Reis, klase 9 anu, ba Neon Metin nia hateten sira nia eskola la iha biblioteka no sira estuda de’it matéria sira ne’ebé mestre sira fó.

“Durante ha’u eskola iha ami nia eskola, biblioteka la iha, ami estuda de’it matéria saída mak mestre sira fó”, hateten Maria iha Balibo, 26/10.

Maria ne’ebé oras ne’e da-dauk prepara hela aan, hodi tuir nia ezame nasional, konfesa katak susar tanba nia ho nia belun sira labele estuda no prepara matéria iha sira nia eskola tanba la iha biblioteka, aat liu tan mak sira labele lori livru ba uma hodi estuda.

“Mestre sira fó livru mai ami estuda iha uma, maibé iha momentu estadu emerjénsia ne’e sira konsege fó, liu tiha ida ne’e ami entrega fali. Livru iha eskola iha, maibé ami labele lori ba uma, ne’ebé difisil tebes mai ami”, tenik Maria.

Nia hatutan livru la iha mai ami hodi estuda, ha’u sente la di’ak tanba ami la komprende barak, no mós mestre sira atu hanorin ami araska ituan tanba livru barak mak la iha.

Nia haktuir katak hosi ami nia eskola mak distribui fali livru ba eskola seluk hanesan eskola iha Suku Leohitu, tanba ne’e ami la hetan livru hosi fatin seluk atu estuda iha ami nia eskola.

Iha fatin hanesan estudaten Eduardo Pires Santos, klase 9 anu haktuir katak iha sira nia eskola la biblioteka, nune’e difikulta tebes nia atu estuda hodi komprende matéria sira.

“Iha ami nia eskola rasik biblioteka la iha, ami estuda de’it saída mak mestre sira fó ba ami. Ba ha’u biblioteka ho livru la iha ne’e difikuldade boot, tanba buat saída mak ha’u la komprende, hau sei lahatene tanba la iha livru”, hateten Eduardo

Nia husu ba governu atu tau matan ba ami nia eskola, tanba presiza tebes biblioteka hodi  bele estuda di’ak.

Iha parte sorin Neon Metin dada lia ho Profesor Matemátika 9 anu, Lorenço Tavares konabá faslidade biblioteka ne’ebé sedauk iha. Ba Neon Metin nia hateten la iha duni biblioteka iha sira nia eskola no ida ne’e difikulta tebes ba prosesu aprendizajen.

“Iha centro ida ne’e biblioteka la iha, ami nia profesor ida da-daun ne’e ba tuir hela treinamentu konabá biblioteka to’o Díli, mais ba partisipa de’it, hanoin hela iha kakutak atu halo biblioteka ketak mais ida ne’e orsamentu boot liu ne’ebé paradu hela”, tenik Lorenco

Nia hateten presiza duni iha biblioteka hodi rai livru sira, tanba difisil ba sira agrupa hamutuk ho livru sira.

Nia informa eskola refere halo paresiru ho organizasaun ida hosi Austrália ne’ebé hanorin Ingles, sira propoin  atu halo biblioteka maibé la konsege tanba Surtu COVID-19 mak impede.

Nia dehan livru hosi 7 anu to’o 9 anu ba estudante sira sufisiente ona, maibé fatin mak la iha ba alunu sira tama hodi lee, ida ne’e mak araska. Iha armazen livru nakonu no sufisiente mos ba profesor sira. Profesor Lorenço haktuir iha Eskola Ensinu Bázika Nú.1 balibo 26/10

Print Friendly, PDF & Email

LEAVE A REPLY

Please enter your comment!
Please enter your name here