Home Notisia Aniversariu Tatoli,IP Ba Dahaat, MAPKOMS: Hatoo Liafuan Murak Ba Povu, Tenke Kredibel...

Aniversariu Tatoli,IP Ba Dahaat, MAPKOMS: Hatoo Liafuan Murak Ba Povu, Tenke Kredibel no Imparsial

593
0
Ekipa Tatoli,IP. [Foto: Copyright dokumentu Tatoli,IP | 28.07.2020]

Reportazen Santina Lucia da Costa

Ajensia TATOLI,IP, nudar ajensia ofisial estadu Timor-Leste nian. Ezistensia Ajensia Tatoli,Ip, mai husi inisiativa governu liuhusi Sekretariu Estadu Komunikasaun Sosial iha 2012-2017 no Tatoli,Ip nudar transformasaun husi East Timor News Ajency, (ETNA) depois nakfila ba Ajensia Notisioza Timor-Leste (ANTIL).

Iha loron aniversariu Tatoli.IP ba dala haat nian, Ministru Asuntu Parlamentar no Komunikasaun Sosial (MAPKOMS), Francisco Martins, D.C. Pereira Jeronimo hateten Tatoli,IP lao ba oin laos mesak, governu sei hamutuk ho ita boot sira, tau matan nafatin, apoiu nafatin atu to’o ita boot sira nia mehi ne’ebe tau ona iha ita boot sira nia vizaun.

“Tatoli,IP eziste, atu hato’o duni liafuan murak, liafuan di’ak ba povu, Timor-Leste no ba mundu, maibe nafatin iha koridor ida katak, liafuan ka mensajen notisia ne’ebe barak hanesan, tenki kredivel, loos maibe tenki hatene imparsial, labele halis ba halis mai, labele afavor ba A ka B katak objetividade ne’e tenki iha, saida mak los no saida mak sala, sala”, hateten Francisco Martins, D.C. Jeronimo iha nia diskursu iha Salaun Ian Martin, INFORDEPE, Balide, loron, 27/7.

Francisco Jeronimo dehan Tatoli,IP hanesan ajensia estadu ninian, governu sei la taka matan, MAPCOMS koalia  ona ho Vise Primeiru Ministru no Ministru Planu Estratejiku e Ordenamentu konaba future infrastrutura Tatoli,IP ho RTTL,ep nian, hodi nune bele iha kondisaun diak, atu halo knaar diak liutan.

Iha fatin hanesan Sekretariu Estadu Komunikasaun Sosial (SECOMS), Mericio Juvinal dos Reis Akara hateten hanesan SEKOMS kontente ho ita boot sira nia obra, kapasidade ho ita boot sira hotu ema 42.

“Hau kontenti ho ita boot sira nia vizaun, ne’ebe hateke ba dook, ita preokupa ita nia situasaun dadaun, uza ita boot sira nia tempu hateke ona ba dook, tinan 10-20 ne’ebe atu mai, ita boot sira haree hetan ona”,  hateten SEKOMS, Mericio Juvinal dos Reis Akara

Akara dehan agora iha ona era digital, ne’ebe Tatoli, Ip, aproveita ba plataforma oioin, tenki kontinua aprende tan, dezenvolve tan plataforma sira seluk, para ita aproveita duni era dijital ne’e ho masimu,

Entretantu Prezidente Ajensia Tatoli,IP, Jose da Costa, hateten Tatoli,IP ohin selebra tinan 4, maibe entermus de funsionamentu ita bele dehan foin tinan 1 ho balun, tanba iha tinan 1 ho balun mak ita nia estrutura iha fatin,  iha redasaun ne’ebe mak funsiona ho di’ak no kobertura di’ak teb-tebes.

“Entermus de ita kompleta ona tinan 4, maibe ita senti katak, buat barak ne’ebe halo, pratikamente iha tinan 4 ne’e, iha dezafiu, maibe iha mos oportunidade ne’ebe ami aprende, ami foti lisaun barak husi ami nia jornada sira, ida mak oinsa diskusaun ne’ebe difisil maibe ultrapasa. Kuandu ita iha ona ekipamentus, fasilidade no rekursu umanus di’ak, ita bele aproveita depois halo milhoramentu komunikasaun”, hateten Jose da Costa.

Jose akresenta membru governu ne’ebe tutela defini ona, harii edifisiu ida ba RTTL,EP ho Tatoli,IP, junta hamutuk de’it iha fatin ida iha Aimutin, ba ami hanesan Jestor iha Tatoli, Ip, ami senti di’ak, ne’e oportunidade ida, maibe ami labele hein edifisiu, maibe ami tenki funsiona, ami tenki hahu kontinua atividade publikasaun sira dadaun, maksimiza saida mak ami iha.

Ajensia Estadu ne’e, hetan aprovasaun husi iha Konsellu Ministru no publika iha Jornal Republika iha loron, 14 Marsu 2016, nu’udar embriaun ho naran ANTIL. ANTIL lansa husi Primeiru Ministru Rui Maria de Araujo iha loron 27 Jullu 2016. Iha Marsu 2017, Konsellu Ministru aprova ANTIL no ohin loron sai Tatoli,IP.

Print Friendly, PDF & Email

LEAVE A REPLY

Please enter your comment!
Please enter your name here