Home Notisia ANPM Entrega Dokumentu Lisensa Ambientál Ba TR, Halo Perfurasaun Mina Matan Iha...

ANPM Entrega Dokumentu Lisensa Ambientál Ba TR, Halo Perfurasaun Mina Matan Iha Suai

683
0
ANPM entrega dokumentu lisensa ofisial ba TR. [Foto: Santina | 06.07.2021]

Reportajen Santina Lucia da Costa

Autoridade Nasionál Petróleu no Minerais (ANPM) entrega dokumentus lisensa Ambientál ba Timor Resources (TR), atu halo perfurasaun ba mina matan iha Suai, no tuir planu perfurasaun ne’e sei hahú hala’o iha fulan Agostu ka Setembru.

Tuir Prezidente ANPM, Florentino Soares Pereira hateten, ohin marka eventu importante ida iha jornada indústria petrolíferu Timor-Leste nian tanba pela primeira vez ita fó ka atribui lisensa kategoria A, Lisensa ambientál, ba iha atividade up stream nian, importante tanba depois de 50 anos ita laiha esplorasaun perfurasaun iha rai maran, no ohin ita bele fó lisensa atu ekipa no mós kompañia sira  husi Timor Resources bele hakat ba perfurasaun, maibé sira presiza tan buat balun hanesan sertifika sira presiza komplementa.

“Ita nia planu mak iha fulan Agusto ka Setembru mais tarde atu perfurasaun ne’e bele realiza, no Lisensa Ambiental nene normal, iha kualker projetu hotu-hotu ne’ebé mak ho risku tenke halo estudu impaktu ambientais no mós fornese dokumentus deklarasaun impaktu ambiental no tempu ne’e kedas planu jestaun ambiental,” hateten, Prezidente ANPM, Florentino Soares Pereira iha Suai Room, Timor Plaza.

Prezidente ANPM dehan ohin fó lisensa ida ne’e, ba dokumentus sira ne’ebé hatama atu sira bele prosede ba iha perfurasaun, maibé ANPM iha mós rekezitus ida tan tuir industria petrolifera nian presiza hatama ka kompleta certificate (sertifikadu)

Florentino hatutan iha lisensa ida ne’e, mai ho aneksu, tuir kondisaun tomak oinsá atu halo perfurasaun ida ne’e, maibé iha padraun mais pratika internasionál ne’ebé mak ita sempre hakruk, ba kestaun ambiente nian ita liga liu ba planu jestaun ambientál, iha planu jestaun ambientál empreza garantia atu proteje ambiente no mós receptors no hirak ne’ebé mak hela besik iha fatin perfurasaun.

Nia salient iha mós certificate, nune’e haree liu ba asuntu saúde ho seguransa, atu garantia katak reseptores tantu ambiente no mós komunidade sei la hetan efeitu negativu husi prosesu perfurasaun.

Iha fatin hanesan Country Manager Kompañia Timor Resources, Filomeno de Andrade Tilman hateten bainhira simu ona lisensa ambientál nian, Timor Resource agora bele hakat ba oin atu bele komesa halo preparasaun ba halo perfurasaun ninian, ho prosesu ida ne’e nian oras ne’e daudaun ekipamentu iha Suai monta tiha ona, hein de’it kontratór sira seluk mai hanesan Schlumberger, Mantra atu bele lori sira nia ekipamentu kontrolu nian mai, atu nune’e bele hahú hala’o perfurasaun.

“Tuir programa ami halo estimativa katak, iha fulan Setembru nia laran karik iha loron 21 Setembru hanesan ne’e, ami bele hahú ona hala’o perfurasaun iha Suai, primeira perfurasaun nian, iha Suai ami planu atu hala’o perfurasaun iha fatin rua, ida iha area Motai, no iha area Kamanasa, Area Motain mak sei halo Perfurasaun uluk.” hateten, Country Manager Kompañia Timor Resources, Filomeno de Andrade Tilman.

Country Manager Kompañia Timor Resources, hatutan, Perfurasaun ba area Motai sei dura mais ou menus tuir ami nia estimativa loron 17, depois tuir ida ne’e sei iha loron 11 atu dezmonta ekipamentu perfurasaun nian hodi mobiliza ba fali iha segundu posu perfurasaun nian. Ami hein katak, iha fulan Setembru halo, ida fali halo iha fulan Outubru besik remata hanesan ne’e hala’o segundu perfurasaun ninian.

Nia akresenta Timor Resources tuir kompromisu ne’ebé halo hakarak atu uza rekursu humanu Timor nian, iha prosesu ida ne’e, por ezemplu iha estudu sízmiku ami 97% traballadór hirak ne’e timoroan oan co-training iha Suai, iha Manufahi nian 98% Timoroan.

“Agora ba iha perfurasaun ne’e sistema ida ké difisil uitoan, perigu uitoan, ne’ebé ita tenke haree ema ne’ebé iha esperiénsia maka’as tebes mak hala’o serbisu hirak ne’e, minimu ema sira ne’ebé professional ne’e, pelu menus tinan 10 to’o tinan 20 resin mak tenke hala’o, tanba Timor Source nia objetivu prinsipál mak buat ida safe ho seguransa ne’e.” dehan Filomeno.

Print Friendly, PDF & Email

LEAVE A REPLY

Please enter your comment!
Please enter your name here