Home Feature Buka Moris Husi Fa’an Malus, Feliciana: Tur De’it Iha Uma, Se Mak...

Buka Moris Husi Fa’an Malus, Feliciana: Tur De’it Iha Uma, Se Mak Fó Han

239
0
Feliciana Mendonça faan hela malus. [Foto: Joselina | 25.05.2021]

Reportajen Joselina dos Santos

La tane liman, la’ós atu hein de’it hodi hein ema lolo liman ba, maibé oinsá hikis kosar ben, la depende ba ema, oinsá luta hodi sustenta nia moris, sa tan iha situasaun pandemia COVID-19, ema hotu tenke buka dalan, oinsá kontinua moris.

Feliciana Mendonça, fuuk komesa mutin, oin komesa namkurut tanba idade, maibé la hamate nia vontade hodi fa’an sasán maski hasoru rai rahun, udan been ka loron manas. Importante ba nia mak oinsá ohin loron nia bele hetan netik.

Surtu COVID-19 ne’ebé fó risku ba ema sira ho idade 60 ba leten, tanba hare ba imunidade ne’ebé komesa fraku, maibé ba Feliciana, nia deside fa’an tanba nia nesesidade mós importante, maski governu implementa hela serka sanitaria no konfinamentu obrigatóriu

Jornalista Neon Metin hakbesik no dadalia ho inan faluk ne’e, tur sadere iha besi iha edifísiu Ministériu Transporte Komunikasaun nia oin, hodi fa’an malus, bua, tabaku, ahu, sabraka no mina fore.

Nia dehan fa’an sasan hirak ne’e tanba nesesidade mak obriga, tanba loron kalan iha uma de’it oinsa mak nia bele hetan osan.

“Hau mak hakarak duni atu fa’an sasan sira ne’e, tanba se ita tur de’it iha uma, se mak fo han ita, se ita hamlaha karik atu husu ba se. Hau fa’an iha ne’e tinan ha’at ona, liu husi ida ne’e mak ha’u foin hetan osan maibe iha serka sanitaria no konfinamentu obrigatoriu ne’e, walikota sira mai foti ha’u nia sasan so’e tiha, hau la tauk nafatin kontinua fa’an,” dehan Feliciana ba Neon Metin iha Merkadu Lama Kuarta, 19/05.

Feliciana dehan, bainhira nia mai fa’an sasan nia fatin ne’e permanente moru lolon, sai husi uma husi oras tuku 8:00 dadeer, sasán ne’ebe nia fa’an sosa husi ema seluk mak fa’an tutan.

“Sasan hirak ne’ebe ha’u fa’an futun ida ho presu $0.50, maibe konforme ema hola karik sorte iha loron ida hetan netik $50.00 ba leten, maibe se sorte laiha loron ida hetan $1.00-2.00 hanesan ne’e, ha’u hateke ba bandeira iha Kantor Transporte Komunikasaun nia ne’e tun ona entaun pasti kalan ona pasiénsia fila de’it uma,” nia tenik.

Inan faluk Feliciana husu ba governu atu loke fila fali dalan, atu nune’e sira bele buka osan hodi sustenta ba moris, se loron kalan mak iha uma de’it, se mak atu fo osan para ami hola hahán hodi han.

La fasil ba Feliciana no inan feto sira seluk hodi haka’as an, oinsá buka moris. Importante ba sira la tur hodi tane liman, bainhira sira dehan sei bele, la iha liafuan kolen atu hikis sira nia kosar been.

Print Friendly, PDF & Email

LEAVE A REPLY

Please enter your comment!
Please enter your name here