Home Notisia EKSES Lori Fila Covalima Oan 79 Ba Sira nia Knua, Tanba Komesa...

EKSES Lori Fila Covalima Oan 79 Ba Sira nia Knua, Tanba Komesa Menus Ai-han

701
0
Transporte ne'ebe atu tula ema 79 fila ba Covalima. [Foto: David da Costa | 21.05.2021]

Reportajen David da Costa Gusmao

Ekipa Servisu Covalima Vitória ho Domin (EKSES Covid-20) Organiza estudante total 79, atu fila ba munisipio Covalima, tanba iha tempu Serka Sanitaria ho Konfinamentu Obrigatoriu halo sira komesa menus ai-han.

Koordenador Jeral EKSES COVID-20, Mario Tilman informa katak ohin organiza estudante hamutuk 79, feto 42 no mane 37 atu fila ba Munisípiu ho razaun sira komesa enfrenta ona hamlaha durante Serka sanitária no Konfinamentu Obrigatoriu.

“Ho serka sanitária no konfinamentu obrigatoriu ne’e alin sira komesa infrenta problema hanesan aihan, la iha osan,ho ida ne’e mak  EKSES Covid-20 iha hanoin, atu hatan ba sira nia preokupasaun. Ami koko lori sira fila ba Munisípiu, maibé ida ne’e mos Ami lá obriga, se mak hakarak fila ami prontu atu fasilita lori sira ba,” dehan Mario Tilman Iha  Sede RENETIL, 21/05.

Nia haktuir estudante sira ne’ebé dadaun atu ba Covalima sei lá kumpri kuarentina iha Covalima, tanba sira iha dokumentus teste swab no sira nia dokumentus mós lori ona ba hodi trata gia de marsa, no hetan  ona konsiderasaun atu viagem ba munisipiu, transporte hirak ne’e apoiu mós husi empresário Covalima oan sira ne’ebé hela iha Dili.

Iha fatin hanesan Martino Gusmão Alves nu’udar Koordenador EKSES Covid-20 hosi Munisipio Covalima hatete, kuaze fulan ida sira foti dadus ba estudante sira iha Dili ne’ebé infrenta hela problema durante serka sanitaria no konfinamentu obrigatoriu.

“Ami la obriga sira maibé ami fasilita sira oinsá sira hadook an husi problema hirak ne’e, no durante ne’e ami organiza sira ba tuir teste swab, rezultadu iha tiha mak ami trata fali sira nia dokumentu ba guia de marsa,” nia subliña.

Entretantu estudante Cornelia Cardozo sente kontente tanba bele sai ona husi problema hamlaha ne’ebé durante ne’e nia enfrenta iha Dili.

“Objetivu fila ba ha’u nia rai tanba situasaun mak obriga tebes ami,iha serka sanitaria ne’e ami hasoru problema barak hanesan hamlaha no seluk tan,no ha’u sente kontente mós tanba bele sai ona husi situasaun ne’e,” nia dehan

Print Friendly, PDF & Email

LEAVE A REPLY

Please enter your comment!
Please enter your name here