Reportajen David da Costa Gusmao
VIII Governu Konstitusionál liuhusi Konsellu Ministru, Delibera hodi Autoriza Ministru Transportes no Komunikasaun (MTK), Ministru Koordenadór Asuntus Ekonómikus (MKAE), Ministra Saúde(MS), Ministru Asuntus Parlamentares no Komunikasaun Sosiál (MAPKOMS) atu asina akordu ho governu Repúblika Populár Xina.
Porta voz Governu no Ministru Prezidénsia Konsellu Ministru, Fidelis Manuel Leite Magalhães, dehan, Konsellu Ministrus delibera hodi autoriza MTK atu halo negosia Akordu ida servisu iha Aéreu nian entre Governu Repúblika Populár Xina no Governu Repúblika Demokrátika Timor-Leste.
“Konsellu Ministru delibera hodi fó podér tomak ba MKAE, hodi asina akordu Kooperasaun Ekonómika no Téknika entre Governu Repúblika Populár Xina no Governu Repúblika Demokrátika Timor-Leste,” Dehan porta voz governu Fidelis, iha auditoriu Ministeiru Finasa Aitarak Laran, Kuarta 1/06.
Governu mós deside hodi fó podér tomak ba MS, hodi asina Akordu ida iha área Saúde nian entre Governu Repúblika Populár Xina no Governu Repúblika Demokrátika Timor-Leste.
Nune’e mós governu delibera hodi fó poder tomak ba Ministru Asuntus Parlamentares no Komunikasaun Sosiál, hodi asina akordu ida ho Administrasaun Rádiu no Televizaun Nasional Repúblika Populár Xina .
Alende ne’e governu mós fó podér tomak ba MAPKOMS, hodi asina akordu ida entre governu Repúblika Populár Xina no Governu Repúblika Demokrátika Timor-Leste ba kontinuasaun prosesu dijitalizasaun Rádiu no Televizaun Timor-Leste, no ba faze daruak projetu televizaun dijítál terrestre.
