Home Notisia Dr.Rui: Lei no.10/2004 fo Autoridade ba MS, Tan Sa Tribunal Dehan Inkonstitusional?

Dr.Rui: Lei no.10/2004 fo Autoridade ba MS, Tan Sa Tribunal Dehan Inkonstitusional?

830
0
Dr. Rui Maria Araujo. [Foto: Copyright FB Dr. Rui Araujo | 04.04.2020]

Reportazen Zevonia Vieira

Prezidente Republika veta tiha ona Dekretu Lei konaba Rejime Juridiku ba Vijilansia Epidemiolojika no Vijilansia Sanitaria.  Mosu preokupasaun karik bele akontese Covid-19 iha transmisaun komunidade, tanba Ministeriu Saude labele obrigada ema tama kuarentena. Neon Metin halo konfirmasaun ho eiz Primeiru Ministru, Dr. Rui Araujo via messenger konaba asuntu ne’e no nia hatete katak auzensia hosi Dekretu Lei ne’e bele fasilita transmisaun iha komunidade.

“Transmisaun iha komunidade seidauk iha, maibe wainhira Prezidente da Republika veta decreto-lei nebe fo’o autoridade ba Ministério Saúde, atu obriga ema halo kuarentena wainhira mai husi rai ne’ebe afetadu, ida ne’e fasilita tebes transmisaun Covid 19 iha komunidade nia le’et. Tamba bele akontese ema ruma asimtomatiku, maibe la tama kuarentena no hahu transmite moras ne’e iha komunidade,” hateten Dr. Rui Araujo via messenger ba Neon Metin, 28/07.

Dr. Rui Araujo hateten tuir análise Prezidente da Republika no Tribunal Rekursu, atu obriga ema tama kuarentena ka hatama ema ba izolamentu ka obriga ema uza maskara, ne’e karik hanesan limita ema nia direitu no Liberdade,a tenki aprova liu husi Lei Parlamentu Nasional nian.

Dr. Rui hateten Maibe Lei 10/2004 kona ba sistema saúde, ne’ebe aprova iha Parlamento iha tinan 2004, iha ninia artigu 11, fo autoridade ba Ministeriu Saude atu foti medidas esesionais. Tamba nee maka Governo aprezenta Dekretu-Lei kona ba medidas esesionais, inklui medidas hanesan kuarentena, izolamentu, uza maskara no seluktan

“Se dehan nee illegal ka inkonstitusional signifika tenki hein Lei ida husi Parlamentu Nasional. Signifika mos sidadaun sira nebe tama husi fronteira, bele rekuza halo kuarentena no sira nebe desde kedas 27 Junho 2020 iha loron-ikus Estadu Emergência, Ministeriu Saúde obriga ba kuarentena iha Tasi Tolu no Tibar bele lori Governu ba Tribunal, tamba viola ona sira nia direito no Liberdade. Maibe, perigo bo’ot liu ba saúde publika, maka ema mai husi rai afetado, la kohi halo kuarentena voluntária, asintomatiku no hahu halo transmisaun iha komunidade nia le’et. Wainhira hahu ona transmisaun iha komunidade, sei susar tebes atu bele kontrola”, hateten Dr. Rui.

Maibe Dr. Rui mos dehan Lei 10/2004, artigu 11 alinea 4 foo ona autoridade ba Ministeriu Saude atu foti medidas esesionais. Alinea 5 iha artigu hanesan mos dehan lei mak sei regula, maibe Dekretu Lei ne’e mos lei ida, tan sa dehan inkonstitusional?

Komunikadu Imprensa Palasiu Prezidensia da Republika nian hatete katak Prezidente da Republika, Dr. Francisco Guterres Lu Olo veta Dekretu Lei konaba Rejime Juridiku ba Vijilansia Epidemiolojika no Vijilansia Sanitaria tanba la hatuir Konstituisaun RDTL, Tuir dekretu Lei nebe hetan veta iha Alinea iha artigu 6, alíneas b) no o) iha n.o 1, artigu 115.o husi Konstituisaun RDTL no mós ba artigus 10.o e 11.o husi Lei n.o 10/2004, 24 Novembru (Lei kona-ba Sistema Saúde), Konsellu Ministrus aprova iha 17 Juñu liubá, Dekretu-Lei kona-ba Rejime Jurídiku ba Vijilánsia Epidemiológika no Vijilánsia Sanitária. Ho Dekretu-lei ne’e Governu hakarak hatuur regras kona-ba oinsá proteje no promove saúde públika liuliu kona-ba moras sira ne’ebé hadaet husi ema ba ema (infeto-kontajiosa).

Komunikadu Imprensa ne’e mos esplika katak Governu haruka diploma ne’e mai Prezidente Repúblika iha 25 Juñu 2020. Prezidente Repúblika entende katak artigu barak iha diploma ne’e, la hatuir Konstituisaun RDTL. Tanba iha dúvida, Prezidente da Repúblika haruka diploma ne’e ba Tribunal Rekursu hodi halo fiskalizasaun preventiva konstitusionalidade katak instansia ne’e presiza haree uluk se diploma ne’e tuir ka lae Konstituisaun RDTL, iha artigu 85.o, alínea e), iha artigo 149.o, n.o 1, conjuga hamutuk ho artigu 164.o no artigu 126.o, n.o 1, alínea b).

Prezidente da Repúblika husu atu haree didiak diploma husi Governu iha artigu tuir mai, artigu 16 kona-ba vijilánsia ba kontaktus iha komunidade (lahatete loloos sá medida “restrisaun sosial” mak foti), medida vigilánsia sanitária ordinária kona tratamentu obrigatóriu previstu iha artigu 25.o, medidas vijilánsia sanitária estraordinária previstu iha artigu 27.o (obrigadu sulan-an iha uma iha áreas afetadas; konfinamentu obrigatóriu ba grupu ema iha lokal, edifísiu ka meius transporte; serka sanitária sira; rekizisaun beins, estabelesimentus, servisus no profissionais saúde),deklarasaun grave emerjénsia saúde pública prevista iha artigu 28.o no medida restrisaun ba sirkulasaun iha luron ne’ebé bele akompaña mós ho kuarentena obrigatória no serka sanitária previstu iha artigu 29.o. Prezidente Repúblika hatán ba Governu katak medidas iha Dekretu-Lei ne’e limita direitus, liberdades no garantia ne’ebé Konstituisaun RDTL fó ba ema ne’ebé tuir loloos Parlamentu Nasional mak iha kompeténsia ba halo ida ne’e la’ós Governu.

Tribunal Rekursu, liuhusi akórdaun fó -sai iha 22 jullu 2020, entende katak Dekretu-Lei ne’e atu limita direitus, liberdades no garantias fundamentais ema nian no afirma katak la’ós Governu mak iha kbiit atu regula asuntu ida ne’e liuhusi Dekretu-Lei. Órgaun soberania ne’ebé iha kbiit ba limita direitus, liberdades no garantias fundamentais mak Parlamentu Nasional. Parlamentu de’it mak bele regula liuhusi lei.

Haree ba Akórdaun no mós ba númeru 4 hosi artigu 88, no númeru 3  hosi artigu 149 Konstituisaun, Prezidente Repúblika veta juridikamente Dekretu-Lei katak Diploma ne’e la hatuir Konstituisaun. Iha 24 Julhu 2020, Prezidente Repúblika fó filafali ba Governu atu haree prosedimentu legál seluk ba asuntu sira temi iha Dekretu-lei, tuir Akórdaun husi Tribunal Rekursu haruka.

Pandemia Covid-19 sei la’o nafatin no sei aas no nune’e, ita-nia país sei nafatin iha situasaun risku aas tebes no tanba ne’e, Prezidente Repúblika konsidera importante tebes katak Governu promove no foti medidas ba proteje no garante saúde públika.

Print Friendly, PDF & Email

LEAVE A REPLY

Please enter your comment!
Please enter your name here