Home Analisa Papel UPF Hodi Kontrola Sidadaun Sira Tama Sai Ilegal Iha Linha Fronteira...

Papel UPF Hodi Kontrola Sidadaun Sira Tama Sai Ilegal Iha Linha Fronteira Batugade

712
0
hakerek nain Jemicarte Moniz dos Reis, Lic. AP. [Foto: Doc. privadu | 21.04.2021]

Hakerek nain Jemicarte Moniz dos Reis, Lic. AP.

Timor-Leste hanesan nasaun ida ne’ebé hetan Kolonízasaun husi Portugal durante tinan 450, de faktu katak nasaun Timor-Leste hetan ona proklamasaun unilatéralmente iha loron 28 fulan Novembru 1975 no tuir komunidade internasíonal nia perspektiva katak Timor-Leste seida’uk ukun a’an iha momentu ne’ebá, to’o ikus nasaun Timor-Leste hetan fila fali invazaun husi nasaun indonesía durante tinan 24 nia laran. Iha loron 30 fulan Agustu tinan 1999, komunidade Timor oan sira hó idade minimu 17 (sanulu resin hitu) ba leten obrigatóriu atu partisipa iha votasaun hodi determina Timor-Leste nia ukun rasik-an, hó ninia pursentu votus mak 78,50% ba pro-independensia no ba pro-otonomia 21,50%. Hó rezultadu votasaun refere Timor-Leste konsege restaura independensia iha loron 20 fulan maiu 2002 nia laran.

Polisia nasional Timor Leste (PNTL) hari’i iha loron 27 fulan Marsu tinan 2000 husi Administrasaun Nasaun naklibur sira ( ONU) rekrutamentu komesa hala’o ona desde 2000, treino baziku komesa iha 27  marsu 2000, husi UNTAET. Polisia Nasional Timor Lorosa’e (PNTL) ikus mai responsabilidade ba Nasaun tomak iha loron 10 fulan Dezembru 2003, agora dadaun iha unidade espesial tolu hamutuk ho Polisia Nasional Timor Lorosa’e (PNTL) mak hanesan: Polisia Reserva, Formerly the Rapid Deployment Service, Unidade patrulliamentu Fronteira, no Unidade Intervensaun Rapida, ou UIR, ne’ebé halo tuir modelu guarda Nasional Republicana Portugues GNR, ne’ebé serve iha Timor Leste antes ukun an.

Polisia nudar orgaun soberania ne’ebé tenke garantia lei ne’e nia implementasaun ne’ebé hatur ona husi ita nia konstituisaun Republika Demokratika de Timor-Leste (RDTL) iha Artigu 147 koalia kona ba Polisia no forsa ba seguransa iha klausula rua mak hanesan tuir mai ne’e:

  1. Polisia defende legalidade demokratiku no garantia sidadaun sira nia seguransa interna, no la bele iha politika.
  2. Prevensaun ba krime tenke halo ho respeitu ba direitus humanus.

Lei organika polísia nasionál Timor-Leste (PNTL) Dekretu -Lei n.º 09/2009, loron 18 fulan Marsu iha Artigu 33° Koalia kona-ba Unidade Patrullamentu Fronteira nian mak hanesan tuir mai ne’e :

  1. Unidade Patrullamentu Fronteira iha kapasidade espesial hodi hala’o vijilánsia ba fronteira no kontrola ema no sasan.
  2. Superintendente ida ne’ebé hetan nomeasaun husi Komandante Jerál maka kaer komandu Unidade partullamentu Fronteira nian, no unidade ne’e kompostu husi membru  efektivu iha territóriu  nia  laran, ne’ebé  koloka tuir    rejime rotasaun, ba tempu ne’abé Ministru ne’ebé responsavel ba Seguransa sei determina.
  3. Rejime rotasaun aplika mos ba Komandante Unidade Patrullamentu Fronteira sira nian
  4. Misaun espesifika Unidade  Patrullamentu Fronteira nian maka:
  5. Patrullamentu no vijilánsia ba fronteira terrestre tomak, liu husi koordenasaun no koorperasaun ho F-FDTL;
  6. Koorpera ho Servisu Migrasaun hodi kontrola ema no bens ne’ebé tama no sai liu husi fronteira terrestre;
  7. Koorpera ho autoridade administrativa seluk  ne’ebé  relevante hodi kumpre ho lei fiskal, alfándega no sanitáriu nian;
  8. No seluk tan tuir natureza misaun no hirak ne’ebé simu tuir dalan ne’ebé legal.

Tuir observasaun iha terenu nota katak Unidade Patrullamentu Fronteira sei menus rekursu humanu no fasilidade ka ekipamentus hodi halo kontrolasaun ba sidadaun sira ne’ebé maka tama sai illegal iha liña fronteira batugade entaun ho ida ne’e sidadaun sira sempre tama sai illegal hela deit, laos sigfnifika ita nia Unidade Patrullamentu Fronteira mak la iha kapasidade atu halo kontrola ba iha liña fronteira maibé menus rekursu humanu no fasilidade ba Unidade Patrullamentu Fronteira atu uza hala’o sira nia atividade lor-loron. Relasiona ho Rekursu humanu no fasilidade ne’ebé maka menus membru Unidade Patrullamentu Fronteira sempre kestiona ho kontrolu ne’ebé maka hala’o husi fronteira batugade no sira seidauk satisfas ho servisu ne’ebé maka sira hala’o lor-loron iha sira nia servisu fatin, Se ita Kolia kona ba Rekursu umanus mak sai hanesan elementu prioridade iha nasaun Repúblika Demokrátiku Timor-Leste ou instituisaun nia laran hodi alkansa objetivu no ezerse progresu lao diak, maibé to’o ohin loron investimentu ba rekursu umanu lao la hanesan iha institusaun PNTL.

Polisia Unidade Patrullamentu Fronteira menus tebes rekursu humanu no fasilidade hodi bele fó kontrolu ba sidadaun sira ne’ebe tama sai illegal iha Fronteira Batugade. Unidade Patrullamentu Fronteira (UPF) rekoñese hetan difikuldade atu kontrola atividade ilegal ne’ebé mosu iha area fronteira rai-maran, liu-liu kona-ba ema hatama mina ilegal, atividade ne’ebé hatama sai ilegal nu’udar obstaklu boot ida ne’ebé mak UPF hasoru to’o ohin loron. Kontrolu iha fatin ida ema hatama fali husi fatin seluk, ne’ebé araska uitoan, entaun ho ida ne’e ema kontinua tama ilegal liña fronteira batugade informasaun ne’e hetan liu husi Media hanesan TVTL no Media Sosial no Relatoiru husi Fundasaun Mahein (FM). Durante ne’e UPF uza meius oioin atu kontrolu atividade ilegal, maibé ema muda tun-sa’e fatin hodi hasees an husi kontrolu UPF nian. Ema tama sai (ilegal) tama husi tasi agora dadaun maka’as. Hahú husi Palaka mai Loes, Maliana, Maske nune’e, parte UPF kontinua esforsu hodi asegura fronteira husi atividade illegal sira.

Entertantu kona-ba rekursu umanu, númeru membru UPF ki’ik liu kompara ho unidade sira seluk, tan ne’e membru ne’ebé koloka iha baze dala-barak la to’o tarjetu ne’ebé mak planeia. Kada postu ita iha de’it membru menus husi na’in sanulu (10). Distansia kontrolu kada postu tenke atinze kilometru 10. maibé UPF koloka ema ida kada kilometru ida, ne’e defisil atu detekta fatin ne’ebé maka sidadaun sira tama sai, tan ne’e husu ba ministeriu relevante atu presiza aumenta númeru membru efetivu UPF nune’e bele apoiu di’ak liu tan servisu fronteira nian hodi nune’e bele hala’o kontrolu diak liu tan iha ita liña fronteira atu nune’e, no mós sidadaun nanis no sidadaun estranjeiru labele tama sai illegal iha liña fronteira batugade no fronteira sira seluk iha Timor leste.    

Nu’une mós halo intervista ho Sr. Comandante Superintendente Polisia Sr. João Belo dos Reis, Kona ba Oinsa Papel UPF Hodi Kontrolu Sidadaun Sira Ne’ebe Tama Sai Ilegal Iha Liña Fornteira Batugade ? Nia informa katak Kuartel Unidade Patrullamentu Fronteira Komandu UPF-PNTL Lokalizadu iha area administrative munisipiu Bobonaro no UPF mak unidade PNTL ida ne’ebé responsabiliza hodi asegura fronteira territoriu Nasional  Republika Demokratika de Timor-Leste (RDTL) ho sistema servisu statika ( Rotasaun hala’o tuir necesidade servisu deit). Aktualmente UPF kompostu husi Kompanha Operasional tolu (3) no postu vijilansia vinte nove (29) no kompanha Operasional UPF tolu (3) ne’e mak kompanha UPF Alpha, lokaliza iha Tunubibi, Maliana Munisipiu Bobonaro. Aktualmente kompanha Alpha kompostu husi Postu Seguransa Fronteira hamutuk sia (9), Kompanha UPF Bravo, Kompostu husi Postu Seguransa Freonteira hamutuk sia (9) lokaliza iha Kasa Bauk, Munisipiu Suai. Kompamha UPF Charlie, kompostu husi postu seguransa Fronteira hamutuk sia (9) lokaliza iha Oe-Cusse. Kondisaun geral seguransa fronteira terestre Timor-Leste ho Indonesia iha Batugade la’o tuir ninia koridor no ninia implementasaun servisu tuir funsaun instituisaun ida-idak nian (Servisu Integradu). Ligasaun externa iha terenu hala’o nafatin husi postu UPF Mota Ain liu husi Orientasaun Komando UPF-PNTL no desijaun Komando Geral da PNTL.

Nia Salienta katak difikuldade ne’ebe ami hasoru iha ami nia servsiu fatin iha fronteira mak hanesan membru UPF menus no equipamentus ne’ebé mak hodi ajuda ami hodi hala’o ami nia servisu hodi kontrollu sidadaun Estranjeiru no Sidadaun Timor oan Ne’ebe maka tama sai illegal iha ita nia rai laran mos sei menus. Maibe ami sempre iha vontade hodi hala’o kontrollu ne’ebe maka rigorozu. No iha Semana liu ba ami hala’o operasaun iha liña fornteira iha madrugada ami kaptura sidadaun sira ne’ebe maka tama illegal iha ita nia fornteira batugade hamutuk ema nain sia kompostu husi mane hotu.

Nu’une mós nia haktuir katak kazu kontestual iha fornteira Batugade  mak hanesan sidadaun sira tama fronteiras illegalmente tanba lia cultura ( Mate, Uma lisan no lia lulik seluk ne’ebé obriga komunidade balu iha fronteira tenke marka prejensa ). No iha lamentasaun ho kampo de servisu ne’ebé limitadu no skiil pessoal ne’ebé natureza (hala’o to’os tinan ida dala ida) no hetan resultadu minimu nune’e sira hili dalan depende ba aktividade illegal ne’ebé fo lukru ba sira lais liu maske hetan kaptura no kazu ne’e levanta ba Ministeriu Publiku. Dala barak Komunidade sira enterga deit sasan maibe la kestiona vantage no desvantagen husi kapturasaun ne’ebé parte seguransa sira halo. Husi parte balu ba sira ne’ebé la involve iha aktividade illegal, sira ejiji ba UPF atu kontrola maksimu aktividades refere hodi labele fo implikasaun negative iha sira nia Aldeia ou Bairo.

Entretantu nia Subliña katak Relasaun ka Koperasaun ne’ebé mak ami hala’o ho TNI iha liña fronteira lao diak teb-tebes no ami sempre halo ligasaun no kordenasaun hahu husi nivel postu, kompanha to’o Battalaun ne’ebé kolokadu iha liña fornteiras wainhira mosu incidente ou acidente ne’ebé involve komunidade husi nasaun rua hodi presta lalais informasaun kona-ba problema ne’ebé akontese nune bele  rekomenda ba komando alto husi ida-idak nia. Total populasaun ne’ebé maka tama illegal iha liña fornteira iha dadus tinan 2018 hamutuk total 117 kompostu husi mane nain 65 no Feto nain 52, no dadus tinan 2019 hamutuk nain 48 kompostu husi Mane nain 22 no Feto nain 26 pessoas.

Iha sorin seluk Intervista mos Membru UPF balun Sr. Benediktos M. Leo nia Salienta katak Dezafiu no Problema ne’ebé mak ami hasoru iha ami nia serviu fatin hodi hala’o kontrollu ba sidadaun sira ne’ebé maka tama illegal iha liña fornteira mak hanesan Menus Rekursu humanu no equipamentu tanba Membru Unidade Patrullamentu ho total 372 ne’e labele halo kontrolu hotu liña fornterias sira no Ekuipamentus mos menus hanesan transporte iha maibe att no estadu seidaiuk halo manutensaun ba equipamentus sira ne’ebé mak att,  no fasilidade hanesan CCTV, Komputador, Drone mos sei menus, entaun ho ida ne’e maka sidadaun sira sempre tama illegal iha ita nia liña Fornteira sira iha Timor-Leste. Nu’une nia hatutan katak Membru unidade Patruillamentu Fronteira UPF ne’ebe mak  menus sei fo impaktu ba ita nia seguransa sira iha teritoriu Timor leste espesiefikumente iha liña fornterira sira tanba ema bele hala’o sira nia negosiante illegal hakur fronteira kontinua  tama sai hela deit tanba hare husi ita nia membru UPF no fasilidade mos sei limitadu tebes atu hala’o kontrollu iha liña Fornteira Sira.

Konkluzaun

Papel Unidade Patrullamentu Fronteira (UPF) importante tebes hodi halo seguransa no kontrolu maximu ba sidadaun sira ne’ebe mak tama illegal iha Timor leste mesmu area fronteira Timor nian luan tebes, maibe Polisia nafatin kontinua hala’o nia kna’ar ho efikas hodi implementa lei no orden ne’ebe iha atu nafatin haforsa kontrolasaun ne’ebe masimu iha parte fronteira hodi evita situasaun hirak ne’e, labele akontese bebeik iha future. Unidade Patrullamentu Fronteira UPF nia objektivu mak atu halo Hodi hala’o  vijilánsia  ba fronteira  no  kontrola  ema  no  sasan.  Patrullamentu  no  vijilánsia  ba fronteira terrestre tomak, liu husi koordenasaun no koorperasaun ho F-FDTL, Kopera ho Servisu Migrasaun hodi kontrola ema no bens ne’ebé tama no sai liu husi fronteira terrestre. Kopera ho autoridade administrativa seluk  ne’ebé  relevante hodi kumpre ho lei fiskal, alfándega no sanitáriu nian, No seluk tan tuir natureza misaun no hirak ne’ebé simu tuir dalan ne’ebé legal.

Rekomendasaun

Ba Ministeriu Interior presiza tau atensaun ba asuntu hirak tuir mai:

a) Hadi’a liña koordenasaun servisu ho instituisaun relevantes sira iha aspetu mak hanesan: hametin servisu hamutuk, estabelese opiniaun ne’ebé hanesan, harmoniza programa sira no efisiensia utiliza rekursu no fasilidade sira nune’e bele garante kualidade kontrolu hodi bele redus númeru tama sai illegal iha liña fronteira

b) Polísia Nasional Timor Lorosa’e iha Serviços UPF, hodi kumpri regra serbisu, konsiensia no prontidaun hodi hala’o serbisu, nune’e bele garante kualidade kontrolu iha instituisaun refere.

Lista Referensia

Konstituisaun Republika Demokratika de Timor-Leste (RDTL) Vigor iha Loron 20 Fulan Maio 2002.

Lei organika polísia nasionál timor-leste (PNTL) Dekretu -Lei n.º 09/2009, loron 18 fulan Marsu.

Historia Timor Leste, Publika CAVR, Pag 1. Asesu Iha Sala Leitura Xanana Reading Room.

https:www.pntl.tl.

Print Friendly, PDF & Email

LEAVE A REPLY

Please enter your comment!
Please enter your name here