Reportajen David da Costa Gusmao
Movimentu Juventude no Sosiedade ba Demokrasia (MJSD) apoiu atual prezidente Partidu Demokratiku (PD), Mariano Assanami Sabino atu kandidata-an ba iha Prezidente Republika ba periodu 2022-2027.
Tuir porta voz Eugenio dos Santos Menezes hateten haree ba situasaun ne’ebé Timor-Leste hasoru hahú husi 2017 ate ohin loron, tuir MJSD nia observasaun ba lalaok orgaun estadu sira nia funsionamentu hahu mihis, no lakon nia identidade ba salva guarda konstituisaun no garantia ba bens estar povu nian komesa dizparaliza iha sosiedade nia leet. Maske nune’e Timor-Leste atu tama hikas ona ba iha siklu eleisaun prezidensiál 2022 no eleisaun Parlamentár 2023.
“Ho ida ne’e ami hahu rejista ona ema individu balu komesa hahu kandidata-an ona, no mos ema balu liu husi Partidu Politiku sira deklara ona hodi sai kandidatura ba Presidente Republika 2022 to’o 2027,” nia dehan liu husi konferénsia imprensa, iha Jardin 5 Maio, Kuarta 22/09.
Nia haktuir nu’udar Movimentu Juventude no Sosiedade ba Demokrasia katak, atu fo fila hikas konfiansa públiku nian, no normaliza orgaun estadu tomak presiza figura rezistensia ne’ebe iha kapasidade politika no iha pensamentu estadista hodi kaer metin prinsipiu ukun rasik-an ne’e no iha vizaun ne’ebe forte.
“Ami husu ba Mariano Assanami Sabino atu bele kandidata-an ba Presidente Republika tinan 2022-2027, Ami nia apoiu total ba ita boot nia kandidatura, hodi bele fo esperansa ba povu nia espetativa, ami sei mobiliza forsa komponente hotu-hotu hodi fo vitória ba Timor-Leste,” nia dehan.
