Reportajen Zevonia Vieira
Sekretária Estadu ba Igualdade no Inkluzaun (SEII), Maria José da Fonseca Monteiro de Jesus no Country Director Plan International Timor-Leste, Dillyana Ximenes asina Nota Entendimentu (MoU) kona-ba Empoderamentu Labarik-Feto no Foin-sa’e Feto ba Futuru Lideransa, Eliminasaun Violénsia Bazeia ba Jéneru no Haforsa Ekonomia Feto iha salaun Maria Gorreti, Edifísiu SEII, Caicoli.
Liuhusi komunikadu imprensa ne’ebe Neon Metin asesu esplika katak objetivu hosi memorandu entendimentu ida-ne’e atu regula relasaun bilateral no kooperasaun entre parte rua-ne’e, relasiona ho promove igualdade jéneru no inkluzaun liuhosi empodera labarik-feto, feto foin-sa’e no feto sira hotu iha área ekonomia, polítika no mós hapara violénsia bazeia ba jéneru.
“Serbisu hamutuk ho Plan Internasional ida-ne’e la’o tempu lubuk ida ona no ita ohin asina fila fali akordu serbisu kooperasaun hamutuk ho Plan Internasional ba tinan tolu (3) ba oin atu asegura katak feto, labarik-feto no maluk portadora defisiénsia sira bele iha partisipasaun no hala’o knaar ida ativa iha komunidade nia leet, sira bele halo desizaun ne’ebé di’ak ba sira-nia an rasik, sira-nia futuru no ba sira-nia isin-lolon”, Sekretaria Estadu dehan Maria José da Fonseca, 28/09.
Nia dehan serbisu kooperasaun ida-ne’e bele asegura katak feto sira-nia atividade iha área ekonomia bele hakbiit liután no asegura feto nia partisipasaun iha área polítika, no liuliu bele halakon no hakotu violénsia hasoru feto no labarik-feto tuir programa governu nian liuhosi portafóliu SEII.
Serbisu koletiva ho parseiru bilaterál, multilaterál, sosiedade sivíl ita haree katak neineik maibé iha ona mudansa balun liuliu ho intervensaun Plan International nian. Labarik-feto iha nivel oioin ativa tebtebes, sira iha inisiativa hanesan ativa iha parlamentu foin-sa’e no organiza “Labarik-Feto Okupa iha Pozisaun ka Girls Take Over” durante oras balun ba kargu foti-desizaun hanesan Prezidente Repúblika, Prezidente Parlamentu Nasionál, Primeiru-Ministru no membru Governu nian.
Iha fatin hanesan Country Director Plan International, Dillyana Ximenes hatetem Plan nu’udar organizasaun umanitáriu internasionál ida ba dezenvolvimentu komunitária, ne’ebé sentradu ba labarik, liuliu realiza direitu labarik-feto, ne’ebé lahó afiliasaun relijioza, polítika ka governmental nian.
“Iha tinan barak ona serbisu hamutuk ho SEII no orgullu tebes ita bele too iha etapa formalmente ida-ne’e. Akordu ne’e sei foku ba área tolu hanesan redús ka elimina violénsia kontra feto no labarik-feto sira, empoderamentu ekonomia feto rurál no empoderamentu lideransa feto”, dehan Dillyana Ximenes
Nia dehan kolaborasaun ida-ne’e bele empodera labarik-feto no feto sira hodi hadi’a liután vida moris família no sira-nia komunidade rasik hodi kontribui ba kreximentu ekonomia sustentável, governasaun demokrátiku no moris di’ak sosiál nian.
Área kooperasaun hosi akordu ne’ebé parte sira hakarak atinje maka haforsa foin-sa’e timoroan sira liuliu feto no feto foin-sa’e sira atu iha kapasidade hodi dezempeña knaar ida ativa no pozitiva iha sira-nia komunidade no mós atu kontrola sira-nia moris no deside rasik kona-ba sira-nia isin-lolon no mós sira-nia futuru; Promove partisipasaun labarik-feto, foin-sa’e feto, no feto ho nesesidade espesiál atu hola parte iha desizaun tomak iha nivel lokál no nasionál; no hakbiit abilidade feto, foin-sa’e feto iha área ekonomia, partisipasaun polítika no advokasia ba eliminasaun violénsia bazeia ba jéneru.
Serbisu kooperasaun ho Plan International ne’e hala’o ho durasaun ba tinan tolu (3) hahú tinan 2021 to’o 2024.
