Home Notisia Jovem Iha Aldeia Porlamano Kria Spot Photo Iha Parke Nasional Nino Konis...

Jovem Iha Aldeia Porlamano Kria Spot Photo Iha Parke Nasional Nino Konis Santana

2204
0
Spot Photo iha Porlamano Mehara. [Foto: copyright jovem Porlamano | 04.01.2021]

Reportazen Adroaldo ‘Saretukau’

Juventude aldeia Porlamano, Suku Mehara, Postu Administrativu Tutuala, Munisipiu Lautem ho inisiativa rasik halo kreatividade spot photo no konservasaun ambiente, iha parke nasional Nino Konis Santana.

Xefe Aktividade Juventude Aldeia Porlamano, Florençio de Almeida ba Neon Metin hateten, aktividade ida ne’e envolve hosi juventude rasik ho kreatividade ne’ebé sira iha.

“Aktividade ne’e envolve husi juventude hotu-hotu ne’ebe hela iha aldeia Porlamano. Aktividade kreatividade konabá spot photo no halo konvervasaun ambiente liu hosi kuda ai-oan,” dehan Xéfe aktividade Florençio ba Neon Metin via e-mail, domingu, 03/01.

Xéfe aktividade aldeia Porlamano ne’e dehan objetivu hosi aktividade ne’e mak atu halibur juventude sira, hodi promove sira nia talentu no kreatividade nomos promove ekoturizmu iha parke asional Nino Konis Santana.

“Objetivu hosi aktividade ne’e mak hodi esplora potensia área turizmu, atu valoriza no promove ekoturizmu iha Parke Nasional Nino Konis Santana nomos halo konservasaun ba biodiversidade iha Parke Nasional,” tenik Florençio.

alein de ne’e, nia dehan atu hametin no halibur juventude, atu promove sira nia ideia, talentu no kreatividade tanba juventude mak autor ba dezenvolvimentu.

Florençio hateten aktividade ne’e la hetan apoiu hosi governu ka NGO ruma, maibé ida ne’e inisiativa hosi juventude aldeia Porlamano rasik mak organiza malu hodi kontribui sira nia tempu hodi realiza aktividade ne’e.

Xéfe Juventude aldeia Porlamano ne’e mos sente kontente kontribui ba aktividade iha sira nia rai rasik tanba partisipasaun juventude mak lori dezenvolvimentu.

“Senti kontente hodi kontribui ba komunidade liu-liu aldeia Porlamano, tanba ita nia rai presiza duni joven sira nia partisipasaun ba dezenvolvimentu komunitáriu. Joven sira ne’ebé partisipa maske isin bele makerek hanesan kriminozu maibé kakutak nakonu ho kreativu,” dehan Florençio via e-mail, 03/01.

Iha fatin hanesan Xéfe aldeia Porlamano, Patriçio da Costa Hornay hato’o sentimentu ksolok ba aktividade kreativu ne’ebé nia juventude sira halo ona.

“Ha’u sente kontente tebes ho inisiativa ne’ebé juventude sira halo ona iha área Parke Nasional, tanba ha’u fiar liu husi aktividade  ida ne’e, sira bele kria rasik servisu ba sira nia aan no hamenus ona dezempregu iha aldeia no komunidade laran,” hateten Xéfe aldeia Porlamano Patriçio via e-mail, domingu, 03/01.

Nia dehan autoridade lokal liu-liu xéfe aldeia no juventude sira iha koordenasaun di’ak tebes, tanba joven sira sempre halo konfirmasaun no hato’o sira nia preokupasaun bainhira hala’o aktividade refere.

Nia konklui katak buat ne’ebé grupu jovem sira hala’o ne’e la hamosu problema no impaktu negativu ba sosiedade,  no bele kontinua nafatin ba oin tanba ida ne’e parte hosi dezenvolvimentu.

Print Friendly, PDF & Email

LEAVE A REPLY

Please enter your comment!
Please enter your name here