Reportajen Zevonia Vieira
Ministeriu Saude (MS) deteta tan kazu foun konfirmadu COVID-19 ba loron 01 Setembru hamutuk 232 no kazu obitu nain 5.
Liuhusi komunikadu imprensa, Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr Rui Maria de Araújo relata ba jornalista sira katak kazu detetatu foun ne’ebé relata loron 1 Setembru 2021 hamutuk 232 (iha Dili 169, Covalima 14, Baucau 12, Lautem 12, Viqueque 8 no munisipiu seluk hamutuk 17), husi total kazu detetadu foun mane nain 110 no feto 122.
Husi total kazu detetadu foun ohin, hirak ho idade tinan ho idade 60 nain 12, husi total kazu detetadu foun ohin, 87 kazus ka 37,5,% maka sintomátiku (hatudu sintomas). Husi kazu detetadu foun ohin, 88 (38%) iha ona vasina kompletu & 26 (11%) hetan ona vasina doze dahuluk.
Kazu rekuperadu ne’ebé ralata ohin iha nain 247, total kazu ativu ohin nain 4.480. Total kazu konfirmadu kumulativu sura husi 21 Marsu 2020 to’o loron ohin hamutuk 16.914 no total óbitu ne’ebé relata ohin, 1 Setembru 2021 iha nain 5 (lima),
Ba kazu obitu mane idade 72 timoroan, hela iha Dili seidauk vasina, iha 30 Agostu 2021, diagnóstikadu iha HNGV ho Covid-19 no acidente Vascular Cerebral (AVC) hemorájiku. Matebian iis-kotu horikalan iha oras 23:30.
Feto idade tinan 59 timoroan hela iha Dili, seidauk vasina, iha 31 Agostu 2021 diagnóstikadu iha HNGV ho Covid-19 & Acidente Vascular Cerebral (AVC) iskémiku. Matebian iis-kotu ohin oras 10:00.
Kazu seluk mane idade tinan 63 timoroan hela iha Dili, seidauk vasina, iha 29 Agostu 2021 diagnóstikadu iha ho sindroma insufisiénsia respiratória aguda (SIRA) tan bá Covid-19. Matebian iis-kotu ohin oras 12:55.
Mane idade tinan 72 timoroan, hela iha Ainaro, seidauk vasina, iha 30 Agostu 2021 diagnóstikadu iha Ainaro ho sindroma insufisiénsia respiratória aguda (SIRA) tan bá Covid-19. Matebian iis-kotu ohin oras 06:00, molok atu evakua ba ospitál referénsia Maubisse.
Ikus liu feto idade tinan 49 Timoroan, hela iha Covalima, seidauk vasina, iha 29 Agostu 2021 diagnóstikadu iha Covalima sindroma insufisiénsia respiratória aguda (SIRA) tan bá Covid-19. Iha loron ne’e kedas, matebian evacuada liu husi ambulância aeria mai Vera Cruz. Matebian iis-kotu ohin horikalan oras 19:15.
