Home Justisa SEJD Kondena Makaas Aktu Krimi Multiplus Hasoru Joven Feto ho nia Inan...

SEJD Kondena Makaas Aktu Krimi Multiplus Hasoru Joven Feto ho nia Inan Iha Terra Santa

594
0
trajedi Rai Kotu. [Foto: Copyright Facebook | 31.10.2020]

Reportazen Zevonia Vieira

Relasiona ho trajedia iha Rai Kotuk ne’ebe hakotu Domingas Soares nudar inan ida nia vida, bainhira salva nia oan Amoe hosi hahalok krimi, hodi tenta atu halo violasaun seksual ba Amoe, liu hosi komunikadu imprensa ne’ebe Neon Meton asesu, Sekretariu Estadu Juventude no Desportu (SEJD), Eng Abrão Saldanha, hato’o kondenasaun maka’as hasoru krimi sira ne’ebé akontese hasoru joven feto ida ho ninia inan iha sira nia uma laran, iha aldeia Terra Santa, Raikotu, Dili. Krimi múltiplus ne’e vítima hetan iha kinta kalan liu ba.

Iha krimi sadis ne’ebé suspeitu ida ho inisial LH komete iha Kinta kalan boot ne’e, joven feto ne’e hetan tentativa asaltu sexual hasoru nia, no tamba ne’e nia hakilar husu tulun. Ba ida ne’e suspeitu lori tudik sona joven feto ne’e halo nia sofre kanek iha parte liman no kaba’as. Alen de hakanek joven ne’e, suspeitu LH mós sona joven feto ne’e nia inan, ne’ebé tenta atu salva nia husi aslatu seksual ne’ebé mak hakotu joven feto ne’e nia inan iha fatin.

“Lori Sekretaría Estadu Juventude no Desportu tomak nia naran, ha’u hakarak atu kondena ho forte tebtebes áktu krimi ne’ebé ha’u nia maluk joven feto ne’e ho nia inan faluk simu iha sira nia uma laran rasik”, hateten Sekretariu Estadu Abrão Saldanha, 31/10.

Nia dehan joven sira hotu iha dever boot no presiza halo buat hotu ne’ebé ita bele, atu garante katak ita joven sira, liuliu joven feto sira, ita nia inan feton sira sente katak, sira siguru no bele moris la ho tauk iha sira nia uma no sira nia komunidade.

Sekretariu Estadu Abrão Saldanha hato’o sentidus kondolensias klean ba maluk joven feto ne’e, tamba lakon nia inan doben no “apela ba autoridade kompetente hotuhotu atu investiga no hatur justisa ba vítima sira ba krimi ida ne’e”.

SEJD apela ba autoridade no entidade kompetente sira hotu, atu tulun maluk joven feto ne’e, atu nia bele rekopera husi trauma ne’ebé nia sofre hanesan konsekuensia husi krimi sira ne’e.

LEAVE A REPLY

Please enter your comment!
Please enter your name here