Home Notisia HWI Apoiu Sasan Bazika Ba Uma Kain 30 Afetadu Hosi Inundasaun Iha...

HWI Apoiu Sasan Bazika Ba Uma Kain 30 Afetadu Hosi Inundasaun Iha Metiaut

738
0
HWI fahe sasan ba komunidade iha Metinaro. [Foto: David da Costa | 24.04.2021]

Reportazen David da Costa Gusmao*

Health Wealth Internasional (HWI) apoiu ai-han hanesan fos, mina, mie instant inklui nesesidade  sira ne’ebe uza ba lororon, ba komunidade afetadu dezastre natural foin lalais ne’e, hamutuk uma kain 30 iha suku Metiaut Postu administrativu Kristu Rei munisipiu Dili.

Responsavel asaun keritativa grupo HWI, Eugenia Guterres do Rego espresa sentimentu solidadriedade ba maluk vitima dezastre naturais tanba nudar timoroan, HWI hola inisiativa hodi apoiu aihan bazika ba komunidade afetadu hosi inundusaun.

“Ami husi HWI ho inisiativa  rasik mak halo asaun karidade ida ne’e, hodi apoiu ita nia maluk sira ne’ebe foin lalais hasoru dezastre natural, la signifika katak ami riku liu maibe nudar timoroan ami ho fuan ho laran, atu ajuda ita nia maluk sira hotu ne’ebe hasoru  situasaun ida ne’e, hodi bele hakmaan sira nia sofrementu,”dehan Eugenia Guterres ba jornalista sira iha fatin asaun karidade iha Metiaut, 24/04.

Nia esplika etapa dahuluk  HWI apoiu aihan nesesidade bazika hanesan fos ,mina , mie instant inklui nesesidade sira ne’ebe uza ba lororon. Iha tempu tuir mai sei nafatin apoiu maluk sira ne’ebe hasoru dezastre natural tuir forsa no kbi’it ne’ebe iha.

“Ami lori buat ne’ebe tuir ami nia forsa no kbi’it,  ne’ebe mak ami iha, la barak maibe iha naton atu bele apoiu sira hodi hakmaan sira terus,“nia subliña.

Nune’e mos Delegadu Aldeia Karumgulau suku Metiaut, Armando Coreia apresia tebes ho asaun karidade husi grupo HWI, tanba bele sustenta ona komunidade sira nia nesesidade lor-loron.

“Ami nia bairu  ne’e  iha uma 13 mak hetan estragus  ka perigosu tebes ka grave tebes husi dezastre naturais foin lalais ne’e, tanba ne’e  ami agradese  tebes ba kolega sira husi HWI ne’ebe iha hanoin ida ne’ebe  furak ohin mai apoiu aihan ba  ita nia komunidade sira, hodi bele tahan netik sira nia nesesidade lor-loron nian,” nia esplika.

Nia haktuir  komunidade afetadu sira  hamutuk kain 13 dadaun ne’e hela provijoriu iha kapela Metiaut  hodi hein desijaun husi governu atu rekoperasaun ba hela fatin.

Iha fatin hamesan komunidade afetadu dezastre natural, Abita da Conceicão agradese tebes ba Health wealth internasional (HWI) ne’ebe  apoiu ona aihan bazika ba sira.

“Ami agradese tebes ba HWI nia apoiu ne’e, maske barak ka oituan ami simu ona,” dehan nia.

*(David da Costa Gusmao nudar estudante UNTL ne’ebe halo estajiu iha Neon Metin)

Print Friendly, PDF & Email

LEAVE A REPLY

Please enter your comment!
Please enter your name here