Reportazen David da Costa Gusmao*
Ministra Saúde (MS) Odete Maria Freitas Belo hateten ema ne’ebé infetadu COVID-19 seidauk bele simu vasina, maibe liu tia fulan 6 sira bele vasina.
“Sira ne’ebé daudaun ne’e pozitivu seidauk bele hetan vasina , liu tiha fulan 6 mak foin bele simu vasina, tanba bainhira hetan ona vasina, ita nia isin koñese ona vírus ne’ebé iha ita nia isin, entaun ita nia isin dezenvolve hela imunidade no bainhira prosesu ne’e, ita prefere lalika fó lai vasina , husik nia dezenvolve kompletu ona maka fó vasina ho períodu hanesan, ida ne’e siénsia mak hateten,” Ministra Saúde informa ba jornalista sira, hafoin remata enkontru ho Primeiru Ministru, Taur Matan iha nia Rezidénsia Farol Dili, 27/04.
Nia haktuir, ema ne’ebé simu ona vasina, sei iha posibilidade bele hetan virus COVID-19 maibé vírus ne’e rasik la forsa ona, atu bele hada’et tutan ba ema seluk.
“Bainhira ema prodús vasina ne’e, matenek nain sira dehan katak vasina ne’e bainhira ita simu doze kompletu, maibé posibilidade atu da’et vírus ne’e iha nafatin, tanba laiha vasina ida ninia efikásia ne’e to’o 100 %, entaun sempre iha posibilidade atu hada’et maski ita simu ona vasina,” nia subliña
Governante ne’e esplika tan, bainhira simu ona vasina no virus ne’e nia da’et, vantajen mak vírus ne’e la forsa ona atu bele hada’et fali ba ema seluk no bainhira kona mós sei la moras todan ona, signifika la presiza ba toba iha ospitál uza oxijéniu ho ventilador.
*(David da Costa Gusmao nudar estudante UNTL ne’ebe halo estajiu iha Neon Metin)
