Reportazen Zevonia Vieira
Governu Portugal liu hosi embaixado Portugal iha Timor-Leste entrega apoiu umanitaria ba komunidade afetadu hosi inundasaun liu hosi Sekretariu Estadu Protesaun Sivil (SEPS).
Liu hosi entrevista Neon Metin ho Embaixador Portugal iha Timor-Leste, Jose Pedro Machado Vieira esplika katak halo tuir kontestu ne’ebe governu Timor-Leste halao, depois de inundasaun akontese, nune’e governu Portugal prontu hodi fo apoiu direita umanitaria no apoiu emerjensia ba komunidade afetadu sira.
“Komunidade sira presiza sasan sira hanesan kulusaun, sasan dapur nian no ai-han. Ida ne’e parte hosi apoiu ba dahuluk nian depois de governu deklara estadu kalamidade, governu Timor sei rezolve problema oinsa hadia fali uma sira ne’ebe hetan estragus no governu Portugal sei kontinua apoiu ba hadia infrastrutura ne’ebe at tanba impaktu hosi inundasau”, dehan Embaixador Portugal ba Neon Metin iha SEPS-Kaikoli, 09/04.
Nia hatutan apoiu refere parte hosi governu Portugal no mos komunidade Portugal sira ne’ebe hela iha Timor, halao knaar ne’ebe importante, hodi kontinua fo solidariedade no hanesan embaixador orgulhu ba komunidade Portugueza iha Timor, ne’ebe apoiu direita iha instituisaun sira iha Timor hodi responde emerjensia ba situasaun neebe komunidade Timor sira afeta.
Iha situasaun depois de akontesementu inundasaun, governu Portugal hamutuk ho profesores Portugueza sira serbisu ho Ministeriu Edukasaun, Juventude no Desportu (MEJD), hodi halao serbisu voluntariu iha centro evakuasaun sira hodi anima no hanorin labarik sira relasiona ho kuktura no materia sira seluk, tanba labarik sira mak hetan afetadu boot liu hosi dezastre naturais ne’ebe akontese
Nia dehan hosi esforsu no apoiu hirak ne’e, governu Portugal parseria ho agensia UNDP ho Unicef hodi fo apoiu umaniataria liu hosi Sekretaria Estadu Protesaun Sivil
