Reportajen David da Costa Gusmao
Ministériu Saúde (MS) liu hosi Sala Situasaun Centro Integradu Jestaun Krize (SS-CIJK) ohin rejista tan sidadaun feto ho idade 62 hakotu iis iha sala izolamentu Vera Cruz mais ou menus tuku 11:00 otl.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araujo informa Ministériu Saúde rejista tan ona obitu nain ida ka mate ho COVID-19, feto idade tinan 62, timoroan hela iha Maliana, iha loron 13 Juñu, enkamiña husi Hospital Referensia Maliana, ho aviaun ambulansia, ho dignoze traballu sindroma insufisiensia respiratoria aguda (SIRA), ka susar/difisil atu dada-iis tanba COVID-19 (rezultadu PCR pozitivu ho CT-cycle threshold-21,5).
Nia esplika matebian la iha istoria moras seluk, maibe mear ho iis-boot iha uma durante semana ida nia laran ona.
“Iha fatin isolamentu Vera Cruz ita ekipa mediku sira halo re-avaliasaun ba dignostiku, no to’o iha konkluzaun katak matebian iha ona septic shock tanba pneumonia ne’ebe provoka husi COVID-19,” dehan Dr. Rui liu hosi komunikadu imprensa ne’ebé Neon Metin asesu iha loron, Segunda, 14/06.
Nia haktuir matebian hetan tratamentu tuir protokolu ne’ebé iha, inklui tratamentu ho oksijéniu, maibé ohin dader tuku 11: 40 iis-kotu tanba respiratória failure no multiple organ failure.
Nia salienta ohin familia koordena hela ho ekipa saúde atu hala’o funeral tuir protokolu ne’ebe adopta iha Timor-Leste.
Entertantu dadus jeral ba COVID-19 ohin loron 14 Juñu tinan ne’e, kazu foun 56, kazu rekuperadu 102, kazu ativu baixa 1489, kazu obitu ohin 1, no total obitu hamutuk 19 no total kazu konfirmadu.
