Reportajen David da Costa Gusmao
Governu liuhosi reuniaun Konsellu-Ministru ohin aprova ona projetu Dekretu-Lei ne’ebé aprezenta husi Primeiru-Ministru, Taur Matan Ruak, kona-ba hari Orgánika Sekretária Estadu ba Komunidade Timoroan iha Rai-Li’ur.
Prota Voz Governu, Ministru Prezidénsia Konsellu Ministru, Fidelis Manuel Leite Magalhães dehan, Sekretária Estadu ida-ne’e, sei tutela husi Primeiru-Ministru, buka atu hatán ba hakarak timoroan sira nian ne’ebé hela iha rai-li’ur.
“Objetivu husi Sekretária Estadu Foun ida-ne’e atu hametin lasu ne’ebé liga sidadaun timoroan sira iha rai-li’ur no estadu Timor,” hateten Ministru Prezidénsia Konsellu Ministru, Fidelis Manuel Leite Magalhães iha Palásiu Governu, Tersa 17/05.
Nia haktuir ho servisu ne’e, hein katak sidadaun timoroan sira ne’ebé hela iha rai-li’ur bele hetan asesu fasil liután ba servisu públiku importante lubun ida.
Porta voz governu ne’e salienta, Sekretária Estadu ida-ne’e sei iha funsaun hanesan atu fahe informasaun kona-ba prosesu dezenvolvimentu Timor-Leste nian husi komunidade timoroan sira iha rai-li’ur no mobiliza komunidade timoroan sira ba promosaun Timor-Leste rai-li’ur.