Reportajen Santina Lucia da Costa
Sekretariu Estadu Komunikasaun Sosial (SEKOMS), Mericio Juvinal dos Reis ‘Akara’ lansa programa ba Kampaña Nasional Kombate Hoax no Promove Internet Saudavel iha Nivel Munisipiu, ne’ebe hahu husi Munisipiu Lautém.
Iha abertura Sekretariu Estadu Komunikasaun Sosial (SECOMS), Mericio Juvinal dos Reis “Akara” hateten importánsia husi kampaña nasional ida ne’e mak ita hakarak enkoraja, konvida ita hotu atu kontribui hodi kombate Hoax ka lia falsu ne’ebé durante ne’e lao, liuliu sidadaun balun uza media sosial hodi lansa lia falsu ka hoax iha ita nia rai.
“Ita hatene katak Hoax ka lia falsu ne’e la ajuda ita nia dezenvolvimentu, la eduka ita, la inspira ita, halo ita sai konfuzaun tan, halo ita atu la komprende situasaun, halo ita atu hirus malu, halo ita atu minimiza malu no lia falsu mós bele provoka konflitu, atu ataka malu, atu deskredita malu to’o ikus ita nia nasaun sai fatin ne’ebé maka nakonu ho lia falsu, ida ne’e la ajuda ita nia dezenvolvimentu tanba ita gasta ita nia enerjia ba “gosip”. esplika, Akara” iha Salaun ANC, Merkadu Lama, 17/9.
Akara dehan iha situasaun ida ne’e ita labele husik atu kontinua, ita tenki hamutuk fila-fali konfia malu, fiar malu, rona malu, atu hahu dezenvolve ita nia rai. Ne’e duni ho kampanha sira hanesan ne’e ita hakarak enkoraja, husu sidadaun hotu-hotu atu kontribui ba kombate Hoax.
Akara subliña aproveita kampanha ida ne’e hodi promove internet saudavel, internet seguru ba ita hotu-hotu, liuliu ba ita nia-oan sira, aproveita internet saudavel aumenta ita nia matenek, ita nia esperiensia, konhesimentu, la’os ba buat negativu.
Iha fatin hanesan, Vise-Ministru Edukasaun Juventude no Desportu (MEJD), António Guterres, hateten atu dezenvolve ita nia rai atinje metas ba dezevolvimentu, úniku maka ita hotu tenke hatete hakribi lia falsu ne’e, tanba lia falsu ne’e mós bele des-motiva ita nia dezenvolvimentu.
Nia dehan MEJD iha mós papel boot atu kontribui ba desiminasaun ba programa kombate Hoax ninian, tanba ministériu ida ne’e mós asumi responsabilidade boot maioria ita nia professor sira, alunus sira mós lorloron uza internet, laos hotu-hotu asesu maibé MEJD mós liuhusi krikulun ensinu ita implementa daudaun ona mós programa dezenvolvimentu ba Informasaun Komunikasaun Teknolojia (ICT) ba profesores sira, ita haree ninia importansia ida kona-ba dezenvolvimentu ICT ba profesores iha mós aspeitu balun atu enkoraza liu tan profesores sira future oin mai.
Entretantu liu husi gravasaun video, Administradór Munisipiu Lautem, Domingos Xavio, hateten lansamentu Kampaña nasional kombate hoax no promove internet saudavel ba Munisipiu Lautem ne’e importante tebes liuliu iha tempu covid-19 agora ne’e.
“Ita hatene katak, komunidade iha area remotas, dalabarak fiar liu hoax, atu vasina ne’e sira tauk tanba media sira mós kobertura la kobre to’o iha area remotas, entaun komunidade menus informasaun, tanba ne’e ami presija tebes media sira to’o fatin remotas, nune’e komunidade labele fiar ba hoax.” Dehan Administradór Munisipiu Lautem Domingos Xavio.
