Home Saude Pasiente 1 Hakotu Iis Iha Vera Cruz, Mate Tanba COVID-19 ou Mate...

Pasiente 1 Hakotu Iis Iha Vera Cruz, Mate Tanba COVID-19 ou Mate Ho COVID-19?

466
0
Joao Mendonsa oan hosi matebian Olga Mendonsa. [Foto: David da Costa | 22.04.2021]

Reportazen David da Costa Gusmao*

Pasiente nain ida diagnostikadu pozitivu COVID-19 hakotu iis iha sala izolametu Vera Cruz, mais menus oras tuku 09:00 dadersan, loron 22 Abril.

Joao Mendonsa oan hosi matebian Olga Mendonsa (61), ba jornalista sira hateten la simu nia inan mate tanba COVID-19 no matebian hakarak lori ba uma hakoi tuir kultura nian.

“Hau la simu tanba ami ba halo traramentu iha klinika Foho Osan Mean Audian, rezultadu dehan diak hela, no ami ba fali ospital boot, iha ne’eba sira koko nia tensaun  180/130, entaun sira dehan tensaun tun oituan imi bele lori ba uma. Dotor Cubano ida mak hateten hanesan ne’e mai ami, entaun ami mos laran metin los ba ida ne’e, katak ami sei lori matebian ne’e ba fali uma”, haktuir Joao iha Vera Cruz, 22/04.

Nia esplika sira fila hotu ona ba uma, to’o iha uma foin haris. Dotor sira telefone fali ba familia no husu fali katak pasiente ne’e imi bolu saida? “Hau nia bin ne’e hatan dehan nia hau nia maen, dotor dehan deskulpa mas ita boot nia inan hetan COVID-19, momentu sira halo test swab mos ami la hatene hotu no rezultadu swab sira dotor sira mos la hatudu ba ami”.

Nia Dehan matebian ne’e moras respiratoriu (paru-paru) ho tensaun semana rua ona, lori ba ospital matebian ne’e lakohi tanba tauk  pozitivu, maibe iha segunda meudia sira lori nia ba duni ospital,  no lori mai iha Vera Cruz iha Segunda kalan. Nia loron tolu iha sala izolamentu Vera Crus, loron tolu deit nia hakotu iis ona.

“Ami test swab hotu ami la pozitivu mas hau nia inan deit mak pozitivu, ida ne’e ami la simu, loron-loron ami mak lori tun sae ami nia inan maibe ami la pozitivu, ida ne’e mak ami hanoin la hetan,” nia espresa.

Tuir informasaun ne’ebe mak Neon Metin asesu katak kaixaun ne’e prepara husi  lider karismatiku Kairala Xanana Gusmão no agora kasiaun iha ona Vera Cruz. Matebian ne’e ninia rezidensia iha Lahane Ocidental.

To’o nutisia ne’e sae Neon Metin sedauk hetan konfirmasaun hosi Centro Integradu Jestaun Krize (CIJK), no bainhira hetan ona, Neon Metin sei publika parte CIJK nian.

*(David da Costa Gusmao nudar estudante UNTL ne’ebe halo estajiu iha Neon Metin)

Print Friendly, PDF & Email

LEAVE A REPLY

Please enter your comment!
Please enter your name here