Home Analisa Atu Ba Ne’ebé Ita?

Atu Ba Ne’ebé Ita?

325
0
Hakerek nain Pierre Jacobs. [Foto: Dokumentu privadu | 04.01.2021]

Hakerek nain Pierre Jacobs

Saída mak importante liu iha mundu? Kada ema ida-idak la hanesan. Ba estudante ka universitáriu sira, dala ruma primeiru liu mak estuda no remata estudu, tuir mai sira hakarak servisu ka halo negósiu no forma família no ba nafatin. Ba sira ne’ebé remata universidade no servisu ona, bai-bain hanoin servisu ne’ebé di’ak liu ka kareira ne’ebé di’ak liu, no hafoin hakarak iha parseiru moris no ba nafatin. Ba sira ne’ebé forma ona família (Kabe-na’in sira), hakarak iha oan, no hakarak oan atinji nia kondisaun hanesan ho ita, karik bele di’ak liu. No sírkulu ne’e sai hanesan sírkulu moris nian, ne’ebé sai mehi kada ema ohin loron. Maibé ida ne’e los? Los duni ida ne’e mak ita nia objetivu prinsipal? Los duni ida ne’e mak tenki sai ambisaun kada ema ida-idak? Dala ruma ona ita halo pergunta, saída mak NA’I hakarak los? Tebes duni NIA hakarak ita atinji hirak ne’e? NIA hakarak mai ita iha servisu? Iha edukasaun, iha uma-kain, ka atu tau-matan ba ita nia oan?

Dala ruma ita husu tan, tanba sa tenki MAROMAK? Relasaun saída ho kareira, edukasaun no ita nia família. Ha’u reja ona no tuir selebrasaun natoon domingu-domingu.

Salmo 24 hateten MAROMAK mak na’in mundu nian no buat hotu iha nia laran, ho ema ne’ebé moris iha mundu ne’e. Tanba NIA mak hatuur buat hirak ne’e iha tasi leten no harii iha mota sira leten. “Se los mak bele sa’e ba NA’I MAROMAK nia foho santo? Se los mak bele hamriik iha NIA fatin ne’ebé lulik? Ema ne’ebé liman mos no laran mos, nia la fo aan ba lia bosok, no la jura falsu. Nia mak sei simu Grasa hosi MAROMAK no lia-los hosi AMAN MAROMAK ne’ebé soi nia.

Salmo 24 ne’e mak fo hanoin ha’u katak MAROMAK mak na’in ba mundu ne’e, no buat hotu ne’ebé iha nia laran. Importante tebes mai ha’u hodi halo tuir NIA hakarak. Hanesan mos ita, se ita hela iha nasaun ida, presiza halo tuir norma ka regra ne’ebé vigora iha nasaun refere, se lae ita bele hetan deportasaun hosi nasaun refere, tan la kumpri regra ne’ebé iha. Se iha nasaun ida ita bele subar no taka ita nia sala sira, ba MAROMAK la iha buat ida mak subar. Buat hotu MAROMAK hatene. No atu halo tuir NIA hakarak la to’o atu ho hanoin de’it. Ita tenki hatene ho lolos MAROMAK nia hakarak iha ita nia moris ne’e saída? No atu hatene oinsá moris mos ho los, mak ho de’it lee no estuda NA’I MAROMAK nia lia-fuan. MAROMAK nia lia-fuan mak regra, lia-fuan sira, orden, mahusuk, hakarak sira no signifikadu MAROMAK iha ita nia moris ne’ebé hakerek iha livru ne’ebé ha’u fiar mak Bíblia.

Ida ne’e importante tebes, tanba MAROMAK ho ita iha ita nia moris lor-loron nian no ita tenki hatene uluk MAROMAK nia lia-fuan, mak ita nia moris sei hetan tulun hosi NIA. Maibé ida ne’e mak ita nia rajaun prinsipal hodi estuda MAROMAK nia lia-fuan, klaru katak lae. Sei iha buat barak iha Bíblia ne’ebé ajuda ita hala’o moris ne’e. Hahalok moris nian, ita nia relasaun ho oan, ita nia relasaun ho ema seluk, no seluk tan. No sei iha duni besaun domin no salvasaun hosi MAROMAK, ita bele aproveita se ita estuda ho laran ho lolos no tuir NIA hakarak.

Mai ita aproveita tempu iha mundu ne’e ho di’ak tuir NIA hakarak.

Print Friendly, PDF & Email

LEAVE A REPLY

Please enter your comment!
Please enter your name here