Reportazen David da Costa Gusmao*
Ministro Saude (MS) ohin loron 6 Abril rejista kazu mate COVID-19 nain ida, ne’ebe antes ne’e detekta pozitivu COVID-19 iha loron 24 Marsu tinan ne’e.
Koordenador COVID-19 Pillar VII, Dr.Nilton do Carmo da Silva esplika Timor-Leste hahu ohin rejista ona kazu mate COVID-19, hafoin hahu rejista kazu pozitivu iha tinan kotuk. Ohin loron 6 Abril tinan ne’e Ministeriu Saude no Centro Integradu Jestaun Krizi (CIJK) nia naran atu informa ba ema hotu katak ohin dadersan por volta oras tuku 7.10 Timor rejista kazu mate nain ida COVID-19.
“Historia badak kona ita nia maluk ne’ebe mate tanba COVID-19 ho sexu feto, idade 44, detekta hetan COVID iha loron 24 Marsu no halo teste swab iha loron 23 Marsu depois lori ba izolamentu Tasi Tolu, ita fo observasaun no pesoal saude halo atendementu no iha loron 4 Abril sinal hatudu sintomas, entaun kolega sira iha ne’eba halo observasaun no tuir atendementu ho padraun ne’ebe mak iha. Ho nune’e hahu ohin ita rejista ona kazu mate ida COVID-19 ho komormidade ka kroniku”, esplika Dr. Nilton ba jornalista sira iha fatin izolamento Lahane 6 Abril 2021.
Dr.Nilton haktuir serimonia funeral ba pasiente COVID-19 sei halao iha fatin designadu ne’ebe governu prepara ona iha postu administrativu Metinaro, tanba ne’e sei serbisu hamutuk ho ekipa husi Ministeriu Solidariedade Sosial no Inklusaun (MSSI) no Ministeriu Administrasaun Estatal (MAE) molok lori mate isin ba halot iha semiteriu COVID-19.
“Planu tuir fali mai, sei trata ita nia maluk nia isin mate hanesan mate ba COVID-19 tanba ne’e ita sei serbisu hamutuk ho ekipa COVID-19 no Ministeriu Saude, MSSI no MAE”, hateten Dr. Nilton
Dr.Nilton informa mos katak durante halo tratamentu, parte saude sempre infora ba matebian nia kaben no familia sira kona tratamentu ne’ebe mak parte saude fasilit no sira apar hela saida mak ekipa pesoal sira halao.
Familia hosi matebian sei partisipa iha sermonia funeral no hafoin lori fila mai iha fatin izolamentu.
*(David da Costa Gusmao nudar estudante UNTL ne’ebe halo estajiu iha Neon Metin)
