Reportajen David da Costa Gusmao
VIII Governu Konstitusionál liuhosi Konsellu Ministru, iha Kuarta loron 1 Juñu , aprova ona proposta Rezolusaun Parlamentu Nasionál (PN) ne’ebé ratifika Emenda Doha nian Ba Protokolu Kyoto
Iha proposta ida ne’e aprezenta husi Ministra Negósius Estranjeirus no Kooperasaun (MNEK), Adaljiza Albertina Xavier Reis Magno.
Porta voz Governu no Ministru Prezidénsia Konsellu Ministru, Fidelis Manuel Leite Magalhães dehan, Protokolu Kyoto ne’e maka tratadu internasionál, ne’ebé nasaun sira asina akordu, halo kompromisu hodi hamenus sira nia emisaun gas ida -idak ne’ebé halo efeitu estufa iha atmosfera.
“Emenda Doha ba Protokolu ne’e mós hanesan kontributu importante ida hasa’e konsiénsia no mobilizasaun kona-ba nesesidade no ezijénsia, ba esforsu boot ida nivel globál nian hodi kombate alterasaun klimátika sira , liuliu liuhusi hamenus emisaun gas ne’ebé halo efeitu estufa 5%, iha média,” Dehan Fidelis iha auditóriu Ministériu Finansas Aitarak Laran, Kuarta 1/06.
Entertantu emenda neé ratifika ona husi nasaun 147.
