Reportajen Joselina dos Santos
Ministru Asuntu Parlamentár Komunikasaun Sosiál (MAPKOMS), Francisco Martins D. P. Jerónimo fo tomada de posse ba vogál Konsellu Administrasaun iha Rádiu Televizaun Timor-Leste (RTTL, L.P), Altide Maria da Costa Santos hodi troka Matebian João Batista Florindo da Costa sai hanesan vogál Konsellu Administrasaun Empreza Públika iha (RTTL, L.P).
“Ohin ita bele prienxe fila fali estrutura liu-liu iha Vogál Konsellu Administrasaun RTTL,L.P nian, atu nune’e bele kompleta nia membru sira, hodi bele hala’o sira nia serbisu di’ak liu,” dehan Ministru Francisco Jeronimo iha Salaun PCM Palasiu Governu, 25/08.
Governante ne’e hatutan, bu’at ruma ne’ebé presiza haree iha RTTL,LP. mak ema hotu hamutuk ho prezensa RTTL, L.P atu reforsa liu tan Prezidente nia kna’ar, atu nune’e bele haree no deside oinsá dezenvolve RTTL,L.P iha futuru.
“Fi’ar katak saida mak espekula iha dekretu lei sira ne’ebé ko’alia kona-ba estabelesimentu RTTL,L.P no mos Estatutu RTTL,L.P nian, ha’u fi’ar katak ita bo’ot sira sei halo di’ak liu, bele serbisu hamutuk ho di’ak, labele haluha bu’at ida katak RTTL,L.P Empreza Públika ne’e presiza hanoin halo oinsá mak bele dezenvolve di’ak liu, atu nune’e bele sustenta RTTL,L.P”, dehan Ministru.
Ministru dehan RTTL,L.P tenke sai Radiu Televizaun Timor-Leste ne’ebe mak povu Timor sente orgullu, no sente kontente tanba sira iha Radiu Televizaun ne’ebe mak di’ak no mos bele fornese informasaun ne’ebé mak kredivel, no bu’at hotu di’ak iha tempu tuir mai,” Ministru esplika.
Atilde iha nia kompromisu ne’e hateten sei obedese tuir Konstituisaun RDTL no ba nasaun durante iha nia mandatu ba Vogál Konsellu Administrasaun iha RTTL,L.P.
“Ha’u jura tuir regulamentu ne’ebe iha, no sei hala’o tuir funsaun ne’ebé fo ona mai ha’u, no sei tau interese aas nasaun nian, no ha’u jura sei serbisu di’ak ba públiku no serve ba komunidade, povu ho onestidade, profesionál hodi tau interese nasaun nian,” nia hateten.
Nia dehan, durante nia mandatu prontu serbisu hamutuk ho Prezidente RTTL,L.P atu hadi’a edifísiu RTTL transporte ba jornalista, no haree ba atividade funsionáriu sira nian, hodi hadi’a di’ak liu tan iha futuru, atu nune’e bele fo informasaun kredivel ba populasaun sira.
