Home Feature Remata Iha Universidade, Miguel Desidi Fila Fali Ba To’os, Harii Grupu Agrikultura

Remata Iha Universidade, Miguel Desidi Fila Fali Ba To’os, Harii Grupu Agrikultura

1905
0
Koordenador grupu ERMOF, Miguel Mouzinho. [Foto: Santina | 03.09.2021]

Agrikultura nu’udar setór produtivu iha Timor-Leste, mais menus 80% populasaun iha Timor moris liuhusi agrikultura. Agrikultura nu’udar setór sustentável ne’ebé importante oinsá fó moris ba ema.

Neon Metin hasoru malu ho joven millennial ho nia abilidade no kreativu kontribui nia an iha setór agrikultura, maski hasoru dezafiu oin-oin,  maibe ida ne’e la hamate nia espíritu atu kontinua hala’o kna’ar nu’udar to’os na’in.

Miguel  Mouzinho idade 29, ne’ebé remata nia Lisensiatura iha Universidade Nasionál Timor-Lorosa’e (UNTL) foti Fakuldade Edukasaun, Departamentu Quimika, iha inisiativa rasik halibur joven mane no feto sira. Harii grupu ho naran  Era-Ulun Moris Foun (ERMOF) Postu-Administrativu Aileu-Villa iha Munisípiu Aileu, Aldeia Sarin, Suku Fahiria.

Grupu joven ne’e hili naran Era-Ulun Moris Foun, tanba ho hanoin ida oinsá hahú atividade importante iha setór agrikultura, ita presiza bee, nune’e bee ne’ebe sufisiente iha sira nia fatin, bele garante sustentabilidade ba produtu sira

Grupu ERMOF moris iha loron 28 Outubru 2017, kompostu husi membru na’in 13, feto 6 mane 7, grupu ne’e moris ho nia baze legal ida katak, “tau hamutuk forsa hodi hadia moris iha futuru”. Hahu produsaun ida ne’e, kada membru ida tau osan $25.00, nune’e membru na’in 13 total osan iha $325.

Alende Miguel hala’o serbisu iha setór agrikultura, nia mós hanorin iha Eskola Ensinu Sekundáriu Jeral Aileu Malere, no fahe tempu bainhira hanorin hotu, nia fila ba uma ba hamutuk ho nia maluk sira halo atividade ne’ebé mak iha.

Miguel Mouzinho haktuir prosesu harii grupu ne’e, tanba nesesidade ekonomia família, tinan barak família sira sai vítima, susar uitoan ba ekonomiaa, nune’e juventude halibur malu hamutuk kria grupu ida atu haree ba area produtividade hanesan ortikultura, pekuária no peska atu nune’e hetan netik rendimentu ruma ba família.

“Grupu ne’ebé ha’u lidera, família sira la hola parte iha funsionáriu, masak mai husi familia agrikultóres hotu kedas, tanba ne’e mak husi oan ne’ebé mak hetan ona koñesimentu uituan hanoin katak atu dezenvolve fila-fali setór agrikultura ne’ebé mak iha tiha ona.” Dehan Miguel Mouzinho.

Miguel dehan antes hahú eskola iha nivel universitáriu, hahú ona serbisu agrikultura, tanba família moris nu’udar agrikultura, husi benefísiu agrikultór nian, bele sustenta ita nia edukasaun to’o remata, tanba ne’e mak depois termina edukasaun, hakarak fila-fali mai baze, tanba joven no inan-aman barak presiza atu hadi’a ekonomia família.

“Hau hanoin edukasaun ba departamentu Quimika ne’e hanesan dalan ida de’it, maibé edukasaun ema ne’ebé serbisu husi ita nia koñesimentu ne’ebé mak ita iha, la presiza ita tenke serbisu funsionáriu, husi nivel edukasaun ne’ebé mak ita hetan, ita bele serbisu iha area ne’ebé de’it.”dehan, Miguel.

Dezafiu ne’ebé grupu hasoru mak, liuliu iha setór produsaun ortikultura, tanba susar asesu merkadu nune’e bele kanaliza produtu hirak ne’e

“Laiha merkadu fiksu ka kompanhia fiksu para bele foti produtu sira, maibé tanba ami ne’e agro-negósiu, entaun prodúz no fa’an rasik,  lobi se mak atu sosa, nafatin koopera atu nune’e bele kanaliza produtu ida ne’e”, dehan Miguel ba Neon Metin

Maske nune’e grupu ne’e orgullu tanba iha ona forsa hamutuk hodi halo atividade ne’e sai boot liután

Ho pandemia COVID-19 ne’ebe akontese hamosu obstaklu barak ema atu halo atividade produtivu sira, oinsá buka moris tanba dezempregu mos akontese, Miguel ho nia grupu sorte diak tanba sira nia serbisu iha setór agrikultura, tulun netik sira atu kontinua sobrevive.

 “Seidauk Covid-19 ami kontente tanba rai ne’e bele hakmatek no ita bele kanaliza nia produtu ne’e, ita bele hetan osan di’ak liu semana ida bele hetan $200 dollar, se atinji ba oin bele hetan $400 dollar, duké agora maibé agora Covid-19 ne’e tama to’o agora rendimentu laiha, no agora sei iha atividade produsaun.” konfesa Miguel.

Husi atividade produtivu ne’e ERMOF konsege hetan rendimentu, sira kria sistema empresta hodi bele dezenvolve osan ne’e. Miguel hateten osan ne’ebe sira halibur ona osan $20 mill, hodi bele ajuda sosa material sira ne’ebe sira presiza.

Nia mos konfesa katak husi inisiu to’o ohin loron seidauk hetan apoiu ruma husi governu ka organizasaun ruma, maibe ba Neon Metin nia dehan diak liu hahu mesak, karik ba futuru iha prontu koopera.

Print Friendly, PDF & Email

LEAVE A REPLY

Please enter your comment!
Please enter your name here