Home Notisia TL País Joven no País Joven Sira-nian, PR: Governu ho Joven Sira...

TL País Joven no País Joven Sira-nian, PR: Governu ho Joven Sira Presiza Kompleta Malu

293
0
estudante no jovem sira iha loron masakre Santa Cruz. [Foto: Media PR | 12.11.2020]

Reportazen Zevonia Vieira

“Ha’u haksolok ho joven sira-nia inisiativa oioin, sira-nia determinasaun no dedikasaun atu dezenvolve ita-nia rain. Sira ne’ebé mai husi jerasaun joven, sobrevivente husi masakre 12 Novembru no joven sira ohin loron nian, ne’ebé hatudu sira-nia espíritu solidariedade iha tempu luta, ohin loron hatudu mós sira-nia matenek”. Lu OLo

Jovem nia kontribuisaun ba ukun rasik-an hatudu nia valor boot duni ba rai ida ne’e, sira hili lakon titlu duke lakon patria. Masakre Santa Cruz 12 Novembru 1991, sai istoria boot ne’ebe rekonnese iha mundu tomak, oinsa papel jovem sira iha tempu uluk hatudu nia sira aten brani, hodi defende direitus umanus.

Liu hosi komemorasaun Masakre Sant Cruz, Prezidente da Republika, Dr. Francisco Guterres Lu Olo hatoo diskursu katak Timor-Leste hanesan País joven ida no País joven sira-nian, katak maioria populasaun iha idade 35 ba kraik. Realidade demográfika ida ne’e hatudu katak joven sira forsa boot no importante iha ita-nia rain.

Nune’e Prezidente Lu Olo dehan Juventude Lorico Aswa’in iha knaar importante oioin, atu hala’o iha ita-nia prosesu dezenvolvimentu nasional. Joven sira bele dezenvolve ita-nia rain atu sai di’ak. Maibé dezempregu aas tebes iha ita-nia rain. Maioria joven sira labele servisu tanba la iha servisu. Servisu iha rai-liur la’ós solusaun di’ak liu atu rezolve problema dezempregu iha ita-nia rain. Situasaun ida ne’e hori uluk kedas ho ninia kauza rasik. Governu tenke kria kondisaun, atu hamosu empregu iha rai-laran iha territóriu tomak.

Prezidente fo atensaun ba Estadu tomak, liuliu governu iha obrigasaun atu buka, identifika no koloka joven sira iha área oioin, tuir sira-nia kapasidade. Governu tenki fasilita joven sira, hodi sira bele envolve-an iha Timor-Leste nia prosesu dezenvolvimentu.

Maibé Lu Olo hatutan, governu mesak de’it lato’o,  governu hala’o ninia parte no joven sira mós tenki hala’o sira-nia parte. Governu nia esforsu ho joven sira-nia inisiativa no servisu presiza hasoru malu iha pontu ida no kompleta malu. Hamutuk ita bele hakaat ba oin no atinji ita-nia objetivus ba dezenvolvimentu nasional.

Iha okaziaun refere, Prezidente Repúblika  apela ba jovem 12 de Novembru no joven sira hotu, hodi hanoin, diskute no debate hamutuk halo nusá ita bele transforma ita-nia sosiedade.

Hanesan Prezidente da Repúblika, “ha’u haksolok ho joven sira-nia inisiativa oioin, sira-nia determinasaun no dedikasaun atu dezenvolve ita-nia rain. Sira ne’ebé mai husi jerasaun joven, sobrevivente husi masakre 12 Novembru no joven sira ohin loron nian, ne’ebé hatudu sira-nia espíritu solidariedade iha tempu luta, ohin loron hatudu mós sira-nia matenek no dedikasaun atu serví sira-nia maluk joven seluk no ita-nia sosiedade tomak.

Liu hosi diskursu Prezidente Republika hatudu ezemplu ida mai hosi Sérgio Filomeno Marques “Amali”, sobrevivente husi Masakre Sta. Cruz ne’ebé iha momentu ne’ebá, hatudu ninia aten- barani no solidariedade boot ba ninia maluk joven seluk.

Amali ohinloron sai símbolu ida Massakre 12 Novembru nian, tanba iha momentu difísil los, enkuantu kilat tarutu iha nia sorsorin no fo’o ameasa ba nia vida rasik, nia latauk no la hanoin atu halai, maibé nia tuur ko’us nia maluk jovem ida seluk ne’ebé kanek todan, Leví. Bainhira ita rona iha vídeo ne’ebé belun Max Stall hasai, Leví hakilar tanba sente moras ho nia kanek sira, no hatudu hanesan nia atu lakon esperansa, Amali fo’o korajen ba Leví, konsola nia katak buat hotu sei di’ak, fo’o korajen ba Leví atu kontinua persiste. Hanesan fali atu fo’o mensajen ba Leví, labele lakon esperansa tanba Timor-Leste atu ukun rasik an ona, Amali rasik sei iha forsa atu salva nia an, maibé nia deside hela ho Leví maski nia hatene konsekuénsia ne’ebé nia sei simu bainhira militar Indonéziu kaer nia. Amali ho Leví sobrevive masakre ida ne’e.

Tinan 29 liu tiha, Amali la tuur hikar liman hare’e joven sira no ninia maluk Timoroan sira seluk. Ohin loron, Amali kontinua halo servisu hanesan Sekretáriu Jeral Komité 12 Novembru, tau matan no presta servisu ba ninia maluk sobrevivente  sira seluk husi 12 Novembru. Se tinan 29 liubá Amali konsege tulun Leví, ohinloron Amali halo servisu atu kontinua halo buat ruma ba maluk sira, sobrevivente sira no mós ba sira ne’ebé mate no sira-nia família.

La’ós ida ne’e de’it, Amali ohinloron hala’o knaar nu’udar jestor ba Centru Juventude Becora. Centru ne’ebé presta servisu importante lubuk ida ba ita-nia joven sira ohinloron, hahú husi formasaun ba abilidade moris nian, formasaun língua oioin no komputador to’o fasilita joven sira hatudu sira-nia talentu no kapasidade iha área oioin.

“Ita-nia Nasaun ida ne’e joven, ho maioria populasaun joven. Prezidente Repúblika apela ba parte hotu-hotu atu servisu hamutuk, kria espasu ba joven sira atu esplora sira-nia potensial, fó-sai sira-nia talentu no kapasidade iha área oioin atu dezenvolve ita-nia rain”, hateten Lu Olo

Tinan rua nulu resin sia liubá, foin-sa’e sira see sira-nia hírus matan ba kilat no ajuda loke mundu nia matan ba Timoroan sira-nia lalerik no luta ba Ukun Rasik An. Ohinloron, Prezidente Repúblika fiar katak foin-sa’e sira bele sai Forsa  boot ida ne’ebé bele hamosu kriatividade oioin atu solusiona problemas no preokupasaun sira ne’ebé ita-nia Rain no ita-nia Povu hasoru.

Prezidente Republika konklui katak ak Juventude bele ajuda Estadu hetan solusaun ba problema hotu-hotu ita hasoru ohinloron. Juventude bele ajuda Governu implementa Planu Rekuperasaun Ekonómika.

Print Friendly, PDF & Email

LEAVE A REPLY

Please enter your comment!
Please enter your name here