Home Saude Ema nain 355 Iha Aldeia Gideon-Vila Verde Simu Ona Vasina AstraZeneca (koresaun)

Ema nain 355 Iha Aldeia Gideon-Vila Verde Simu Ona Vasina AstraZeneca (koresaun)

996
0
komunidade aldeia Guiduim Vilaverde simu vasina COVID-19. [Foto: Joselina dos Santos | 11.05.2021]

Reportazen Joselina dos Santos

Komunidade Aldeia Gideon (laos Gidium), Suku Vila-Verde, Postu-Administrativu Vera Cruz Munisipiu Dili ema hamutuk 355 simu ona Vasina AstraZeneca iha loron 11 Maiu.

Komunidade Aldeia Gideon, Alezito da Almeida ba Neon Metin hateten vasina AstraZeneca ne’e importante tebes, tanba atu prevene-an hosi virus COVID-19 no mos fo prioridade ba sira nia saude liu-liu hosi virus.

“Liu husi opiniaun publiku husi media sosial ho argumentu ne’ebe barak, halo ha’u duvidas barak maibe ohin loron ne’e ha’u mai simu tiha vasina AstraZeneca,  ha’u senti ha’u nia imunidade di’ak no la hanesan ho opiniaun sira ne’ebe mak publika iha media sira, tanba ne’e ha’u husu ba komunidade hotu atu bele kontribui para prevene-an no proteje ita nia saude,” dehan Elezito ba Neon Metin iha Vila-Verde, 11/05.

Elezito hatutan nia fiar-an hodi simu Vasina AstraZeneca, tanba vasina Astrazaneca ne’e liu husi test sientifiku, tanba liu-liu hosi sientista saude nian halo ona test ba Vasina AstraZaneca katak nia bele ona fo koresponde ba nesesidade COVID-19, tanba nee mak nia fo konfiansa ba parte saude.

Iha fatin hanesan komunidade Rosa T. da Costa hateten nia hakarak simu Vasina AstraZaneca ne’e, tanba hakarak aumenta imunidade, nune’e bele  kontra moras COVID-19.

“Depois de ha’u simu vasina AstraZeneca, laiha reasaun ida no normal de’it, maibe ha’u senti de’it maka sona fatin ne’e moras oituan maibe reasaun seluk ne’e laiha,” tenik Rosa ba Neon Metin.

Nia dehan nu’udar sidadaun tenke koopera ho parte saude, tanba moras COVID-19 ne’e ema hotu tauk, antes atu kombate tenki simu Vasina AstraZeneca, tanba ne’e husu ba maluk sira ne’ebe seidauk simu vasina AstraZeneca, di’ak liu lalika rona buatus oin-oin iha kotuk, tanba inposivel tebes wainhira iha nasaun ida governu hakarak hamate fali nia povu, bu’at ne’ebe saude halo ne’e di’ak ba ita nia saude.

Xefe Centro Saude Vera Cruz, Dulce P. Tilman hateten sira nia implementasaun Vasina AstraZaneca ne’e mak faze primeiru ba frontonline sira, ne’ebe hahu ona  iha loron 7 Abril liu ba no faze segundu maka ba komunidade sira, liu-liu ba idade 60 ba leten.

“Vasina ne’e la’os obrigatoriu tanba ne’e depende ba ida-idak nia fi’ar, se ita bo’ot sira hatene katak saude iha ita nia liman rasik, ami la obriga ema,  ne’e voluntariu husi nia-an rasik,  nia sente vasina AstraZeneca ne’e importante ba nia saude bele mai simu,” hateten Xefe Centro Vera Cruz.

Nia apela ba komunidade sira, liu-liu ba sira ne’ebe maka idade 60 ba leten ho moras kroniku sira, diak liu mak vasina hodi haforsa imunidade, nune’e bele proteje-an.

Iha hanoin hanesan hosi Xefe Aldeia Guidium, Augusto G. A. da Costa hateten katak Ministeriu Saude fo sai ba autoridade lokal sira, hodi aviza ba populasaun sira ne’ebe mak hakarak mai simu Vasina AstraZeneca ne’e la obriga.

Komunidade aldeia Gideon suku Vila-Verde total ema nain 355 mak simu ona vasina AstraZeneca, no maioria komunidade adultus mak simu.

Print Friendly, PDF & Email

LEAVE A REPLY

Please enter your comment!
Please enter your name here