Home Notisia OJE 2022, FONGTIL Apresia Governu Tau Prioridade Ba Setór Produtivu no Kore-an...

OJE 2022, FONGTIL Apresia Governu Tau Prioridade Ba Setór Produtivu no Kore-an Hosi Dependénsia FP

1273
0
FONGTIL halo konferensia imprensa. [Foto: Joselina | 08.07.2021]

Reportajen Joselina dos Santos

Forum Organizasaun Naun Governamentál Timor-Leste (FONGTIL), serbisu hamutuk ho Rede Coalition For Education (TLCE), Core Group Transparency (CGT) no Rede Feto Timor-Leste hatoo apresiasaun ba VIII Governu no Parlamentu Nasional tanba tau prioridade  ba setór sosial, edukasaun saúde, ambiente infraestrutura no setór produtivu sira liu hosi Orsamentu Jeral Estadu (OJE) 2022

Liu hosi konferénsia imprensa, Direitor Ezekutivu FONGTIL, Daniel Santos do Carmo hateten Governu Timor-Leste tama hikas fali ba preparasaun planu no orsamentu, hodi kontinua misaun ba libertasaun povu husi ki’ak no mukit. Nune’e VIII Governu hahú diskusaun iha jornada orsamental ba Orsamentu Jeral Estadu 2020 iha loron 29 Juñu 2021, ho tema kualidade orsamentu kreximentu inkluzivu no sustentávelél.

“Natureza husi debate iha jornada orsamental mak atu define propriedade nasionál ba tinan fiskal. Dezafiu komun sira ne’ebé mos nafatin hetan atensaun máxima husi diskusaun, mak hanesan situasaun Covid-19 iha Timor-Leste, inundasaun no rai monu,” dehan Direitor Ezekutivu Fongtil ba jornalista sira liu iha salaun Konferénsia FONGTIL Kaikoli, 08/07.

Nia dehan iha jornada Orsamental ba OJE 2022 nian ho tetu orsamentu fiskal US$ 1.5 billoens define ona programa propritárius 6 maka hanesan kapital sosiál (Edukasaun, formasaun professional no saúde), abitasaun no inkluzaun sosiál, seitor produtivu (agrikultura, turizmu, ambiente no konektividade) no dezenvolvimentu setór privadu dezenvolvimentu rural no governasaun.

Sosiedade sivíl apresia tebes ba sinseridade governu nian ne’ebé mai duni ho fundamentu kapasidade iha análiza kontekstual, no análiza situasaun Timor-Leste nian, ne’ebé bele identifika setór prioritarius ne’ebé aserta duni ba nesesidade no dezafius povu no ba sustentabilidade Timor-Leste nu’udar estadu.

“Sosiedade sivil fiar katak ho definisaun progrma prioridades nasionál ba tinan fiskal 2022, sei tulun atu hadi’a ita nia edukasaun iha nia asesu no nia kualidade. Ita enfrenta daudaun dezafiu iha prosesu dezenvolvimemtu edukasaun, iha aspeitu infraestrutura eskola, kurríkulu, kualidade no kuantidade professors, materiais aprendizajem no fasilidade apoiu sira seluk,” nia tenik.

Situasaun ne’e sai defisil  liu tan bainhira ho ezisténsia Surtu COVID-19 iha tinan rua ikus, ne’ebé destroy kalendáriu akademika, obriga atu tenke halo suspensaun ba aula prezensa até ezame sira. Halo Timor oan sira labele hetan oportunidade di’ak liu atu dezenvolve sira nia koñesimentu no abilidade.

Nune’e ho definisaun setór saúde nu’udar programa prioridade iha OJE 2022, sei tulun Timor oan sira atu asesu ba prestasaun serbisu ne’ebé di’ak, no besik iha sira nia hela fatin, hetan konsulta tratamentu regular husi médiku matenek, no partera professionál liu-liu ba labarik sira no inan isin rua sira iha sentru saúde ne’ebé kualidade, hado’ok Timor oan sira husi moras kontajiosa oin-oin inklui Surtu Covid-19.

Iha aspetu bee-moos saneamentu, sei tulun familia sira hotu hodi asesu ba bee-moos ne’ebé seguru no sustentavél liu husi hadi’a infraestutura bee-moos no saneamentu hodi garante distribuisaun bee-moos ba ema hotu.

“Ita nia produsaun agrikola sei aumenta liu tan, hodi haforsa ita nia rezilensia no soberania ai-han, familia agrikultores sira sei kontinua halo produsaun no sei hetan rendimentu bo’ot hodi bele hadi’a ekonomia familia nian. Iha tempu hanesan mós buka atu kore a’an husi dependensia ba seitor minarai no gas liu dezenvolvimentu iha agrikultura no turismu,” dehan Daniel.

Sosiedade sivil louva vontade governu nian, hodi bele tau prioridade ba asuntu ne’ebé liga ho povu nia moris. Sosiedade sivíl apresia governu, tanba tau prioridade ba setor produtivu nu’udar dalan ida kore aan husi dependensia ba fundu petrolíferu (FP) no hahú daudaun diversifikasaun ba fundu petrolíferu.

Sosiedade sivil deklara apoiu tomak ba inisiativa governu nian hodi hadi’a povu nia moris liu husi OJE 2022, no sei mobiliza mós apoiu husi komunidade Timor-Leste no komunidade Internasionál ba polítika brillante governu Timor-Leste ida ne’e.

 Sosiedade sivil mos sei halo sosializasaun maka’as liu tan, no halo konsiensializasaun ba komunidade atu bele simu vasina hodi kria kondisaun ba governu ita bele serbisu diak liu tan iha implementasaun programa prioritárius sira.

Print Friendly, PDF & Email

LEAVE A REPLY

Please enter your comment!
Please enter your name here