Home Notisia Tinan 20 RKSNU 1325, Sunita: Halo Asaun no Investimentu Ba Feto,...

Tinan 20 RKSNU 1325, Sunita: Halo Asaun no Investimentu Ba Feto, Pas no Seguransa

318
0
loron Rezolusaun Konsellu Seguransa Nasoens Unidas 1325 ba Feto, Pas no Seguransa. [Foto: Copyright Manuela Leong Pereira | 11.11.2020]

Reportazen Zevonia Vieira

“Timor-Leste nafatin kometidu atu kontinua PAN 1325 faze segundu husi 2021-2025”. Vice Ministru Interior

Relasiona ho komemorasaun ba tinan 20 hosi Rezolusaun Konsellu Seguransa Nasoens Unidas (RKSNU) 1325 ba Feto, Pas no Seguransa, UN Women, Ministeriu Interior komemora loron importante ho parseiru sira, ho tema Feto, Pas no Poder, Investe ba Feto, Investe ba Futuru.

Liu hosi komunidade imprensa ne’ebe UN Women hateten Timor-Leste halo refleksaun ba nia progresu rasik atu avansa nia Planu Asaun Nasional ba Rezolusaun Konsellu Seguransa ONU 1325 (PAN 1325) 2016-2020.

Lidera husi Ministerio Interior iha koordenasaun ho liña ministerio oi-oin, instituisaun estadu no sosiedade sivil, PAN implementa ona ho asistensia teknikal husi UN Women no suporta jenerozu husi Governu Japaun. Iha tinan 2020, Timor-Leste no Japaun hanesan nasaun 1 husi Membru Estadu ONU 85 ne’ebé dezemvolve tiha ona Planu Asaun Nasional ida ba Rezolusaun Konsellu Seguransa ONU 1325. PAN 1325 Timor nian suporta atividade sira atu promove no garantia feto sira nia partisipasaun iha pozisaun no prosesu ba foti no halo desizaun sira, inklui seitor defeza no seguransa, harí pas no dezemvolvimentu.   

Dezde adoptasaun PAN 1325 iha 2016, Ministerio Interior estabelese ona sekretariadu ida no estrutura koordenasaun ida, hodi servisu hamutuk ho liña ministerio 12 seluk no organizasaun sosiedade sivil oi-oin atu alkansa planu ba atividade 47.

Atividade hirak ne’e relasiona ho Feto, Pas no Seguransa organizadu ba iha pillar 4 foka ba feto sira nia partisipasaun iha lideransa no foti desizaun, prevensaun ba konflitu violentu, protesaun husi violénsia no diskriminasaun no planu responsivu ba jéneru no justisa ba pos konflitu ba harí pas. Liuhusi projeitu “Hasa’e Feto Nia Partisipasaun Signifikativa iha Harí Pas no Estadu,” Governu Japaun no UN Women suporta ona Timor-Leste atu implementa ninia PAN 1325, ho foka ida ba feto nia partisipasaun no papel iha prevensaun konflitu.  

Embaixador Japaun ba Timor-Leste, Kinefuchi Masami, iha nia abertura hateten projeitu millaun $2.8. Nia dehan fundu husi governu Japaun no implementa ho susesu tebes husi UN Women iha tinan hat (4) nia laran. Ami mos servisu hamutuk ho Governu no sosiedade sivil Timor-Leste, “hau hakarak hato’o hau nia agradesimentu ba ema hirak ne’ebé involve ba sira nia servisu ne’ebé dedikadu”.

Nia hatutan governu Japaun suporta ajenda Feto, Pas no Seguransa, ne’ebé haforsa feto sira nia papel iha foti desizaun no empoderamentu ein jeral. Ida ne’e parte ida husi avansa seguransa umanu no ba atinji ODS sira.

Liu hosi komunikadu imprensa Vice Ministro Interior, Antonio Armindo hateten dezde planu ne’e adopta iha 2016, nia atividade liu 52% mak implementa ona. Eventu komemorativu no hato’o projeitu nia rezultadu sira sei tuir kedas ho diskusaun meza redonda ida atu revé progresu PAN 1325 no identifika areia prioridade sira atu alkansa ba oin. “Timor-Leste nafatin kometidu atu kontinua PAN 1325 faze segundu husi 2021-2025”.

Iha tempu hanesan Xefe Edifisiu UN Women Timor-Leste, Sunita Caminha informa katak eventu Timor-Leste nian ida ne’e, tuir malu ho eventu diskusaun global sira ba aniversariu dala 20, ba ajenda Feto, Pas no Seguransa. Eventu sira ne’e ho relatoriu 2020 Sekretario Jeral ONU nian ba Feto, Pas no Seguransa subliña tiha ona, husi areia sira ne’ebé subliña, presija ba atensaun no komitmentu ida ne’ebé bot liutan ba hasa’e feto sira nia partisipasaun  iha lideransa no rozolusaun konflitu, monta tarjetu atu fundu diak liu tan organizasaun ba feto sira, investimentu iha dadus atu informa politika no halais liutan atu atinji progresu.

“Iha Timor-Leste nia kontestu, komitmentu ba Feto, Pas no Seguransa hanesan parte husi nasaun nia istoria ba rezistensia no reziliensia. Ida ne’e mak komitmentu ida ne’ebé lidera ita ba adoptasaun PAN 1325 in 2016. Ohin loron, nasaun ne’e tenki foti asaun sira no halo investimentu sira ba Feto, Pas no Seguransa atu sai hanesan parte ida husi nia futuru, ne’ebé feto iha poder hanesan  no goza direitu hanesan ba pas ida ne’ebé inklusivu no sustentavel,” hatete Sunita Caminha.

UN Women kolabora ho Ministerio Interior, ho fundu jenerozu husi Governu Japaun hodi revé progresu ba Planu Asaun Nasional ba Rezolusaun Konsellu Seguransa ONU 1325 no rezultadu husi parseria 2016-2020 ba Feto, Pas no Seguransa.

Print Friendly, PDF & Email

LEAVE A REPLY

Please enter your comment!
Please enter your name here