Home Feature Moris Agrikultor La fasil Maibe Iha Valor Boot, Miguel: Hau La Tane...

Moris Agrikultor La fasil Maibe Iha Valor Boot, Miguel: Hau La Tane Liman Ba Ema

1441
0
Miguel de Jesus Gusmao nudar agrikultor. [Foto: Bernarda da Costa | 14.02.2020]

Kontributor Bernarda da Costa

Moris nudar agrikultor identic ho povu maubere, tanba maioria povu maubere nia moris hosi agrikultura hahu hosi beala nia tempu to’o ohin loron.

La hare ba idade, dala barak inan-aman sira ne’ebe komesa ferik no katuas, maibe sira nia knaar nudar agirkultor la ses hosi sira nia isin lolon.

Ida mak Miguel de Jesus Gusmao, moris nudar agrikultor, hakiak animal iha tinan naruk nia laran, ne’ebe ohin loron hatudu valor boot bai ha nia uma laran.

Miguel Moris iha Laleia, Municipio Manatuto iha loron 18 Maio 1949 ho nia fuan sorin Cristina Gusmao la sente koleng hodi halao vida agrikultor, ho nune’e bele sustenta sira nia oan hamutul nain hitu, feto ida no mane neen.

Ba jornalista Miguel konfesa katak halao vida nudar agrikultor hasoru difikuldade barak iha moris, tanba deit atu resolve nesesidade familia nian, ne’ebe ikus mai bele hetan susesu iha moris, maske suses la mai ho matenek, maibe susesu liu hosi vida agrikultor.

 “Rezultado husi halai natar ho hakiak animal, mak hau mos eduka oan sira nia eskola, husi banku primaria to’o banku universitario no mos  hola  motor ida-idak, fahe hotu ba oan sira hodi uza ba eskola”, dehan Miguel.

Miguel hatutan susesu ne’ebe nia hetan, hahu hosi karau inan rua, ne’ebe nia hakiak iha kedas tinan 1984 ne’ebe fo jerasaun barak to’o ohin loron.

“Iha tinan 2016 hau hola karreta truck ida ho folin 17.500, ida ne’e mai husi karau nia folin ne’ebe mak hau fa’an , no husi fali servisu truck ida mak hola tan kareta truck ida, mak hamutuk karreta rua” informa Miguel.

Servisu kareta rua nian aumenta tan ho rezultadu natar ne’ebe mak iha, hodi hadia fali uma bo’ot ida ho kuartu 9.

“Hau mos servisu hanesan ema agrikultor ida ,maske hau katuas ona, maibe hau sei nafatin forsa hodi hala’o nafatin servisu, tanba hau iha hanoin no prinsipiu katak wainhira hau nia liman ain ne’ebe mak Maromak fo sei kompletu no forsa hela,  hau sei latane liman ba ema seluk. Tinan ida hau sempre halai natar kabubu 10,no rezultado ikus husi natar, balun hau fa’an ,no balun rai hodi bele sustenta kabun loron- loron nian”, tenik Miguel.

Lia fuan motivasaun ne’ebe Miguel fahe katak susesu ne’ebe mak ita hakarak, tenke mai ho badinas, tanba bainhira laiha badinas no pasensia maka sucessu sei la mai.

Dalan barak atu hakat ba Roma, agrikultura dalan ida ne’ebe mak hatudu ona valor boot ba ema ida nia moris no kontinua ba uma laran tomak. Vida agrikultor nudar knaar ida ne’ebe fo valor boot ba ema nia moris.

*[Bernarda da Costa, hakerek nain nudar estudante UNTL ne’ebe tuir jurnalismu klinika, Kooperasan entre UNTL-UNESCO. Rezultadu hosi kursu ne’e mentor publika nia artigu iha Neon Metin]

 

 

LEAVE A REPLY

Please enter your comment!
Please enter your name here