Home Feature Dezastre Naturais hodi Mata Ween no Lisaun Aprendizajen ba Futuru

Dezastre Naturais hodi Mata Ween no Lisaun Aprendizajen ba Futuru

1019
0
Posko Asaun Juventude Fo Apoio Solidariedade Hamoos Uma Komunidade (Foto: PAJ)

By Manuel Monteiro Fernandes*

Reflesaun fin de semana fulan Abril nian, depois selebra loron bo’ot Paskua nian. Ne’ebé Na’i Jesus han ikus ho nia eskolante sira no fahe ai-han moris nian ba nia eskolante sira hodi amostra espíritu servi ba ema seluk. Liu tiha ida ne’e, ita hotu hakmatek ho graça no rahun kmanek Na’i Jesus nian, maibe la kleur deit, ita hotu hakfodak tamba udan, anin hodi hamosu tempestade (badai) ka Cyclone Tropical iha dia 4 Abril 2021, hodi hamo’ut uma maluk komunidade nian barak, halakon sasan no vida. Tuir dadus ne’ebé fó sai husi Sekretáriu Estadu ba Protesaun Sívil (SEPC) fó sai katak, totál populasaun ne’ebé lakon sira nia vida hamutuk ema na’in 45 no situasaun seluk, populasaun hamutuk na’in 25.000 resin mak sofre impaktu negativu. Populasaun sira ne’e hotu, espalla iha sentru deslokadu sira ne’ebé organiza husi Igreza sira nian, fatin serbisu governu nian no fatin siguru balu iha komunidade nia le’et.

Situasaun todan, susar no nakonu ho mata wee ne’e, ema hot-hotu bo’ok-an, entidades sivíl no militár mós bo’ok-an. Nune’e lideransa foun sira mós ho lai-lais bo’ok-an hodi hanoin oinsa bele halo netik asaun ki’ik ruma hodi hakma’an mau-alin no inan-feton sira ne’ebé terus. Materializasaun asaun hirak ne’e hotu, iha Mahon Sekretáriu Estadu Joventude Desportu (SEJD) nian, mak hahoris Posko Asaun Joventude (PAJ) ne’ebé halibur organizasaun sumbriña joventude nian no instituisaun oi-oin hodi lolo sira nia liman rohan ba maluk sira ne’ebé hetan afetadu inunsaun no rai namso (longsor). Bai-bain, ema barak dehan, joventude mak ruin bo’ot nasaun nian, joventude mak futuru nasaun nian, joventude mak ai-rin foun nasaun nian no sel-seluk tan. Lia fuan hirak ne’e hotu, ita sani no rona mesak kapas no kmanek hotu. Maibe dala barak, ita mós lakon korajen no lakon matenek oinsa mak atu halibur no oinsa mak atu hatudu dalan di’ak ba sira.

Iha pasadu, istória joventude nian, marka metin tiha ona iha istória metan 12 Novembru 1991 ne’ebé nakfilak sai naroman ba rai doben ida ne’e. Ohin, aban no futuru mai, joventude ida agora bele tinu no bali naroman ne’e hodi sai naroman liu tan ba Estadu no Nasaun iha futuru ne’ebé nakonu ho esperansa ba liberta-an husi ki’ak, mukit no obskurantizmu. Ohin dala ida tan joventude sira hatudu duni sira nia vontade patriotíku, biar iha situasaun funu hasoru COVID-19 no situasaun susar oi-oin ne’ebé sira hasoru, dalan kotu, ponte kotu, kdadalak nakfilak sai mota hodi halakon dalan sira, sira nia fuan la kotu, sira nia vontade la kotu, sira nia unidade la kotu no sira nia solidaridade la kotu. Kontinua ho lian maka’as, sira hakilar la hakiduk hodi hasoru funu bo’ot ne’e ho espíritu voluntárizmu ne’ebé ás, biar ita tama tia ona iha situasaun dependénsia no situasaun bosok malu ne’ebé ás teb-tebes.

Husi kna’ar hira ne’ebé sira halo, halo ho responsabilidade no onestidade duni. Fatin hirak ne’ebé sira hakna’ar-an ba konsege sira liberta no hakma’an duni maluk afetadu biar ho sira nia liman rohan, kontenti mai dau-dauk. Sira la senti halo buat bo’ot hanesan ema bo’ot no ema ne’ebé iha kbi’it bo’ot liu halo, maibe espresaun husi famillia sira ne’ebé sira ba no lolo sira nia liman rohan ba, dehan deit ba sira katak, ami la iha prezenti kmanek mak bele ofrese ba ita bo’ot sira nia solidaridade ho ami. Maibe ami kontinua taka liman no harohan ba imi, atu imi kontinua hetan matak-malirin husi ida be hun husi moris ne’e nian.

Nune’e husi obra ki’ik-oan ne’ebé SEJD nia belun sira halo dezde loron 6 Abril mai to’o loron 14 Abril 2021, konsege fó ona tulun umanitáriu ba uma ka’in hamutuk 105, ho kategória azudus sira hanesan, ai-han: distribui ona ba uma ka’in hamutuk 95 no la’os ai-han: distribui ona ba uma ka’in hamutuk 10. Totál membru famillia hamutuk ema na’in 567 mak hetan ona tulun umanitáriu husi PAJ. No atividade seluk hanesan fó konsellu ba labarik sira ne’ebé trauma tamba dezastre naturais refere, hamutuk labarik na’in 36 iha Meti-aut no labarik na’in 6 iha Becuse Craik. Totál labarik sira ne’ebé hetan ona konsellu husi dr. no dra. sira ne’ebé serbisu hamutuk ho PAJ, hamutuk labarik na’in 42. Atividades fó konsellu ba labarik sira, PAJ halo kooperasaun serbisu hamutuk ho Ministériu Saudi no UNICEF. Rezultadu hirak ne’ebé temin ona iha leten nu’udar human no sihi (tabal-sulam) na’in sira husi organizasaun oi-oin mak hanesan: Joventude Hadomi Natureza (JHN), Alumni Parlamentu Foin Sa’e Timor-Leste (APFTL), Uniaun Nasionál dos Escuterus de Timor-Leste (UNE-TL), Conselho Nasionál Joventude Timor-Leste (CNJTL), Cruz Vermelha Timor-Leste (CVTL), Asosiasaun Difisiente Timor-Leste (ADTL), Estudante Hadomi Natureza UNTL (ESHANA-UNTL), Comoro Child and Youth Center (CCYC), Aliansa Nasionál Contra Tabako (ANCT), Centro Joventude Becora no mós Ekipa Joventude, Estudante Apoyu Umanitárian (EJEAU), Rotarac Club of Dili, YSE, RYLA Timor-Leste, Alumni Colêjio São Fransisco de Asisi Fatuberlihu no Knua Joventude Fila Liman (KJFL).

Oras ne’e dau-dauk, famillia sira ne’ebé halerik husu tulun sei kontinua halerik hela, tamba ne’e membru PAJ kontinua ho dedikasaun ás, espíritu voluntárizmu ne’ebé ás, hakat ho nei-neik, bei-beik hodi hakat to’o iha lian halerik sira nia le’et ho liman rohan ne’ebé sira iha bele tutan hodi bele hi’it-an uit-oan husi tahu laran no wee laran nune’e bele hamahon fila fali sira-an husi loro manasa no C-19 ne’ebé komesa si’ak mai dau-dauk no ataka mai dau-dauk no komesa fila fali homan (aniam) fila fali sira nia moris.

Iha funu laran, ita mós rona rasik ho tilun, sá ida mak saudoju David Daitula dehan oinsa materializa lia fuan “solidaridade” iha moris lor-loron nian? Saudozu Daitula, lia fuan solidaridade sei la vale, enkuantu ita nia maluk iha susar laran, ita halo finzi la hatene ka halo finzi la’o liu deit. Ohin loron ha’u bele aprende fila fali ho PAJ. Wainhira hakat tama maluk afetadu ida nia uma, husu nia, ita nia kondisaun oinsa? No sá ida mak ami bele tulun? Ho lia fuan maús (bersahabat) no oin-na’in, siñor ne’e hatan mai ami katak, ha’u nia uma mós afeta hotu (mota no tahu mós tama). Maibe, ha’u nia kondisaun di’ak uit-oan, tamba ha’u funsionáriu públiku no iha kbi’it naton. Maluk balu susar no araska liu, ita bo’ot sira bele hakat ba no tulun sira. Iha situasaun agora, ita hanoin katak onestidade komesa lahuk, malahuk no besik ferujin ona. Maski nune’e sei iha esperansa, tamba sei iha ema ida-rua mak sei kaer metin hela valór onestidade no solidáriu ho ema seluk. Situasaun hanesan, ami hasoru mós ho Xefi Aldeia ida, ne’ebé ho enerjíku la’o tuir ninia populasaun sira ne’ebé afetadu hodi rekolla famillia sira ne’ebé afetadu duni. Ho lian maus (bersahabat) no forti (tegas) dehan ba ninia komunidade sira, sé mak la hetan dezastre, fabor tulun maluk sira ne’ebé afetadu hodi dada sira nia liman husi susar no terus ne’ebé sira hasoru. Ita la hetan dezastre, labele husu azudus. Ita husu azudus, siginifika katak ita husu dezastre. Ida ne’e lulik maluk sira.

Tebes duni, asaun hirak ne’ebé organizasaun joventude sira hotu halo hamutuk iha mahon PAJ nian ne’ebé hahunuk iha Kakuluk SEJD nian, amostra duni sira nia responsabilidade hanesan rin no ruin bo’ot Nasaun nian. La koalia barak, la reklama barak, la’o ho sira nia ain, hi’it ho sira nia liman no hati’u (memikul) ho sira nia kabas rasik, ho nei-neik maibe sertu (pasti) to’o duni iha fatin ne’ebé identifikadu.

La iha tan lia fuan seluk ne’ebé ita bele halimar hanesan sá ida mak Zapatista dehan, “Lia fuan mak kilat’’. Uma vés ita halimar lia-fuan, maka lia-fuan sei hakanek. Evita atu lia fuan la hakanek, maka ha’u-ata hakotu ha’u nia reflesaun rohan iha fin de semana ne’e iha ne’e deit ona. Karik iha lia fuan ruma mak la monu kona laran ka la konpletu karik, halo kompletu hela ba no husu diskulpa karik iha lia fuan ruma mak soi.   

*Hela fatin: Aldeia Lisbuta, Suku Manleuana, Postu Administrativu Dom Alexo, Munisípiu Dili

Print Friendly, PDF & Email

LEAVE A REPLY

Please enter your comment!
Please enter your name here