Home Notisia Tribunal Adia Julgamentu ba Richard Dascbach Dala-3, JU,S Konsidera La Respeitu...

Tribunal Adia Julgamentu ba Richard Dascbach Dala-3, JU,S Konsidera La Respeitu Vitima Sira

809
0
Situasaun julgamentu kazu Topu Honis iha tribunal Oe-cusse, 23/02. [Foto: David da Costa | 23.02.2021]

Bainhira hetan tiha informasaun hosi Ministériu Públiku katak Painél Juiz determina adia julgamento ne’ebé marka iha loron-24 fulan-Maiu ba loron-7 fulan-Juñu, JU,S (Juridiku Sosial) publikamente hato’o ninia insatisfasaun no expresa katak desizaun ne’e la respeitu vitima sira, no hakarak atu halo keixa ba Konsellu Superior Majistratura Judisiál kona-ba violasaun regra prosesuál liu hosi Press Release nebe publika iha pagina Facebook JU’S nian, ohin, 25/05.

Iha komunikadu imprensa ne’e JU,S deklara ninia insatisfasaun ba desizaun husi Tribunál, ne’ebé la hatudu respeitu ba vítima nia pozisaun no la hatudu seriedade atu konklui prosesu ne’ebé rejistu ba dala ikus besik iha tinan 3 liubá. JU,S hakfodak ho desizaun Tribunal no konsidera katak desizaun ne’e sei impaktu ba konfiansa ne’ebe fo ona ba Tribunal hodi hare kazu Topu Honis nian.

“JU,S iha duni konfiansa ba sistema justisa iha Timor-Leste, se la’e ohin ami la marka prezensa iha Oecusse. Ami tenke onestu katak desizaun foin lailais halo ami hakfodak no impaktu duni ba konfiansa ne’ebé ami fó ba Tribunál. Ami espera katak Tribunál no mós Ministériu Públiku sei haree ho seriedade liu kazu ida-ne’e no foti asaun konkretu atu asegura katak sei la’o ba oin,” Maria Agnes, Sosiu ida ba JU,S haktuir iha komunikadu imprensa.

“Desizaun hosi Tribunál halo la hó xamada ba audiénsia no ignora realidade katak membru ida hosi Ministériu Públiku sei iha tribunál iha oras audiénsia. JU,S iha intensaun atu hato’o keixa ba Konsellu Superior Majistratura Judisiál kona-ba violasaun regra prosesuál ne’ebé determina labele adia audiénsia bainhira prokuradór no defeza titulár la marka prezensa,” Komunikadu Imprensa ne’e esplika.

Komunikadu imprensa ne’e mos hatete katak Iha fulan Maiu 2021, aviaun ZESSM semo ona dala rua no ró to’o iha Oecusse iha 25 Maiu maibe Arguidu no/ka ekipa la tuir viajen sira-ne’e.

“COVID-19 lori dezafiu ba deslokasaun maibé Juiz no interpreter bele iha Oecusse, Ministériu Públiku iha Oecusse no ekipa JU,S mós iha Oecusse. Oinsá mak arguidu no nia ekipa labele mai?”, sósiu ida hosi JU,S Maria Agnes Bere hatete.

Bainhira husu perguntas mak relasiona ho estadu emerjensia no serka sanitaria nia impaktu ba prosesu julgamentu Richard Dascbach nian, JU,S realsa katak maski nune’e justisa tenke lao nafatin. 

“Justisa tenke la’o nafatin mezmu iha tempu COVID-19. Dekretu Prezidente Estadu Emerjénsia reitera ida-ne’e ho momoos. Ami la nega katak iha duni difikuldade oin-oin atu halo movimentasaun, maibé ema hotu-hotu tenke hakruuk ba Tribunál nia notifikasaun no tenke prontu atu koopera ho justisa. Ne’e mak Estadu Direitu ne’ebé ita harii iha rai ida-ne’e ho raan no kosar-been,” Maria Agnes esplika liutan ba Neon Metin via WhatsApp.

Ajensia konsultoria ida ne’ebe fornese servisu jurídiku ho espesialidade iha Direitu Umanu, Igualdade Jéneru, Direitu Labarik, Direitu Ekonómiku-Sosiál, Asesu ba Justisa no Estadu Direitu ne’e mos esplika katak Tribunal loloos ne’e iha kapasidade ba halo prosesu julgamentu.

“Mezmu ho difikuldade, Tribunál iha kapasidade atu haruka ninia juís no intérprete, Ministériu Públiku bele mós asegura prokuradór titulár kazu bele mai desloka iha Oecusse no ekipa JU,S mós bele. Aviaun semo dala 3 iha fulan-Maiu, ró mós mai, maibé ekipa defeza hili atu la uza transporte sira-ne’e,” Maria Agnes esplika liutan.

JU,S mós esplika liu hosi WhatsApp katak sira la komprende posizaun hosi Tribunál. Fallansu mós iha hosi Ministériu Públiku, ne’ebé la informa formalmente katak sira iha ona Oecusse no sei hein teste COVID-19 negativu.

Parese Tribunál konsidera katak tenke rona filafali arguidu tanba regra prosesuál katak depois loron 30 entre tempu audiénsia rua hosi julgamentu ida evidénsia la efikás ona. Maibé tuir loloos tanba rona ona deklarasaun dala ida hosi arguidu, ami hosi JU,S kompreende katak la iha devér hosi Tribunál atu rona fali arguidu, maibé ne’e direitu hosi arguidu nian, no tanba arguidu la marka prezensa tanba lakohi mai, entaun Tribunál bele kontinua julgamentu atu rona vítima sira.

JU,S expresa katak karik Tribunál konsidera katak nafatin tenke rona arguidu, mós bele iha solusaun simples loos ne’ebé Tribunál Oecusse bele halo: uza vídeu konferénsia hanesan Tribunal Suai halo ona semana hirak liubá. 

Tribunál adia prosesu julgamentu dala 3 tiha ona no tuir JU’S adia julgamentu ne’e bazeia ba pedidu no inasaun hosi defeza. JU,S Jurídico Social, nu’udar empreza sosiál ne’ebé ninia advogado reprezenta vítima 15 hosi abuzu seksuál hasoru eis-Padre, la satisfeitu ho desizaun hosi Tribunál atu adia julgamentu.

To’o notisia ne’e publika Neon Metin tenta halo konfirmasaun via telefone ho advogado arguido Richard Dascbach nian maibe la konsege hetan kontaktu.

Kazu Topu Honis mak nudar kazu pedofilia ne’ebe mosu ba publik dahuluk iha Timor-Leste. Kazu ne’e involve eis-Padre Richard Dascbach hosi kongregasaun SDV nian. Ho rezultadu investigasaun Kongregasaun Dutrina ba Fe nian iha Vatikanu, Amo Papa Francisco hasai tiha ona Richard Dascbach nudar padre iha tinan 2018. Eis-Padre ne’e agora dadaun hetan kondenasaun ho kazu pedofilia, pornografia labarik no violensia domestika.

Print Friendly, PDF & Email

LEAVE A REPLY

Please enter your comment!
Please enter your name here