Reportajen Santina Lucia da Costa
Fundasaun Falur Rate Laek halo asaun karidade, fo apoiu nesesidade bazika ba komunidade kbiit laek sira iha suku Loi-Huno, postu administrativu Ossu Munisipiu Viqueque, no aldeia Lia Uai Oli ho Kailatulale mak hetan uluk apoiu hirak ne’e.
Hafoin simu nesidade bazika, ba Neon Metin Xefe Aldeia Lia Uai Oli, Juvinal da Costa, hateten asaun karidade husi Fundasaun Falur Rate Laek, hodi apoiu komunidade kbiit laek sira ne’ebe mak vuneravel tebes, hodi fo fos no hahan instant.
Xefe Aldeia Lia Uai Oli ne’e informa Suku Loi-Huno total uma kain 125 mak vulneravel tebes, no Fundasaun Falur Rate Laek responde ona ba uma kain 50.
Xefe Aldeia Lia Uai Oli dehan sira fo apoiu ne’e tanba iha situasaun Serka Sanitaria nia laran, povu kbiit laek oras hanesan ne’e balun laiha hahan, tanba sira labele halo natar no toos, sira ferik katuas hotu ona, sira forsa laiha ona.
Juvinal Da Costa akresenta ema vulneravel ne’e barak los, husi aldeia Lia Uai Oli uma kain 25 de’it mak simu, barak mak la hetan, “entaun ami xefe aldeia tenki hatama tuir bazeia ba sira nia lista, se karik lista iha ami hatama hotu, iha aldeia Lia Uai Oli ne’e ema vuneravel ne’e aat liu fali ida ne’e mos iha”.
“Foin dadauk ami hatama lista ba fundasaun Falur Rate Laek, aldeia Lia Uai Oli uma kain ne’ebe vulneravel hamutuk uma kain 38, depois husi Fundasaun Falur Rate Laek simu de’it uma kain 25, entaun hau koordena ho Fundasaun tenki hasai uma kain 13, mais uma kain 13 ne’e mos hau sei esforsu-an tama husi suku, karik ajuda ruma husi doador ruma ka husi Ministeriu relevante mak mai karik, sira mos bele hetan hotu,” hateten Xefe Aldeia Lia Uai Oli, Juvunal Da Costa ba Neon Metin, 22/05/2021.
Nia rekomenda ba governu fo apoiu ba ema kbiit laek sira ne’ebe iha area rural sira, atu nune’e povu vulneravel sira ne’e bele simu netik apoiu ruma, tanba agora dadaun Fundasaun Falur Rate Laek iha hanoin ida klean liu fali governu nia serbisu, tanba tuir lolos ida ne’e serbisu governu nian.
Iha fatin hanesan komunidade Celestina da Costa hatoo agradese wa’in ba Fundasaun Falur Rate Laek ne’ebe fo apoiu ona ba sira, “ami senti kontente tebes, wainhira hetan apoiu husi Fundasaun Falur Rate laek, maske apoiu ne’e la barak maibe ami nafatin agradese”.
Nia dehan nesesidade ne’ebe simu mak hanesan kada uma kain fos saka ida ho mie instant falun 20.
“Agora dadaun moras COVID-19 ne’e sae makaas iha Munisipiu Viqueque, ami tauk labele lao ba mai, ami atu ba faan ami nia produtu lokal mos ami tauk, ami lor-loron iha uma de’it, ami atu han saida, sorti ona fundasaun iha hanoin fo apoiu ona ami,” dehan Celestina da Costa ho oin triste.
