Home Analisa Rezultadu husi Global Hunger Index 2020 kredivel ka lae?

Rezultadu husi Global Hunger Index 2020 kredivel ka lae?

414
0

Analiza hosi La’o Hamutuk

Relatóriu Indise Hamlaha Global 2020 hamosu debate no diskusaun iha media no sosiedade sivil, tanba tuir rezultadu husi relatóriu nee haktuir katak Timor-Leste nia númeru malnutrisaun aas liu kompara ho nasaun sira seluk. Artigu badak ne’e ho objetivu atu esplika konteúdu relatóriu no fo sujestaun balun oinsá Timor-Leste bele rezolve problema malnutrisaun iha Timor-Leste. Relatóriu GHI públika husi NGO internasionál rua: “Welte Hunger Hilfe” no “Concern Worldwide”, ne’ebé uza dadus husi UNICEF, WHO, no ajénsia ONU seluk. Ajénsia hirak ne’e mós hetan dadus husi relatóriu ofisiál Governu Timor-Leste nian. 

Relatóriu estudu ne’e foka ba aspetu haat: persentajen husi populasaun ne’ebé enfrenta  nutrisaun menus (undernourished); persentajen husi labarik ho idade menus husi tinan lima isin ra’es badak(stunted); labarik ho isin krekas (wasted), no taxa mortalidade labarik sira ho idade menus husi tinan 5 (mortality rate). Depois halibur dadus hotu husi kada nasaun, peskizadór sira halo kalkulasaun atu hatene valór komparativu. Valór final kompostu husi nível mate sedu no nutrisaun menus fó kontribuisaun boot liu kompara ho nível isin ra’es badak no isin krekas ka isin-kiik. 

Rezultadu final fó valór ba kada nasaun. Valór ho númeru 0 signifika nasaun ida ne’e la hasoru hamlaha, no valór besik númeru 100 signifika katak populasaun tomak hamlaha. Timor-Leste hetan valor 37.6, nee katak iha nasaun ida de’it (nasaun Chad, iha Afrika) ne’ebá hetan valór aas liu. Tanba ne’e, Timor-Leste tama iha kategoria “alarming” ka tenki hetan atensaun sériu. Iha nasaun balun, ne’ebé la hetan valór, tanba dadus la iha inklui nasaun balun ne’ebé hasoru hela konflitu no krize boot hanesan Yemen no Syria. Maski nune’e, rezultadu hatudu katak husi nasaun 107 ne’ebé iha dadus, iha nasaun ida deit mak iha situasaun grave liu duke Timor-Leste. 

Informasaun husi relatóriu ida ne’e laos buat foun liga ho situasaun iha Timor-Leste. Ita hatene ona katak problema nutrisaun nudár problema nasionál no presiza entidade hotu nia atensaun. Tuir dadus TLDHS (Timor-Leste Demography Health Survey) 2016, 13% deit husi labarik ho idade fulan 6 to’o fulan 23 hetan ai-han ho nutrisaun ne’ebé sufisiente (tuir “minimal acceptable diet”). Problema nutrisaun laos de’it ba labarik sira; dadus TLDHS mós hatudu katak 23% husi feto ho idade tinan 15-49 enfrenta mós anemia. 

Relatorio Indise Hamlaha Global 2020 relata dadus balu diferente ho dadus TLDHS nian, maibé refleta nafatin TLDHS nia deskobrimentu kona ba problema malnutrisaun ne’ebé aas iha Timor-Leste. Tabela tuir mai hatudu diferensia entre dadus ne’ebéGHI uza atu kalkula valor Timor-Leste, no dadus husi TLDHS 2016. 

Tabela 1. Komparasaun dadus TLDHS 2016 no GHI 2020

FontesUndernourishedStunting*Wasting*Mortality rate*[1]
GHI 202030.9%51.2%14.6%4.6%
TLDHS 201630.9% (FAO)46%24%4.1%

Diferensia entre dadus TLDHS no estatístika ne’ebé uza iha GHI la signifika katak rezultadu GHI nian la kredivel. La’o Hamutuk hafoin lee relatóriu GHI, kontaktu ba peskizadór sira iha GHI, hodi konfirma kona ba dadus ne’ebé sira uza. Tuir esplikasaun husi GHI, dadus ne’ebé relatóriu ne’e uza mai husi UNICEF, Banku Mundial, no Organizasaun Saúde Mundial ne’ebé halibur iha database JME (Joint Malnutrition Estimates), no database Banku Mundial nian kona ba nutrisaun labarik nian. GHI analiza dadus ne’e, no refere mós ba estatístika ka dadus seluk ne’ebé fó impaktu mós ba labarik ho nivel isin ra’es badak no labarik ho isin krekas. Sira uza modelu analiza ida ne’e durante tinan 5, no haree katak modelu refere bele fó estimasaun ne’ebé loos. Se karik sira uza dadus TLDHS nian deit, rezultadu sei hatudu katak situasaun Timor-Leste nian sei aat liu fali; katak Timor-Leste bele hetan valór to 41.4 bainhira uza deit dadus husi TLDHS, kompara ho valór 37.6 ne’ebé mai husi metodolojia GHI nian. Entaun bazeia ba fonte dadus rua ne’e, situasaun ne’ebé Timor-Leste hasoru sériu tebes. 

Hare ba realidade, povu barak iha Timor-Leste seidauk asesu ba ai-han ne’ebé ho nutritivu, liu-liu labarik sira, la hetan ai-han sufisiente ho nutrisaun di’ak. Situasaun ne’e kria impaktu todan ba ita nia labarik sira jerasaun futuru nasaun nian. Aleinde la asesu ba ai-han di’ak, iha mós problema ho sira nia saúde, edukasaun, produtividade, kapasidade no família iha futuru. Situasaun no problema hirak ne’e susar atu rezolve no kompleksu tebes. Disponibilidade ai-han nutritivu menus tanba produsaun iha rai laran ladún sai prioridade no depende maka’as ba konsumu foos duke diversidade ai-han, kustu ai-han diak ho nutritivu ne’ebé karun.[2] Iha Timor-Leste, so 25% husi populasaun de’it iha asesu ba ai-han ne’ebé seguru.[3] Moras hanesan diária bele kauza nutrisaun menus. Diária hetan impaktu husi falta bee mós no fasilidade saneamentu; bazeia ba DHS 2016, 50% de’it husi uma kain iha Timor-Leste bele asesu ba fasilidade saneamentu ne’ebé di’ak, signifika katak sira uza sintina ho tanke séptiku (pit latrine), no 58% deit husi uma-kain iha area rurál hetan asesu ba bee moos iha sira nia uma ka besik sira nia hela fatin. 

Hodi responde no hadi’ak situasaun nee presiza investimentu ba saneamentu no bee mós nudár fatór importante tebes. Promove no konsumu ai-han lokal ne’ebé ho variedade diversifikadu, promove setór peska no aquacultura atu fornese ikan ho folin baratu ba komunidade. Halo tuir rekomendasaun husi Ministériu Saúde kona-ba dieta saudável ka han ai-han lokal nebe ita kuda rasik iha rai laran (hanesan ai-han hodi fo forsa (energia) hanesan fehuk, talas, foos, lakeru nsst, ai-han hodi haburashanesan ikan, manu tolun, koto no fore sira no ai-han b protesaun hanesan modo no ai-fuan sira). La’o Hamutuk kontinua ezije ema hotu iha Timor-Leste, inklui autoridade kompetente sira tenke servisu hamutuk hodi luta kontra malnutrisaun. Maske ita bele debate númeru barak iha relatóriu sira, ita hotu tenke koko, ho meta klaru, planu realistíku atu hadi’ak problema nutrisaun iha rai doben ida ne’e.  


[1] Nudár persentajen husi populasaun labarik ho idade menus husi tinan 5

[2] Relatóriu prienxe lakunas nutritive Timor-Leste, Dezembru 2019

[3] IPC Chronic Food Security Analysis 2019 http://www.ipcinfo.org/fileadmin/user_upload/ipcinfo/docs/3_IPC_Timor%20Leste_CFI_20182023_English.pdf

LEAVE A REPLY

Please enter your comment!
Please enter your name here