Reportazen Zevonia Vieira
Relasiona ho inundasaun makaas ne’ebe akontese hosi loron 3-4 Abril no afeta ba komunidade sira nia moris, balun lakon vida no lakon sasan importante sira.
Liu hosi komunikadu imprensa Centro Integrad Jestaun Krize (CIJK) apela ba populasaun Timor-Leste tomak, liu-liu iha Dili no Munisipiu sira ne’ebé afetadu ho inundasaun iha loron hirak ne’e nia laran, ba sira ne’ebé maski lakon uma, sasan no hela fatin, no tenki evakua ba fatin publiku sira, halo favor nafatin uza meius hotu ne’ebé iha atu nafatin hado’ok-an husi kontájiu moras Covid-19, liu-liu nafatin uza maskra, no faze liman beibeik ho bee no sabaun ka dezintetante ruma.
CIJK mos husu ba populasaun ne’ebé provizoriamente tenki hela iha Centro evakuasaun sira, atu kolabora ho ekipa konjunta saúde, hodi foti amostra ba análize laboratóriu.
Ba populasaun ne’ebé la afetadu husi efeitu inundasaun, favor respeita nafatin regra sira ne’ebé Governu hatu’ur ona atu prevene moras Covid-19 da’et ba mai. Regra sira ne’e, hanesan ita hotu hatene ona tuir hanesan uza maskra, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.
