Home Analisa Potencia Local Wisdom ba Jestaun Lixu Komunitariu

Potencia Local Wisdom ba Jestaun Lixu Komunitariu

622
0
Augusto Almeida da Silva. [Foto" Dok. privadu | 12.03.2021]

Hakerek nain Augusto Almeida da Silva

Introdusaun
Fenomena Lixu iha vida umana laos buat foun ida. Lixu sai hanesan produtu ida ne’ebe sempre iha husi aktividade umana. Husi loron ba loron ita sempre produz lixu, hahu husi kuantidade minimu to’o maksimu. Realidade ne’e hatudu momos mai ita katak lixu nunka atu lakon husi vida umana. Kestaun bot husi lixu ba vida umana mak jestaun. Jestaun ne’ebe diak sei transforma lixu sai hanesan ‘presente’ (berkat) ba nesesidade umana nian. Pelu kontratiu, jestaun ne’ebe la diak sei hamosu dezastre (bencana) ba vida umana.
Ita hare, le’e no asiste problematika lixu, iha cidade Dili. Iha kualker kantu husi bairu ida ba bairu seluk ita sempre hare fatin lixu ho nia panorama no modelu oioin. No aumesmu tempu, ita asisti ema soe lixu arbiru. Habitus soe lixu arbiru ne’e nu’udar implikasaun husi konsiensia ne’ebe mihis atu valoriza ambiente no jestaun lixeiru ne’ebe minimu.

Bazeia ba situasaun ri’il husi lixeiru ne’e, ita presija jestaun ne’ebe forte liu husi lei ne’ebe adekuadu. Hodi nune’e, liu husi artigu ida ne’e, pesoalmenta, ha’u hakarak hato’o hanoin balun oinsa ita bele hare potensia husi sabedoria lokal – local wisdom, hanesan Tara Bandu ba Jestaun Lixu
Komunitariu. Bele ka lae ita aplika potensia balun husi tradisaun Tara Bandu ba Jestaun Lixu Komunitariu, liliu iha cidade Dili? Tuir hau nia pensamentu bele. Importante mak oinsa ita nia sosializasaun. Oinsa ho Opstakulu? Opstakulu sempre iha, maibe laos la bele

Potencia Local Wisdom ba Jestaun Lixu Komunitariu
Wainhira ita rona konaba sabedoria lokal ou local wisdom, ho spontanitas ita nia hanoin foka liu ba ritual tradisional lubuk ne’ebe beiala sira valoriza iha vida moris loro-loron.

Substansi husi local wisdom maka oinsa bele organiza, hanorin no proteje balansu entre umana ho kriatura sira seluk. Substansi hirak ne’e, no fim afirma sai hanesan prinsipiu moris umana nian ne’ebe bele kontribui resoluzaun ba kestaun oioin (Geertz: 2014)

Timor Leste, hanesan nasaun ki’ik ne’ebe nakonu ho kultura lokal oioin. Nasaun ida ne’ebe bele kategoria hanesan nasaun kulturalis. Ita iha relijiaun oioin ne’ebe iha Timor Leste, maibe pratika kultura lokal nunka mout tuir fiar relijiaun ne’ebe iha. Por exemplu, husi 98% populasaun mak tuir religiaun Katolika, maibe ritual no pratika kultural lokal nunka mihis.
Faktus ne’e hatudu mai ita katak eksistensia husi kultura lokal ou local wisdom sei iha influensia bot ba vida umana iha sosiedade-populasaun Timor Leste. Iha parte balun husi 13 municipiu ita sei rona aktividade konservasaun ba meiu ambiente ne’ebe sempre uza lalaok tradisional ou local wisdom sai hanesan referensia prioridade. Local wisdom ne’ebe sempre aktualiza ba konservasaun ambiental mak Tara Bandu.

Tara Bandu hanesan ritual tradisional Timor Leste ne’ebe beiala sira oferese (kria ou hala’o) no aktualiza husi jerasaun ba jerasaun. Tara Bandu adapta husi liafuan rua mak hanesan Tara ne’ebe signifika ou iha funsaun atu kesi buat ruma hodi labele namlele no monu; Bandu singifika ou iha funsaun atu hato’o hodi labele halo buat ruma (Belun & Asia Foundation:
2013). No fim, ita bele komprende katak tradisaun Tara Bandu hanesan lalaok proebidu ou bandu ne’ebe iha spiritu natural (magis) atu organiza ema hodi labele estraga kriatura.

Aktualizasaun husi tradisaun Tara Bandu ne’e refere ba kestaun tolu, mak hanesan primeiru kontrola moris sosiedade entre ema ho ema, segundu kontrola hahalok umana hasoru animal no terseiru kontrola hahalok umana ba meiu ambiente.

Bazeia ba funsaun hirak ne’e, ha’u foka liu ba parte terseiru; liliu oinsa hare potensia husi Tara Bandu ba Jestaun Lixu Komunitariu. Konteudu jestaun lixu komunitariu husi artigu ida ne’e mak aktus ou habitus soe lixu arbiru. Habitus soe lixu arbiru nu’udar parte ida husi jestaun lixu komunitariu ne’ebe la saudavel no hamosu impaktu negativu ba sosiedade. Tan ne’e, lixu Komunitariu hanesan mos problema ambiental ida ne’ebe presija fo prioridade maksimu. No bazeia ba funsaun terseiru husi tradisaun Tara Bandu ita presija foti potensia ne’ebe relevante hodi regula prolema lixu komunitariu. Potensia Tara Bandu ne’ebe bele valoriza habitus umana hodi jere lixu komunitariu ho diak mak eco-wisdom.

Molok hakat ba terminologia eco-wisdom, ita hotu hatene katak kestaun fundamental husi jestaun lixu mak konsiensia umana. Konsiensia umana sai hanesan faktor prinsipal ne’ebe iha potensia atu muda ema nia habitus soe lixu arbiru. Ema ne’ebe hatene valoriza ninia konsiensia umana, nia iha spiritu atu valoriza potensia eco-wisdom ne’ebe sai hanesan pontus
importante husi local wisdom (Tara Bandu). Tan ne’e, hare ba faktus

Jestaun Lixu ne’ebe lao sabaraut, ita presija hamoris fila fali potensia eco-wisdom atu garante transformasaun habitus at ema nian hasoru meiu ambiente. Eco-wisdom nu’udar terminologia sientifiku ne’ebe hasai husi filozofu Norwegia, Arne Naess ne’ebe refere ba etika sosiedade (ecoshopy) hodi sai hanesan sasukat atu valoriza relasaun entre ema ho ambiente (Bo Yong & Robert Fredrik Young: 2019). Iha tradisaun Tara Bandu, funsaun terseiru mos iha konteudu hanesan ho filozofia Arne Naess nian konaba
relasaun ema ho ambiente. Hodi nune’e, hau senti ita presija hamoris funsaun tradisaun lokal (Tara Bandu) hodi bele tau ba konsiderasaun konaba prezensa ambiente ba vida umana. Sein ambiente ne’ebe diak, se la iha mos moris ne’ebe saudavel. Wainhira ita ema komprende lolos
papel ita nian iha meiu ambiente, ita mos hatene valoriza ita nia konsiensia atu kontribui ba diak tomak (tantu ita nian no mos meiu ambiente). Ita bele tuir treinamentu modernu oioin konaba sistema no teknika operasional ba jestaun lixeiru (R5- Rethink-Elimination, Reduce, Reuse, Recycle, no Recovery), maibe buat ne’ebe fundamental mak oinsa halo transformasaun
ba habitus at hodi soe lixu arbiru.

Iha konteudu ne’e, hau sujere ita bele aplika ou valoriza potensia local wisdom – sabedoria lokal iha tradisaun Tara Bandu hodi garante aktualizasaun husi treinamentu sira. Tuir konseptu jestaun lixeiru buat ne’ebe importante mak aktualizasaun sistema no teknika operasional jestaun lixu nian. Liu husi formasaun no treinamentu mak ita bele hatene
no komprende sistema no teknika operasional jestaun lixeiru. Maibe, ita la bele haluha katak formasaun ba komprensaun konaba eksistensia umana mos importante. Tipu formasaun ne’e iha oin rua, mak hanesan akompainamentu psikologia, ne’ebe relevante ho habitus umana no
ritual husi tradisaun kultura, espesifiku ba Tara Bandu. Liu husi tipu formasaun rua ne’e ita bele komprende katak meiu ambiente nu’udar kritura importante ba ita ema.

Eksistensia meiu ambiente sai hanesan baze fundamental oinsa Maromak kria ita ema (bele hare Gen, 1.26-27). Aktualizasaun potensia local wisdom (Tara Bandu) ba jestaun lixu komunitariu tuir ha’u nia hanoin iha pontus rua mak importante. Primeiru, ita hafanu hikas konsiensia umana
ne’ebe mout ou lakon tan hahalok konsumtivu. Atu garante pontus primeiru ne’e lao ho diak, ita presija sensaun (multa) administrativu no natureza ne’ebe haktuir nanis ona iha ita nia tradisaun Tara Bandu. Ida ne’e mak pontus segundu. Sensaun (multa) ne’ebe aplika iha tradisaun Tara Bandu mak multa osan (seksaun administrativu) no ‘babeur lulik’ (natureza).

Oinsa buat hirak atu organiza ho diak, ita presija partisipasaun maksimu husi autoridade lokal no governu atu hala’o sosializasaun ba komunidade sira. Liu husi sosializasaun mak ita bele hamoris potensia local wisdom husi tradisaun Tara Bandu atu ema bele jere lixu komunitariu ho diak liu husi koinesementu modernu (R5).

*(Hakerek na’in Estudante Mastradu Ciencia Ambiental, Universidade Diponegoro, Semarang, Indonesia)

Print Friendly, PDF & Email

LEAVE A REPLY

Please enter your comment!
Please enter your name here