Home Analisa Alargamentu Konstrusaun Edifisiu Kuartel Jeral PNTL

Alargamentu Konstrusaun Edifisiu Kuartel Jeral PNTL

527
0
hakerek nain Jemicarte Moniz dos Reis. [Foto: Dokumentu privadu | 29.12.2020]

Hakerek Husi Jemicarte Moniz dos Reis

Timor-Leste sai hanesan nasaun independente foin tinan sanulu resin sia (19) hanesan estadu de direito demokrátiku sira seluk, direitu bá rai sai pilar importante atu asegura direitu baziku bá sidadaun hotu-hotu. Direitu bá rai hetan protesaun iha Konstituisaun Repúblika Demokrátika de Timor-Leste (K-RDTL), iha Artigu 540 klausula (3) hateten katak Atu hetan eh hasai ema ida nia propriedade privada hodi halo bá uzu públiku, tenke selu indeminizasaun loloos bá sidadaun, tuir lei haruka.

Maske Timor-Leste hela iha administrasaun kolonial Portuguesa durante tinan 450, inklui tinan tolu iha Japaun nia okupasaun, Indonezia durante tinan 24 no restaurasaun independensia bá tinan sanulu resin sia (19) ona maibé la konsege fó influensia bá sistema administrasaun rai iha Timor-Leste.

To’o ohin loron komunidade Timor-Leste seidauk senti sistema administrasaun rai modernu nian hanesan prosesu levantamentu kadastral, sertifikadu na’in bá rai no sel-seluk tan. Maibé to’o ohin loron governu Timor-Leste hamutuk ho parseiru internasional halo intervensaun oi-oin no esforsu an atu resolve problema rai no fó seguransa direitu bá sidadaun hotu-hotu maibé to agora seidauk hetan nia solusaun.

Governu liu husi Ministeriu Justisa (MJ) no Diresaun Nasional Terras Propriedade (DNTP) implementa polítika atu hasai komunidade ne’ebé mak situa iha aldeia 01 centru unidade suco Caicoli, Postu Administrativu Vera Kruz, Munisipiu Dili, ho objektivu atu halo konstrusaun edifisiu Kuartel Jeral Polisia Nasional Timor-Leste (PNTL), konstrusaun ne’e konsidera estratejiku tebes atu halo edifisiu Kuartel Jeral (PNTL).

Infrastrutura pilar importante ba Dezenvolvimentu nudar fundamentu hanesan motor ba dezenvovimentu nasional, governu Timor-Leste halo dezenvolvimentu konserteza sei kona komunidade ka povu nia kintal ka hela fatin, maibé governu sei fó kompensasaun. Maibé iha sorin seluk dezenvolvimentu labele sai hanesan razaun atu justifika hodi hasai ka muda ema ida husi sira nia rai ka hela fatin la ho kondisaun ne’ebé adekuadu tanba sidadaun ida-idak iha direitu atu hetan protesaun hasoru despeju obrigatoriu husi sira nia hela fatin.

Hare bá realidade konseitu dezenvolvimentu atual iha risku no lori ameasa bo’ot bá komunidade kiak no vulneravel sira sei lakon moris subsitensia, lakon kultura no mós rendimentu familiar. Nu’une sei aumenta kiak sai aas liu tan, tanba deit konseitu dezenvolvimentu politika rai ne’ebé produz husi estadu hodi foti povu kiak nia rai produtivu hodi harii mega projetu sira iha ne’ebé fó sira nia importansia bá lukru ekonomia duke bá produsaun aihan iha rai leten hodi sustenta povu nia moris mak sustentavel no ekuitavel.

Desde tinan 2013 to agora prosesu negosiasaun entre parte Diresaun Nasional Terras e Propriedades (DNTP), ho komunidade sira halo sorumutu dala barak ona, maibé seidauk rezulta akordu intendimentu mútuo ruma. Durante prosesu negosiasaun komunidade iha vontade kolabora diak tebes ho parte Diresaun Nasional Terras e Propriedades (DNTP), no komunidade sempre hato’o preukupasaun sira kona-ba sira nia direitu lolos maibé parte Diresaun Nasional Terras e Propriedades (DNTP), la fó resposta serteza bá komunidade.

Komunidade nu’udar nain lejitimu atual bá bein imóveil ho nia superfisie do terreno mais ou menus 55x126m2, ne’ebé mak situa iha aldeia 01 centru unidade suco Caicoli, Postu Administrativu Vera Kruz, Munisipiu Dili. Tanba ne’e iha loron 5 fulan Outobru tinan 2012, komunidade sira hetan sertifikadu de rejistu no Cadastro Nasional de Propriedade husi parte DNTPSC no Ministeriu Justisa.

Iha loron 22, fulan Outubro tinan 2020 komunidade sira simu karta notifikasaun ne’ebé mak hasai husi Diresaun Nasional Terras e Propriedades (DNTP), ho Nú Ref: 522/2164/DNTP//DGTP/2020, iha karta notifikasaun ne’e ho nia karakter obrigatoriu no la iha ninia fundamentasaun nu’udar formalismu legal sira iha Lei númeru 8/2017 loron 26 fulan Abril kona-bá Lei espropriasaun tanba utilidade públika tenke halo tuir se bainhira faila ka insusesu iha prosesu negosiasaun entre komunidade ho parte Diresaun Nasional Terras e Propriedades (DNTP), ho entidades benifisiaria bele rekere deklarasaun utulidade públika. Maibé entidade refere tenke halo deklarasaun utilidade públika iha Konsellu Ministru (KM), ne’ebé hateten iha lei.

Mezmu nu’une Ministeriu Justisa liu husi diretór (DNTP), hasai karta notifikasaun bá komunidade sira ho obriga tenke hamamuk sira nia hela fatin iha situasaun ida komunidade sira infrenta difikuldade ekonomia ne’ebé kauza husi estadu emerjensia. 

Tuir Konvensaun Internasional Direitu Ekonommia Sosoial No Kultura, (KIDESK), ne’ebé governu Timor leste ratifika iha tinan 2003 iha konvensaun ida ne’e komite bá konvensaun fó komentariu jeral iha klausula (7) temi katak: “Hasai ema ida husi uma ka rai ne’ebé nia hela labele halo ema ne’e sai fali ema ida uma laek ka sai vulneravel violasaun direitus humanus sira seluk. Bainhira ema afetadu ida labele tau matan bá nia an rasik, Estadu partisipante tenke foti medidas hotu-hotu to’o iha ne’ebé nia rekursu bele husik, hodi asegura uma/abrigu alternativu no adekuadu bá ema ne’e nia bele hetan asesu bá rai ne’ebé nia bele hetan asesu bá rai ne’ebé bele produs ai han, se ida ne’e mak situasaun ne’e envolve.

Tanba ne’e mak atu garante utilidade iha propriedade privadu tantu públiku, estadu rasik mós tenke hare direitu bá rai ne’ebé estabelese iha lei No 1/2003 de 10 de dezembru, artigo 3 hateten katak ema hotu-hotu iha direitu bá moris, bá liberdade no seguransa bá nia an rasik. Nune mos lei No 13/2017 De 5 de Junho, Regime Espesial bá Definisaun Titularidade Bein Imovel, artigo 8 klausula (6) hateten katak Titular bá direitu uluk nian ká deklarante ne’ebé prinxe rekezitu uzukapiaun espesial ne’ebé tuir termu lei ne’e, tenke hetan rekoñesimentu bá direitu propriedade kona bá bein imovel, maibé lakon direitu tanba bein tama iha dominiu publiku estadu nian, tenke hetan indeminizasaun.

Estadu iha obrigasaun atu halo indemnizasaun ne’ebé dignu no justu bá  komunidade afetadu sira bá kualkér konstrusaun públiku no privadu tuir Lei No.8/2017 Kona bá Espropriasaun bá Utilidade Públiku tuir provizaun sira mak hanesan:

Artigu 590 temi kona ba Publika Indeminizasaun:

1. Konsidera informasaun publika valor, bein imovél ká kualkér direitu seluk ne’ebé transmite ona ho títulu indemnizasaun

2. Entidade benefisiaria bá espropriasaun publika iha Jornál Repúblika kona bá valor ne’ebé selu ona ká bein imovél ne’ebé entrega hanesan alternativa bá indemnizasaun tuir termu lei ida ne’e no iha Artigu 600 mós kolia kona ba Meiu sira hodi selu indemnizasaun

1. Indemnizasaun bá espropriasaun tanba utilidade públiku sei selu ho osan dala ida de’it ká ho espésie liu husi fó bein ekivalente, exetu bá exepsaun sira ne’ebé prevee iha númeru tuir mai.

2. Kona bá akuzasaun liu husi direitu privadu, parte sira bele konkorda selu indemnizasaun liu husi prestasaun ká fó bein ká direitu ne’ebé konkorda ona ho ida ne’ebé prevee iha artigu tuir mai.

Referensia :

Lei Espropriasaun Tanba Utilidade Públiku 8/2017 Versaun-Tetum, Ministériu Da Justisa, 2014.

Regime Espesial Ba Definisaun Titularidade Bein Imovel , Lei No 13/2017 De 5 De Junho.

Konvensaun Internasional Direitu ekonommia sosoial no kultura Lei Nu 1/2003 de 10 de Dezembru.

Konstituisaun Republika Demokratika de Timor-Leste (RDTL). Vigor iha Loron 20 de Maio de 2002.

Print Friendly, PDF & Email

LEAVE A REPLY

Please enter your comment!
Please enter your name here