Reportajen David da Costa Gusmao
Governu liuhosi reuniaun Konsellu-Ministru iha segunda ne’e, aprova ona proposta Lei ida, kona-ba opsaun prinsipál sira planu nian, (Grandes Opções do Plano) ba tinan 2023.
Iha Proposta Lei ida ne’e, aprezenta direita husi Ministru Finansas, Rui Augusto Gomes.
“Ezisténsia Lei Opsaun Prinsipal sira Planu ne’e hanesan ezijénsia ida husi Lei n. 2/2022, husi loron 10 fulan-fevereiru, Lei Enkuadramentu husi Orsamentu Jerál Estadu no jestaun finanseira publika,” Ministru Prezidénsia Konsellu Ministru, Fidelis Manuel Leite Magalhães informa ba jornalista sira, hafoin reuniaun Konsellu Ministru Estraordináriu iha Palásiu Governu, segunda 9/05.
Nia haktuir iha lei ida-ne’e ho objetivu atu aprova opsaun annual no pluriannual sira, kona-ba planeamentu ho impaktu iha Orsamentu Jerál Estadu no programasaun orsamental plurianuál nian, ne’ebé sei permite konkretiza orsamentu tuir programa sira tomak.
Nia dehan opsaun Prinsipál sira Planu nian (Grandes Opções do Plano) ba tinan 2023 nian ne’e aprezenta, tuir artigu da-47 husi Lei n. 2/2022, loron 10 Fevereiru, identifikasaun estratéjia orsamentál no opsaun prinsipál sira kona-ba planeamentu ho impaktu iha Orsamentu Jerál Estadu nian ba tinan orsamentál tuir mai no ba tinan haat tuituir malu.
“Programasaun orsamentál plurianuál no analiza ba projesaun sira husi indikadór prinsipál makro ekonómiku nian ho influénsia iha Orsamentu Jerál Estadu no ninia evolusaun,” Nia esplika.
Enkuantu Proposta Lei ida-ne’e sei submete ba Parlamentu Nasionál.
