Reportajen Zevonia Vieira
Enkarregadu Negósiu EUA Tom Daley hamutuk ho Komandante Jerál Tenente Jenerál Falur Rate Laek, Adjuntu Komandu Jerál Ezérsitu Pasífiku EUA Major Jenerál Reginald Neal ho autoridade lokál sira loke Ezersísiu “Dalan ba Dame” ba Datoluk, nu’udar ezersísiu militár bilaterál ho nia objetivu haforsa kooperasaun no amizade entre forsa armada EUA ho Timor-Leste.
Guarda Nasionál Rhode Island sei partisipa iha ezersísiu ne’e primeira-vez, bazeia ba Programa Parseria Estadu ne’ebé foin dadauk asina entre Timor-Leste ho Rhode Island. Iha semana rua nia laran tuir mai, membru husi forsa armadas rua ne’e sei dezenvolve relasaun no hametin sira nia abilidade iha kuidadu saúde, navegasaun rai, tátiku unidade kiik, no enjiñaria.
husi komunikadu imprensa ne’ebe Neon Metin asesu esplik Ezersísiu “Dalan ba Dame” nu’udar testemuña ida ba relasaun amizade, parseria, no oportunidade ne’ebé dura ne’ebé metin liután bainhira nasaun sira hamutuk ba objetivu komún ida. Hamutuk, EUA ho Timor-Leste sei kontinua serbisu hamutuk, fahe esperiénsia no rekursu hodi hatán ba dezafiu komún no promove estabilidade rejionál.
“Ami nia esperansa katak la’ós haforsa de’it ita nia militár, maibé mós ita nia abilidade hodi serbisu hamutuk no fornese dalan hodi hjadi’ak liután povu Timoroan nia moris,” dehan Enkarregadu Negósiu Tom Daley iha ninia diskursu. “Ba primeira-vez Guarda Nasionál Rhode Island mós partisipa iha ezersísiu ida ne’e, kria oportunidade liután ba kolaborasaun iha future.”
Atinjimentu ida ne’e marka progresu ne’ebé kontinua la’o dezde inaugural Ezersísiu “Dalan ba dame” refleta kompromisu hamutuk hodi defende demokrásia no Liberdade loloos, no mós promote dame globál. Ezersísiu ida ne’e sei harii kapasidade tantu forsa rua ne’e hotu no asegura future ida ne’ebé di’ak liu ba povu Timoroan no Amerikanu sira.
Iha fulan Juñu 2023, Forsa Aereu EUA distribui F-FDTL nia aviaun Cessna dahuluk ho sistema ISR ka sistema intelligénsia, vijilánsia no rekoñesimentu hodi habelar tan Timor-Leste nia forsa marítima nia kapasidade ba vijilánsia nian, hodi asegura protesaun ba teritóriu bee, no salvaguarda rekursu marítima sira ne’ebé mak importante. Estadus Unidus orgullu hala’o parseria ho Timor-Leste, enkuantu enfatiza mós apoia ba estadu ida ne’e nia soberanu, seguransa no prosperiedade.
