Home Notisia APFTL – Oxfam Organiza Espozisaun Juvenil, Promove Joven Sira Serbisu Iha Setór...

APFTL – Oxfam Organiza Espozisaun Juvenil, Promove Joven Sira Serbisu Iha Setór Produtivu

1016
0
espozisaun juvenil iha SEJD. [Foto: Rosemery | 13.08.2021]

Reportazen Santina Lucia da Costa

Alumni Parlamentu Foinsa’e Timor-Leste (APFTL), serbisu hamutuk ho OXFAM realiza programa espozisaun hodi selebra loron Mundial Juventude ne’ebé monu iha 12 Agostu.

Prezidente APFTL, Zaulino Gomes da Silva hateten joven sira hahu ona iha parte vida produtivu sira, oinsá maka estimula sira para sira bele dezenvolve di’ak liu tan, hakbi’it liu tan, ba oin sira bele dezenvolve liu tan, bele kontribui ba ekonomia nasaun nian.

APFTL espera katak ho espozisaun ida ne’e sai mós referénsia ba governu, atu hateke ona katak, joven hahu ona hola parte iha vida produtivu, laos konsidera setór agrikultura hanesan fo’er maibé konsidera ona katak setór ida ne’ebé mak bele kontribui ba iha ekonomia nasaun.

Iha fatin hanesan, Reprezentante OXFAM, Adilsonio da Costa Junior hateten Oxfam serbisu hamutuk ho APFTL atu ajuda grupu joven sira iha munisípiu no kapitál, ne’ebe iha potensia halo kreativade no halo ona investimentu iha setór produtivu sira.

“Fiar katak, saida mak agora daudaun kontribui ona ba prosesu dezenvolvimentu nasaun nian, maski sei ki’ik, ita nafatin enkoraja sira, ita nafatin besik sira katak, investimentu iha setór produtivu mak sai poténsia ida, sai setór ida ne’ebé importante no bele sustenta ita nia ekonomia ba oin”, dehan Strategic and Engagement Lead Oxfam, Adilsonio da Costa Junior, iha SEJD, 12/08.

Nia dehan ida ne’e oportunidade diak ba joven sira, nafatin promove talentu sira, hatudu kriatividade, nune’e ba oin ita nia ukun na’in sira bele haree, no sira mós bele investe di’ak liu tan, sira bele tau orsamentu ne’ebé adekuadu, bele apoiu rekursu oioin, atu nune’e ita bele hadi’a di’ak liu tan ita nia dezenvolvimentu setór produtivu, liuliu iha setór agrikultura no setór seluk,” informa Adilsonio.

Nune’e mós, Diretór Jerál Juventude iha  Sekretariu Estadu Juventude Desportu (SEJD), David Tomas de Deus, akresenta liga ho tema selebrasaun mundiál juventude hateten, “transforma sistema ai-han juventude nia inovasaun ba ema no planeta ninia saude”,  Ita mós desidi tema nasional ida mak, “Papel juventude garantia produsaun ai-han produtivu no ambiente saudavél.”

Nia dehan SEJD tinan ida ne’e lansa ona programa estímulu empreendedorizmu sosiál ba joven sira iha suku, oras ne’e daudauk iha territóriu laran tomak, ita nia joven sira no grupu sira hatama ona aplikasaun atu hetan apoiu ka bolu dehan fundu estímulu, para joven sira hahú kontinua dezenvolve sira nia kriatividade produtivu ida ne’e.

“SEJD komitmentu boot atu fó apoiu dezenvolve kriatividade produtiva joven sira nian, atu nune’e bele kontribui ba rekuperasaun ekonomia iha ita nia rain, no mós kontribui ba produsaun ai-han ne’ebé nutritivu atu nune’e ita nia nasaun bele moris iha saudavél.” Afirma David Tomas de Deus.

Diretór Nasionál Agro-Komersiu no Kooperasaun Setór Privadu iha Ministériu Agrikultura no Peska (MAP), Fernando Egidio Amaral hateten Ministériu Agrikultura prontu para apoiu juventude sira, ho nune’e juventude sira nia kriatividade labele namlaek de’it iha dalan klaran, maibé tenki liga malu metin tun to’o iha kraik.

Fernando Egidio, hatutan atu labele hakotu produtividade iha agrikultura, tenki asegura indústria, papel setór privadu, empreendedorizmu ne’ebé maka prosesa ita nia ai-han sira atu sai ba indústria ne’ebé  ita konsumu ba iha kosmetika, depois neneik ita hakarak transforma ita nia produtu sira hanesan nú nian bele sai gazolina no mós bele sai aftur.

Atividade espoziasaun ne’ebe halao hetan apoiu fundu liu hosi governu Australia

Print Friendly, PDF & Email

LEAVE A REPLY

Please enter your comment!
Please enter your name here