Home EduTek Treinamentu Jurnalismu Komprensivu ba Dahaat, Virgilio: KI Hakarak Hasae Kualidade Jornalista nian

Treinamentu Jurnalismu Komprensivu ba Dahaat, Virgilio: KI Hakarak Hasae Kualidade Jornalista nian

227
0
MAPCOMS, UNDP, KI hamutuk ho jornalista sira. [Foto: Marcio Morato Pinto | 29.10.2020]

Reportazen Marcio Morato Pinto

Konsellu Imprensa (KI) realiza formasaun jurnalismu komprensivu ba dahaat nian ba jornalista sira. Liu hosi konferensia imprensa, Prezidente KI, Virgilio Guterres hateten formasaun ne’ebe KI halo tamba hakarak hasae kualidade jornalista sira nian, liu hosi obra jurnalistiku ne’ebe sira hakerek no produz iha sira nia media.

“Formasaun ida ne’e Konselhu Imprensa halo ho referensia lubuk ida, primeiru tamba lamentasaun ou kritika publiku nian ba iha kualidade notisia ka informasaun ne’ebe média sira fó sai iha publiku, liu hosi jornalista sira nia serbisu, ho nune’e Konselhu Imprensa sente hanesan iha interesse no iha mos responsabilidade boot ida atu involve iha formasaun ida ne’e, liu liu formasaun ne’ebe jornalista sira bele pratika kedas iha oin no oinsa hasoru sira nia fontes ne’ebe iha”, dehan Virgílio iha salaun KI-Kintal Boot, 29/10.

Preszdente KI  husu atu formantes sira bele aproveita tempo ne’e ho diak, atu nune’e bainhira remata sira bele explora diak liu tan konhesimentu ne’ebe sira simu durante fulan ida nia laran.

Iha fatin hanesan Ministro Assuntos Parlamentares no Komunikasaun Social (MAPKOMS), Francisco Jerónimo hateten polítika governu nian ba jornalista sira maka oinsa atu garante nafatin liberdade expresaun no imprensa, hodi fó nafatin apoio ba jornalista sira.

“Governu kaer nafatin lei komunikasaun social katak garante liberdade de espresaun, liberdade de imprensa no asesu ba informasaun sira, entaun papel governu nian nafatin garante ida ne’e, hodi fó apoio ba iha formasaun sira ne’e, liu hosi kooperasaun ne’ebe KI iha”, dehan Ministro Francisco.

Ministro mos hateten espera lasu kooperasaun ne’ebe KI, UNDP no KOICA bele kontinua nafatin ba oin, atu nune’e bele fó oportunidade ba jornalista sira atu hetan formasaun ne’ebe diak liu iha futuru.

Ho nune’e Ministru ne’e hatutan katak jornalista sira presiza kaer nafatin método 5W+1H, atu nune’e kestaun ne’ebe jornalista sira fó, bele iha valor liu hosi faktus no los hodi hatudu professionalidade nu’udar jornalista. 

Lansamentu ba jornalismu kompreensivu hetan partisipaaun máximu hosi Ministro Assuntos Parlamentares no Komunikasaun Social, representantes UNDP, Presidente Konselhu Imprensa no mos formantes Jornalista sira ne’ebe sei halao formasaun durante fulan ida.  

Jornalista sira ne’ebe partisipa ba formasaun ne’e hamutuk 22 ne’ebe reprezenta hosi media online sira. Programa ne’e hetan apoiu hosi UNDP no KOICA hodi dezenvolve media ihaTimor-Leste.

LEAVE A REPLY

Please enter your comment!
Please enter your name here