Reportajen Joselina dos Santos
Estudante no Juventude Ponta Leste (EJPL) halibur hamutuk ho Komunidade Aldeia Gideon, Suku Vila-Verde, Postu-Administrativu Vera-Cruz Munisipiu Dili hodi ezije ba Estadu liu husi VIII Governu Konstituisional atu hapara Konfinamentu Obrigatoriu (KO)
Liu husi konferénsia imprensa Porta Voz Eliziário Nazareth Pinto haktuir se governu hakarak implementa Konfinamentu Obrigatóriu iha area ne’ebé afetadu ba COVID-19 entaun tratamentu ba komunidade tenki emerjensia ka urjenti. Liu husi fahe nesesidade bázika ba komunidade iha territóriu ne’ebé aplika konfinamentu obrigatoriu.
“Ami rekere ba Estadu Timor-Leste liu huis VIII Governu Konstitusionál atu halo tratamentu hanesan ba motorista sira, no mós husu ba Institutu Seguransa Sosiál (ISS), atu hadi’a sira nia sistema entendimentu ba iha traballadór kompañia, motorista no vendedór ambulant sira ne’ebé asesu ba subsídiu seguransa sosiál nian”, dehan Eliziário, iha Vila-Verde, 25/05.
Sira husu mós ba Ministériu Edukasaun Juventude no Desportu (MEJD) atu hapara eskola online, tanba la garante kualidade edukasaun iha Timor-Leste.
EJPL Rekomenda ba VIII Governu Konstitusionál atu fo subsídiu $100 ba kada uma kain tanba liu husi implementasaun Serka Sanitaria no Konfinamentu Obrigatóriu, maioria komunidade laiha rendimentu atu selu kost no sosa hahán.
Rekomenda mós ba governu loke dalan nune’e transporte públiku ba munisípiu bele halo movimentu estudante no komunidade ne’ebé hakarak atu fila ba munisípiu bele ba, importante mak aprezenta sira nia rezultadu teste swab no karta viajen no kumpre regra Organizasaun Mundial Saude (OMS).
“Iha oportunidade ida ne’e, ami hakarak aproveita fo solidaridade ami nia maluk Estudante no komunidade Atoni oan sira, atu ezije ba Prezidente RAEOA ho nia adjuntu atu aselera lalais prosesu tranportasaun ema hirak ne’e ba Oe-cusse iha tempu badak. Ikus liu, ami relembra fila fali ba timoroan tomak, liu liu lideransa nasional hamutuk fila fali hanesan iha tempu uluk, hodi junta forsa atu bele manan tan funu bo’ot ida ne’e,” nia dehan
Iha fatin hanesan, Negosiante Vila-Verde Antonio G. Soares hateten durante fulan 3 nia laran Lockdown, hasoru susar tanba la fa’an sasán, dezastre natural akontese halo sasán hotu la aproveita
“Ha’u sente triste tebes, to’o agora iha fatin ida ne’e nunka ema ida mak mai tau matan, ami ne’e hetan afetadu ou lae. Ohin loron mak maun alin sira mai ami nia leet, maski ami loke hanesan ne’e maibé susar ema hola transporte la halai oinsa mak ema bele hola to’o kalan de’it, ami pasiénsia taka fali ida ne’e”, dehan Antonio.
Komunidade Adriana Soares sente triste tebes ho Serka Sanitaria no Konfinamentu Obrigatóriu ne’ebé governu aumenta fó impaktu ba sira tanba la fa’an sasán, susar atu hetan osan hodi responde ba nesesidade uma laran.
