Home Feature Moris Hosi Hili Fatuk Mutin, Avo Maria Halo Uma Hodi Fo Mahon...

Moris Hosi Hili Fatuk Mutin, Avo Maria Halo Uma Hodi Fo Mahon Ba nia

513
0
Maria Soares de Jesus Ribeiro. [Foto: Santina Lucia da Costa | 16.02.2021]

Reportazen Santina Lucia da Costa

“Hadau malu dehan hau mak sai boot buat hotu di’ak, agora iha ne’ebé, 0.05 cen de’it mos la hetan, kaleng rohan mos la hetan”. Avo Maria

Manu komesa kokorek, fitun mos komesa taka-an no hein loro matan sae, hodi fo roman ba rai ne’e. Hena mutin falun ulun, ho kabala maske karik sente malirin oituan iha tempu udan, maibe ida ne’e la halo nia la hakat hosi nia uma laran.

Maria Soares de Jesus Ribeiro leba nia saku ho kohe mama, hodi hatutan moris liu hosi hili fatuk mutin iha tasi ibun Metiaut.

Loron komesa tiru ba kulit, kosar wen suli tun, bainhia hakruk hateke ba fatuk mutin sira ne’ebe naklekar, avo Maria nian lalatak lao tuir ritmu kontinua hili fatuk, hodi halo nakonu saku ne’ebe lori tutuir.

Jornalista Neon Metin hakarak hatene besik liu, konaba Maria nia atividade hili fatuk ne’e. Bainhira hateke besik nia oin komesa namkurut karik tanba idade, karik  most tanba serbisu ne’ebe nia halo tanba tenke habai an.

Iha dadalia ho Neon Metin avo Maria hateten nia idade tama ona 80, nia haktuir katak hafoin Timor ukun-an, nia hahu ona halao serbisu ne’e, tanba avo Maria fiar hosi pasensia hili fatuk mutin, mak nia konsege harii uma ida, hodi fo mahon ba nia hodi hela

“Hau hela iha Dili komesa Indonezia nia tempu to’o agora, depois de Indonezia fila ba nia rain, hau hela hili fatuk mutin to’o agora. loron ida konforme fatuk iha, loron ida hili fatuk saku ida mos la nakonu, hili fatuk mutin no fatuk kor selu-seluk tan, konforme ita hili”, tenik avo Maria  ba Neon Metin iha Metiaut, loron, 14/02.

Avo Maria konfesa iha tinan kotuk liu ba, ema sei hola netik, agora moras virus Corona mai tiha, igreja mos taka, ema pozitivu aumenta tan fali ona,  fatuk sira ne’e ema la hola.

“Haree de’it idade hanesan hau ne’e, hau nia maluk sira seluk fali mós mate ona, balun sei iha terus hanesan, pasiensia mate moris ho fatuk ida ne’e, maluk balun timoroan mosu mai hola netik fatuk saku ida $1.00 ka $2.00. Saku ne’e mos hola tan ema nian, saku ida $0.25 sen, loron ida ka semana mak la hola sente triste”, konfesa, Avo Maria.

Avo Maria dehan bainhira Timor ukun-an hetan, nia fase ropa de’it iha Bidau laran, loron ida fase ropa uma 5 nian, ema uma na’in fó osan Indonezia nian tempu Rp10.000, sura ba dollar hetn  $1.00.

Maria iha oan na’in 4, na’in 2 mate ho nia aman iha ai-laran iha tempu funu, nain 2 seluk agora dadaun hola ona feto no mane ona no beoan nain rua hela ho avo Maria.

Maske loron manas, rai rahun suar, laloran tasi baku ba mai, Avo Maria la sente kolen, kakorok komesa maran, hamrok no karik avo Maria komesa hamlaha tanba karik la matabisu hosi dader, maibe buat sira ne’e la halo avo Maria atu rende, karik koleng maibe avo Maria lakohi hatudu, tanba moris ne’ebe nia desidi mak hili fatuk mutin.

Ho hili fatuk mutin ohin loron avo Maria halo ona uma ida, halo Maria haksolok tanba la toba iha udan been laran.

“Hau moris ho fatuk ne’e de’it, hau halo uma ne’e tanba fa’an fatuk, estadu nunka tau matan fo netik kalen ida mos laiha”, tenik Avo Maria.

Nia dehan maske hetan osan terseira idade nia, maibe lori fulan 6 ka 7 mak hetan $180, nia sente labele halo buat ida, tanba la to’o fulan ida, osan ne’e mos mohu tanbe nesesidade ezije

Avo Maria konklui no hateten ba ulun boot sira katak, bainhira besik votasaun, sira halo kampanya hadau malu, sira halo promesa oin-oin, “hadau malu dehan hau mak sai boot buat hotu di’ak, agora iha ne’ebé, 0.05 cen de’it mos la hetan, kaleng rohan mos la hetan”.

Print Friendly, PDF & Email

LEAVE A REPLY

Please enter your comment!
Please enter your name here