Reportazen Santina Lucia da Costa
Iha loron moris Asosiasaun Jornalista Timor Lorosa’e (AJTL) ba dala 21, ne’ebe monu iha loron 22 Dezembru, realiza seminariu ho tema Jurnalismu Entre Dezafius ho Oportunidade. Liu hosi abertura Prezidente AJTL, Zevonia Viera hateten serbisu boot ida ne’ebé mak AJTL halo maka kontra Esbosu Lei kriminaliza defamasaun ne’ebé maka Ministeriu Justisa halo, AJTL konsege hamutuk iha movimentu ida iha Sosiedade Sivil sira hanesan HAK, AJAR, JSMP ho Universidade sira hamutuk halo movimentu maka’as hodi kontra esbosu lei kriminaliza defamasaun, no konsege hetan resposta husi Ministeriu Justisa katak sira la fó prioridade ba lei ida ne’e.
Prezidente AJTL haktuir prinsipiu AJTL nian maka kontinua luta ba liberdade imprensa no espresaun, ne’e sai hanesan natureza AJTL nian ne’ebé mak fundadór sira hamosu ona, ita tenki orgullu tanba fundador sira harii deklarasaun turizmu iha 22 Dezembro 199, ne’ebé maka tau ona iha konstituisaun RDTL, artigo 40-41 kona-ba liberdade imprensa no espresaun.
Zevonia Vieira husu ba membru AJTL sira, liu-liu jornalista sira kaer nafatin prinsipiu jurnalizmu, kodigu etika no labele halis ba interese grupu nian, hodi hafoer ita nia prinsipiu jurnalismu nian no kontinua hatudu kualidade hosi publikasaun no kritiku konaba lalaok serbisu governu nian hodi responde preokupasaun povu nian
“Ita labele foka de’it ba isu politik ne’ebé maka atu hatun malu, maibé issue importante sira konaba povu nia moris, agrikultura, saude, eskola no seluktan ne’ebe infrenta tebes povu nia moris, ida ne’e sai baze importante liu ba jornalista sira hodi foti”, hateten Zevonia iha salaun CNC, 22/12.
Prezidente AJTL mós enkoraja membru AJTL sira katak lia-loos sei la mate, lalika tauk koalia lia-loos no kontinua influensia ita nia governu, atu labele kriminaliza defamasaun no partisipa iha diskusaun nakloke sira ne’ebe AJTL realiza, hodi bele aumenta ita nia konnesementu
Iha fatin hanesan estudante Departamentu Komunikasaun Sosiál, Universidade Nasional Timor-Lorosa’e (UNITAL), João Bosco hateten hanesan estudante komunikasaun sosiál hakarak mai partisipa iha seminariu nasional ne’e, tanba hakarak atu aprende no hetan informasaun ruma ne’ebé importante bazeia ba funsionamentu jurnalizmu liga ho situasaun rai laran ne’ebé maka oras ne’e dadaun lao ladun di’ak.
João Bosco hatutan informasaun sira hanesan ne’e bele eleva nafatin ba jornalista sira hotu, hasae koñesimentu atu bele hato’o lia-loos ba sosiedade.
“Seminariu ne’e, Buat ne’ebé mak sai referensia, importante mai hau mak kona-ba merkadu mídia, dezafius jornalista sira bainhira ba kobertura, nune’e mós kona-ba linguistika, oinsa jornalista hakerek notisia ida hakerek tuir padraun ortograria tetun nian ka tetun INL nian”, hateten, João Bosco.
João Bosco rekomenda ba AJTL atu atividades sira hanesan ne’e laos de’it halo konsentrasaun iha nasional maibé bele mós loke ba area rurais sira, hodi nune’e komunidade sira mós bele komprende lolos serbisu jurnalizmu nian.
