Home EduTek AJTL Realiza Treinamentu Jornalizmu Ambiental, KI: Ambiente Perspetiva Importante Iha Area Jornalizmu

AJTL Realiza Treinamentu Jornalizmu Ambiental, KI: Ambiente Perspetiva Importante Iha Area Jornalizmu

945
0
AJTL hamutuk ho UNDP, KI no partisipante sira iha salaun Joao Paulo. [Foto: Yano Saores | 16.06.2021]

Reportajen Santina Lucia da Costa

Asosiasaun Jornalista Timor-Leste (AJTL) realiza treinamentu kona-ba Jornalizmu Ambiental  ho tema “Salva Ita nia Rai,” ba jornalista  husi media eletrónika, jornál, radio no media online durante loron tolu hahu husi loron 16-18 Juñu iha salaun Joao Paul, Comoro.

Tuir Prezidente Asosiasaun Jornalista Timor-Leste (AJTL,) Zevonia Vieira katak objetivu husi treinamentu ne’e mak oinsá atu hasae koñesimentu jornalista sira nian ,hodi komprende kle’an oinsá halo kobertura kona-ba meiu ambiente, liuliu kona-ba bio diversidade no mós mudansa klimátika.

Prezidente AJTL haktuir jornalista sira ne’ebé mak partisipa iha treinamentu ne’e mai husi rádiu, televizaun, jornál ho media online,  loloos partisipa formasaun ne’e ema na’in 25, maibé tanba COVID-19, redús tiha ba na’in 10 tuir protokolu saúde nian.

“Objetivu husi ida ne’e atu hasae kapasidade jornalista ne’e la’os tékniku de’it, maibé oinsá jornalista hatudu ninia kualidade no intelektualidade halo advokasia ba iha kobertura liga ho issue meiu ambiente, tanba ita haree katak, dezastre ne’ebé akontese tinan-tinan fó impaktu ba komunidade sira, ne’ebé liuliu iha area risku husi inundasaun,” hateten Prezidente AJTL, ba jornalista iha salaun Joao Paul, Comoro, 16/06.

Prezidente AJTL dehan jornalista sira iha papél importante, halo advokasia hodi fahe informasaun ne’ebé edukativu ba ninia komunidade sira, atu bele kuidadu-an oinsá proteje no mós kuidadu atu la bele akontese inundasaun, no mós kontinua hamutuk hodi proteje liuliu iha situasaun mudansa klimátika.

Zevonia Vieira akresenta durante ne’e formasaun kona-ba meiu ambiente ne’e iha, maibé ninia porsentu sei ki’ik, ita haree kobertura ne’ebe sei domina mak area polítika, no presiza haforsa liután informasaun sira konaba meiu ambiente hodi fo informasaun ne’ebe halo komunidade iha koñesimentu oinsá koidadu no proteje planeate ne’e.

Iha fatin hanesan, Prezidente Konsellu Imprensa (CI) Virgilio da Silva Guterres, hateten kongratula AJTL ho inisiativa ida ne’e, no mós kongratula UNDP ba kooperasaun ne’ebé fasilita jornalista sira, esplora koñesimentu bele ajuda espesífiku liu iha koñesimentu kona-ba meiu ambiente.

“Hau hanoin meiu ambiente kleur tebes ona mak sai hanesan perspetiva ne’ebé importante hanesan nesesáriu iha area jornalizmu ninian, nia mai hamutuk ho perspetiva sira seluk ne’ebé ita hotu hatene jéneru no mós perspetiva legal, tanba ne’e mak Konsellu Imprensa hakarak apresia inisiativa ida ne’e,” hateten Prezidente KI.

Virgilio realsa tan katak depois tinan 20 hetan restaura independénsia husi ukun na’in sira to’o mai, dala ruma ita nia konsentrasaun barak liu ba oinsá halo rekonstrusaun nasionál, no rekonstrusaun nasaun ne’e dala ruma mai fó hanoin mai ita edifísiu konstrusaun fízika sira ne’e, ita la hanoin kona-ba rekonstrusaun sira seluk, katak durante kolonizasaun, ita nia sofrementu ne’e la’os sofrimentu fíziku de’it, maibé ita nia ambiente mós sofre, entaun prosesu dezenvolvimentu rekonstroi ne’e, ita mós hanoin rekonstroi ita nia natureza, ida ne’e mak pontu importante ba ita sira ne’ebé serbisu iha area jurnalizmu atu fahe informasaun.

Nune’e, Deputy Resident Representative UNDP Timor-Leste, Lazima Onta Bhatta dehan treinamentu ida ne’e espesiál tebes, issue ne’ebé ita foti ne’e foka duni ba isu hanesan ambiente no mós mudansa klimátika, ita hotu hatene katak, dezastre naturais, bee sa’e, ida ne’e afeta tebes ba ita nia moris.

Deputy Resident Representative UNDP/PNUD Timor-Leste subliña jornalista nia papél importante tebes iha asuntu ida ne’e, bele eduka ita nia-an, eduka ita nia komunidade, no bele bolu atensaun ba ita nia polítiku na’in sira kona-ba issue meiu ambiente.

“UNDP iha ninia projetu sempre fó importánsia ba hasae kapasidade nasionál, ami mós kontenta tanba projetu ida ne’e bele serbisu hamutuk ho na’in hira sira hodi kapasidade iha area ida ne’e, loron tolu ne’e la sufisiente para atu hatene buat hotu, pelu menus iha oportunidade atu hatene aprende buat ruma,” dehan Deputy Resident Representative UNDP, Lazima Onta Bhatta.

Programa Media no Ambiental ne’e hetan apoiu finanseiru hosi UNDP durante fulan neen. Liu hosi programa ne’e, AJTL mos produs video Public Service Announcement (PSA) no Talkshow konaba meiu ambiente iha Radio Televisaun Timor-Leste.

Print Friendly, PDF & Email

LEAVE A REPLY

Please enter your comment!
Please enter your name here